ەلباسى «اسەم» ءبىلىم بەرۋ-ساۋىقتىرۋ ورتالىعىن ارالاپ كورگەننەن كەيىن وبلىستا اتقارىلىپ جاتقان جۇمىستارعا باعاسىن بەردى.
«اقتوبە وبلىسىنا ساپارىم اياقتالدى. ۋاقىتتىڭ تىعىزدىعىنا بايلانىستى اۋداندارعا بارا الماي، تەك قالانى ارالادىم. كورگەنىم جاقسى اسەر قالدىردى. وبلىستا جولداۋداعى تاپسىرمالار ورىندالۋدا. «7-20-25» باعدارلاماسى اياسىندا تۇرعىن ءۇي قۇرىلىسى ءجۇرىپ جاتىر. العاشقى پاتەرلەر بەرىلدى. سپورتتىق، مادەني نىساندار سالىنۋدا. ەكونوميكالىق دامۋ بار، 5 پايىزدىق ءوسىم جاقسى كورسەتكىش.
وفتالمولوگيالىق ورتالىقتا بولىپ، ادامدارمەن كەزدەستىم، ولاردىڭ كوڭىل-كۇيىن ءبىلدىم. اتقارۋشى بيلىكتىڭ جۇمىسىنا وڭ باعا بەرەمىن.
اقتوبەگە جىل سايىن كەلىپ، كەزدەسىپ تۇرامىن. وبلىستا كوپ جۇمىس اتقارىلىپ جاتىر.
ادام ءومىرىنىڭ جاقسى بولۋى مەملەكەتتىڭ ەكونوميكاسىنا بايلانىستى.
گاز بار، ءۇي قۇرىلىسى ءجۇرىپ جاتىر. الداعى ۋاقىتتا ىشكى جول سالىنادى. دەگەنمەن، كەمشىلىكتەر دە بار. جولداۋدا ايتىلعان تاپسىرماعا ساي ەڭ تومەنگى جالاقى 1،5 ەسە كوبەيەدى، ادامداردىڭ جاعدايى تۇزەلەدى.
بارلىعى تۇزەلۋى ءۇشىن جۇمىس ىستەۋىمىز كەرەك. قازاقستاندا جۇمىس ىستەگەن ادام جامان تۇرمايدى»
- دەدى پرەزيدەنت نۇرسۇلتان نازاربايەۆ.
بۇدان كەيىن پرەزيدەنت «استانا» جاڭا ساياباعىن ارالاپ كوردى. مۇندا حالىق دەمالىسى ءۇشىن بارلىق جاعداي جاسالعان. سونداي-اق «حان شاتىر» ساۋدا، ويىن-ساۋىق ورتالىعىنىڭ شاعىن ماكەتى، سۋبۇرقاق ورناتىلعان.
ەسكە سالساق، كەشە مەملەكەت باسشىسى اقتوبەگە جۇمىس ساپارىمەن كەلدى. «ايالا» بالالاردى ساۋىقتىرۋ ورتالاعىنا بارىپ، «باقىتتى بالا» جوباسى اياسىندا ىسكە اسىرىلعان جۇمىستارمەن تانىستى. سونىمەن قاتار تەننيس ورتالىعىنا باردى.
ءوڭىردىڭ ەكونوميكالىق-الەۋمەتتىك دامۋ كورسەتكىشتەرىمەن تانىسقان ەلباسى اقتوبە وبلىسىنىڭ دامۋىنا وڭ باعاسىن بەردى.
ال بۇگىن پرەزيدەنت ەنەرگيا تيىمدىلىگى ورتالىعىندا بولدى. وندا اقتوبە قالاسىنىڭ اكىمى نۇرسۇلتان نازاربايەۆقا وبلىس ورتالىعىنىڭ دامۋ بارىسى، سونداي-اق اقتوبە اگلومەراسياسىن، «SmartCity اقتوبە» جۇيەسىن جانە قالانىڭ قوعامدىق كەڭىستىگىن قۇرۋ جونىندە بەرىلگەن تاپسىرمالاردىڭ ورىندالۋى تۋرالى مالىمدەدى.
