Eks-prezıdenttiń óz qolymen jazylǵan eń shynaıy shyǵarma qarashanyń orta sheninde támam bolyp, áýlettiń basqan izin ańdyp otyrǵan aýdıtorıaǵa jol tartty.
"Meniń ómir jolym" dep atalatyn kitapta Nazarbaev synaptaı syrǵyp ótken dáýrendi oı eleginen ótkerip, aǵyl-tegil aqtarylady.
Saıası aıtys-tartystan bólek, jeke ómirine qatysty qym-qýyt oqıǵalardy jipke tizedi. Toqaly bar (ekinshi otbasy) ekenin tuńǵysh ret moıyndaıdy. Ásel Isabaevaǵa es-tússiz ǵashyq bolǵanyn aıta kele, ekeýiniń arasyndaǵy mahabbat hıkaıasyn maıyn tamyzyp baıandaıdy.
Odan týǵan eki ul - Taýman men Báıkenniń urpaq sabastyǵyn jalǵap, áýlettiń úzilgeli turǵan úmitin qaıta tiriltkenin áńgimeleıdi.
Nazarbaevtyń qos murageri - at jalyn tartyp miner jasqa jetti. Taýman 2005 jyly ómirge kelse, Báıken 2008 jyly dúnıe esigin ashqan.
Eks-prezıdenttiń eki ulǵa erekshe aksent berýi tegin emes. Bul bir jaǵynan siz ben bizge qyr kórsetý.
DALA INSIDE-qa jetken málimet boıynsha syrt kózge syr aldyrmasa da, Ábishuly qazirgi prezıdentke ókpeli. Osyǵan deıingi Toqaevtyń tarapynan aıtylǵan astarly syn Nazarbaevqa aýyr tıgen. Eks-prezıdentke sońyna adal bolýǵa sert bergen eski gvardıa erteńgi kúni Taýman men Báıken tandeminiń tóńiregine toptasýy ǵajap emes.
