بۇل تۋرالى «روسسيا24» ارناسىندا «100 قادامنىڭ قانشاسى ورىندالدى، قانشاسىن ورىنداۋ قالدى؟» دەگەن سۇراققا جاۋاپ بەرە وتىرىپ، قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ ءمالىم ەتتى.
«بىلتىر قازاقستان رەسپۋبليكاسىندا پرەزيدەنت سايلاۋى ءوتتى. سايلاۋدا حالىقتىڭ 98 پايىزى ماعان داۋىس بەردى. مىنە، سول كەزدە مەنىڭ سايلاۋالدى تۇعىرنامام «بەس ينستيۋتتىق رەفورما» بولدى. ءقازىر سول رەفورمانى جۇزەگە اسىراتىن ۋاقىت جەتتى. بۇعان دەيىن ءبىز رەسۋرس جيناپ، قوعامدى دايىندادىق»،-دەدى ن.نازاربايەۆ.
«رەفورمانىڭ ءبىرىنشىسى - مەملەكەتتىك قىزمەتتەگى رەفورما. ەكىنشىسى، زاڭنىڭ ۇستەمدىگى. ءۇشىنشىسى - ەكونوميكا، شاعىن جانە ورتا بيزنەستى قولداۋ. ءتورتىنشىسى - حالىق بىرلىگى. بەسىنشى - اشىق ءارى ەسەپ بەرەتىن ۇكىمەت. بۇل بىلتىر جاريا ەتىلگەن رەفورما. بىلتىر ءبىز جىل بويى وسى رەفورمالاردىڭ زاڭنامالىق بازاسىن قامتۋمەن جۇمىس ىستەدىك.
ەلىمىزدىڭ پارلامەنتى مەن ۇكىمەتى بەلسەندى جۇمىس ىستەپ، 59 زاڭدى قابىلدادى. مىنە، وسى جىلدىڭ باسىنان بەرى، ءتورت اي بويى رەفورمالاردى جۇزەگە اسىرىپ كەلەمىز. وسى ۋاقىت ىشىندە 100 قادامنىڭ 25 قادامى ورىندالىپ، ىسكە قوسىلدى»،-دەگەن پرەزيدەنت ناقتى مىسال رەتىندە ءبىرىنشى رەفورمانىڭ العاشقى ناتيجەلەرىنە توقتالدى.
«مەملەكەتتىك قىزمەتتى جەتىلدىرۋ پۋنكتى بويىنشا ايتار بولسام، ەندى ەشكىم دە جوعارى لاۋازىمعا ءبىر اتتاپ قول جەتكىزە المايدى. كەز كەلگەن مەملەكەتتىك قىزمەتكەر ساتى-ساتىسىمەن ءوسىپ، جوعارى لاۋازىمعا لايىقتىلار عانا قول جەتكىزەدى. ياعني، الدىمەن تەست تاپسىرادى، ەمتيحان تاپسىرادى، پراكتيكادان وتەدى، وقيدى. جانە دە بۇرىنعىداي، شەنەۋنىك ارتىنان ءوز توبىن ەرتىپ كەلە المايدى. ءبىرىنشى توقساننىڭ وزىندە وسىنداي جاعداي ون ەسەگە ازايعان»،-دەپ حابارلادى ن.نازاربايەۆ.
دەرەككوز: inform.kz
