ەلباسىنىڭ باسپا ءسوز حاتشىسى ايدوس ۇكىباي Twitter پاراقشاسىندا: «ساياسي كەڭەستىڭ كەڭەيتىلگەن وتىرىسىندا نۇرسۇلتان نازاربايەۆ «Nur Otan» پارتياسىنىڭ ءتوراعاسى وكىلەتتىگىن تاپسىرۋ تۋرالى شەشىم قابىلداي وتىرىپ، پارتيانى ەل پرەزيدەنتى باسقارۋى كەرەكتىگىن اتاپ ءوتتى. وكىلەتتىكتى بەرۋ ءراسىمى پارتيا جارعىسىنا ساي جۇزەگە اساتىن بولادى» دەپ اقپاراتپەن بولىسكەن.
ونىڭ ايتۋىنشا، پارتيا باسشىسىنىڭ وكىلەتتىگىن تاپسىرۋ جۇمىسى پارتيا جارعىسى بويىنشا اتقارىلادى. پارتيا جارعىسىنا سايكەس، ءتوراعانى سايلاۋ جانە قىزمەتىنەن بوساتۋ ماسەلەسى سەزدە قارالادى.
بۇگىندە «Nur Otan» پارتياسى ەلىمىزدەگى جەتەكشى ساياسي ۇيىم. 1999 جىلى قۇرىلعان ۇيىمدى ۇزاق جىلدار بويى نۇرسۇلتان نازاربايەۆ باسقارعان بولاتىن.
2019 جىلى 19 ناۋرىزدا قازاقستاننىڭ تۇڭعىش پرەزيدەنتى رەسپۋبليكالىق تەلەارنالار ارقىلى حالىققا ۇندەۋ جولداپ، ءوز ەركىمەن وتستاۆكاعا كەتەتىنىن مالىمدەدى.
سول كەزدە نازاربايەۆ جوعارى مەملەكەتتىك لاۋازىمنان كەتسە دە، قاۋىپسىزدىك كەڭەسى مەن Nur Otan پارتياسىنىڭ ءتوراعاسى بولىپ قالاتىنىن ايتتى. كونستيتۋسيالىق كەڭەستىڭ مۇشەسى بولا بەرەدى. سونداي-اق قازاقستان حالقى اسسامبلەياسىن باسقارادى.
