ەكس-پرەزيدەنتتىڭ ءوز قولىمەن جازىلعان ەڭ شىنايى شىعارما قاراشانىڭ ورتا شەنىندە ءتامام بولىپ، اۋلەتتىڭ باسقان ءىزىن اڭدىپ وتىرعان اۋديتورياعا جول تارتتى.
"مەنىڭ ءومىر جولىم" دەپ اتالاتىن كىتاپتا نازاربايەۆ سىناپتاي سىرعىپ وتكەن داۋرەندى وي ەلەگىنەن وتكەرىپ، اعىل-تەگىل اقتارىلادى.
ساياسي ايتىس-تارتىستان بولەك، جەكە ومىرىنە قاتىستى قىم-قۋىت وقيعالاردى جىپكە تىزەدى. توقالى بار (ەكىنشى وتباسى) ەكەنىن تۇڭعىش رەت مويىندايدى. اسەل يسابايەۆاعا ەس-تۇسسىز عاشىق بولعانىن ايتا كەلە، ەكەۋىنىڭ اراسىنداعى ماحاببات حيكاياسىن مايىن تامىزىپ باياندايدى.
ودان تۋعان ەكى ۇل - تاۋمان مەن بايكەننىڭ ۇرپاق ساباستىعىن جالعاپ، اۋلەتتىڭ ۇزىلگەلى تۇرعان ءۇمىتىن قايتا تىرىلتكەنىن اڭگىمەلەيدى.
نازاربايەۆتىڭ قوس مۇراگەرى - ات جالىن تارتىپ مىنەر جاسقا جەتتى. تاۋمان 2005 جىلى ومىرگە كەلسە، بايكەن 2008 جىلى دۇنيە ەسىگىن اشقان.
ەكس-پرەزيدەنتتىڭ ەكى ۇلعا ەرەكشە اكسەنت بەرۋى تەگىن ەمەس. بۇل ءبىر جاعىنان ءسىز بەن بىزگە قىر كورسەتۋ.
DALA INSIDE-قا جەتكەن مالىمەت بويىنشا سىرت كوزگە سىر الدىرماسا دا، ءابىش ۇلى قازىرگى پرەزيدەنتكە وكپەلى. وسىعان دەيىنگى توقايەۆتىڭ تاراپىنان ايتىلعان استارلى سىن نازاربايەۆقا اۋىر تيگەن. ەكس-پرەزيدەنتكە سوڭىنا ادال بولۋعا سەرت بەرگەن ەسكى گۆارديا ەرتەڭگى كۇنى تاۋمان مەن بايكەن تاندەمىنىڭ توڭىرەگىنە توپتاسۋى عاجاپ ەمەس.
