Bul týraly «Rossiia24» arnasynda «100 qadamnyń qanshasy oryndaldy, qanshasyn oryndaý qaldy?» degen suraqqa jaýap bere otyryp, Qazaqstan Respýblikasynyń Prezidenti Nursultan Nazarbaev málim etti.
«Byltyr Qazaqstan Respýblikasynda prezident sailaýy ótti. Sailaýda halyqtyń 98 paiyzy maǵan daýys berdi. Mine, sol kezde meniń sailaýaldy tuǵyrnamam «Bes instiýttyq reforma» boldy. Qazir sol reformany júzege asyratyn ýaqyt jetti. Buǵan deiin biz resýrs jinap, qoǵamdy daiyndadyq»,-dedi N.Nazarbaev.
«Reformanyń birinshisi - memlekettik qyzmettegi reforma. Ekinshisi, zańnyń ústemdigi. Úshinshisi - ekonomika, shaǵyn jáne orta biznesti qoldaý. Tórtinshisi - halyq birligi. Besinshi - ashyq ári esep beretin úkimet. Bul byltyr jariia etilgen reforma. Byltyr biz jyl boiy osy reformalardyń zańnamalyq bazasyn qamtýmen jumys istedik.
Elimizdiń Parlamenti men Úkimeti belsendi jumys istep, 59 zańdy qabyldady. Mine, osy jyldyń basynan beri, tórt ai boiy reformalardy júzege asyryp kelemiz. Osy ýaqyt ishinde 100 qadamnyń 25 qadamy oryndalyp, iske qosyldy»,-degen Prezident naqty mysal retinde birinshi reformanyń alǵashqy nátijelerine toqtaldy.
«Memlekettik qyzmetti jetildirý pýnkti boiynsha aitar bolsam, endi eshkim de joǵary laýazymǵa bir attap qol jetkize almaidy. Kez kelgen memlekettik qyzmetker saty-satysymen ósip, joǵary laýazymǵa laiyqtylar ǵana qol jetkizedi. Iaǵni, aldymen test tapsyrady, emtihan tapsyrady, praktikadan ótedi, oqidy. Jáne de burynǵydai, sheneýnik artynan óz tobyn ertip kele almaidy. Birinshi toqsannyń ózinde osyndai jaǵdai on esege azaiǵan»,-dep habarlady N.Nazarbaev.
Derekkóz: inform.kz
