قازاقستاننىڭ بۇرىنعى پرەزيدەنتى نۇرسۇلتان نازاربايەۆ ماسكەۋگە جەكە شاقىرۋ بويىنشا باردى. ول رەسمي ءىس-شارالارعا قاتىسقان جوق. بۇل تۋرالى ەكس-مەملەكەت باسشىسىنىڭ باسپا ءسوز حاتشىسى ايدوس ۇكىباي مالىمدەدى، دەپ حابارلايدى Dalanews.kz.
“ب ا ق تاراپىنان تۇسكەن سۇرانىستارعا بايلانىستى مىنانى حابارلايمىن: نۇرسۇلتان نازاربايەۆتىڭ ماسكەۋگە ساپارى جەكە، بەيرەسمي سيپاتتا بولدى. ونى رەسەي پرەزيدەنتى ۆلاديمير پۋتينمەن كوپجىلدىق دوستىق قارىم-قاتىناس بايلانىستىرادى. بۇل بايلانىس مەملەكەتتىك وكىلەتتىكتەرگە تاۋەلدى ەمەس، بۇرىننان قالىپتاسقان جەكە قاتىناس”، – دەلىنگەن حابارلامادا.
ايدوس ۇكىبايدىڭ ايتۋىنشا، تۇڭعىش پرەزيدەنت الەمنىڭ ءبىرقاتار ەلدەرىنىڭ كوشباسشىلارىمەن تەلەفون ارقىلى سويلەسىپ، حات الماسىپ، كەيدە جەكە كەزدەسىپ تۇرادى.
“بۇل تەك رەسەيمەن عانا ەمەس، سونىمەن قاتار تۇركيا، جۇڭگو، بىرىككەن اراب امىرلىكتەرى، وزبەكستان، بەلارۋس جانە باسقا دا مەملەكەتتەرمەن اراداعى قاتىناسقا قاتىستى. مۇنداي ءوزارا ارەكەتتەستىك فورماتى – حالىقارالىق تاجىريبەگە ساي جانە جىلدار بويى قالىپتاسقان جەكە بايلانىستاردى كورسەتەدى”، – دەدى ول.
باسپا ءسوز حاتشىسى اتاپ وتكەندەي، قازىرگى ۋاقىتتا مەملەكەتتىك لاۋازىم اتقارمايتىن، ءبىراق بەدەلدى ساياساتكەرلەرمەن جەكە كەزدەسۋلەر – ديپلوماتيالىق تۇرعىدان ابدەن قالىپتى تاجىريبە.
“نۇرسۇلتان نازاربايەۆپەن كەزدەسكەن كۇنى رەسەي پرەزيدەنتى جاپونيانىڭ مارقۇم پرەمەر-مينيسترى سيندزو ابەنىڭ جۇبايى اكيە ابەمەن دە جەكە كەزدەسكەن بولاتىن. ال نازاربايەۆتىڭ ساپارىنا كەلسەك، ول جەڭىستىڭ 80 جىلدىعىنا ارنالعان ءىس-شارالارعا شاقىرتۋ العان ەدى. الايدا وبەكتيۆتى سەبەپتەرگە بايلانىستى رەسمي مەرەكەلىك كۇندەردە قاتىسا المادى، سوندىقتان كەيىنىرەك جەكە تارتىپپەن ماسكەۋگە باردى”، – دەپ ءتۇسىندىردى ايدوس ۇكىباي.
سونداي-اق ۇكىباي نازاربايەۆتىڭ شەتەلگە كوشىپ كەتكەنى تۋرالى قاۋەسەتتەردى جوققا شىعارىپ، ونىڭ قازاقستاندا تۇراقتى تۇراتىنىن مالىمدەدى.
ەسكە سالايىق، بۇعان دەيىن ساراپشىلار بۇل ساپاردىڭ استارىندا نە جاتقانىن ساراپقا سالعان ەدى.
Energy Monitor قوعامدىق قورىنىڭ ديرەكتورى، ساراپشى نۇرلان جۇماعۇلوۆتىڭ پىكىرىنشە، بۇل - كرەملدىڭ قازاقستاننىڭ قازىرگى بيلىگىنە جاساعان قىسىمى.
"الداعى 1–2 اپتادا قازاقستان اەس-كە قاتىستى ۆەندوردى انىقتاۋعا ءتيىس. بۇعان دەيىن باستى ۇمىتكەر "روساتوم" بولعان، ءبىراق ونىڭ قارجىلاندىرۋ ماسەلەسىندە قيىندىقتار بار. ال قازاقستان اەس-تىڭ قارجىلاندىرىلۋىنا رەسپۋبليكالىق بيۋدجەتتەن، بجزق نەمەسە ۇلتتىق قوردان قاراجات بولىنبەيتىنىن مالىمدەدى"، - دەيدى مامان.
ساراپشىنىڭ سوزىنشە، رەسەي ءۇش جاڭا كومىر ەلەكتر ستانسياسىن قارجىلاندىرۋعا ءتيىس بولاتىن، ەكى جىلعا جۋىق ۋاقىت وتسە دە، ءالى تىنىشتىق.
"وسى جوبالار ءۇشىن مەملەكەتارالىق كەلىسىم جوباسى دايىندالعان ەدى، ءبىراق بۇل جەردە دە قارجىلاندىرۋ ماسەلەلەرى تۋىندادى. رەسەي ەكىباستۇز گرەس-3ء-تى كەڭەيتۋگە قاتىسۋى كەرەك ەدى. ءبىزدىڭ تاراپ نە ىستەدى؟ اشىق تەندەر جاريالادى. رەسەي تاراپىنان ۇسىنىس بولمادى، سول سەبەپتى تەندەر وتپەي قالدى.
قازىرگى قاتاڭ ۇستانىم كرەملگە ۇناماي وتىر. ايتپەسە باسقاشا قالاي تۇسىندىرۋگە بولادى؟جەكە پىكىرىم: اەس-تى قىتايلار سالادى. ءيا، روساتوم ارزان بولۋى مۇمكىن، ءبىراق سانكسيالىق ماسەلەلەر ۇلكەن كۇمان تۋدىرادى"، - دەدى ول.
