Qazaqstannyń burynǵy prezidenti Nursultan Nazarbaev Máskeýge jeke shaqyrý boiynsha bardy. Ol resmi is-sharalarǵa qatysqan joq. Bul týraly eks-memleket basshysynyń baspasóz hatshysy Aidos Úkibai málimdedi, dep habarlaidy Dalanews.kz.
“BAQ tarapynan túsken suranystarǵa bailanysty mynany habarlaimyn: Nursultan Nazarbaevtyń Máskeýge sapary jeke, beiresmi sipatta boldy. Ony Resei prezidenti Vladimir Pýtinmen kópjyldyq dostyq qarym-qatynas bailanystyrady. Bul bailanys memlekettik ókilettikterge táýeldi emes, burynnan qalyptasqan jeke qatynas”, – delingen habarlamada.
Aidos Úkibaidyń aitýynsha, Tuńǵysh prezident álemniń birqatar elderiniń kóshbasshylarymen telefon arqyly sóilesip, hat almasyp, keide jeke kezdesip turady.
“Bul tek Reseimen ǵana emes, sonymen qatar Túrkiia, Qytai, Birikken Arab Ámirlikteri, Ózbekstan, Belarýs jáne basqa da memlekettermen aradaǵy qatynasqa qatysty. Mundai ózara árekettestik formaty – halyqaralyq tájiribege sai jáne jyldar boiy qalyptasqan jeke bailanystardy kórsetedi”, – dedi ol.
Baspasóz hatshysy atap ótkendei, qazirgi ýaqytta memlekettik laýazym atqarmaityn, biraq bedeldi saiasatkerlermen jeke kezdesýler – diplomatiialyq turǵydan ábden qalypty tájiribe.
“Nursultan Nazarbaevpen kezdesken kúni Resei prezidenti Japoniianyń marqum premer-ministri Sindzo Abeniń jubaiy Akie Abemen de jeke kezdesken bolatyn. Al Nazarbaevtyń saparyna kelsek, ol Jeńistiń 80 jyldyǵyna arnalǵan is-sharalarǵa shaqyrtý alǵan edi. Alaida obektivti sebepterge bailanysty resmi merekelik kúnderde qatysa almady, sondyqtan keiinirek jeke tártippen Máskeýge bardy”, – dep túsindirdi Aidos Úkibai.
Sondai-aq Úkibai Nazarbaevtyń shetelge kóship ketkeni týraly qaýesetterdi joqqa shyǵaryp, onyń Qazaqstanda turaqty turatynyn málimdedi.
Eske salaiyq, buǵan deiin sarapshylar bul sapardyń astarynda ne jatqanyn sarapqa salǵan edi.
Energy Monitor qoǵamdyq qorynyń direktory, sarapshy Nurlan Jumaǵulovtyń pikirinshe, bul - Kremldiń Qazaqstannyń qazirgi biligine jasaǵan qysymy.
"Aldaǵy 1–2 aptada Qazaqstan AES-ke qatysty vendordy anyqtaýǵa tiis. Buǵan deiin basty úmitker "RosAtom" bolǵan, biraq onyń qarjylandyrý máselesinde qiyndyqtar bar. Al Qazaqstan AES-tiń qarjylandyrylýyna respýblikalyq biýdjetten, BJZQ nemese Ulttyq qordan qarajat bólinbeitinin málimdedi", - deidi maman.
Sarapshynyń sózinshe, Resei úsh jańa kómir elektr stantsiiasyn qarjylandyrýǵa tiis bolatyn, eki jylǵa jýyq ýaqyt ótse de, áli tynyshtyq.
"Osy jobalar úshin memleketaralyq kelisim jobasy daiyndalǵan edi, biraq bul jerde de qarjylandyrý máseleleri týyndady. Resei Ekibastuz GRES-3-ti keńeitýge qatysýy kerek edi. Bizdiń tarap ne istedi? Ashyq tender jariialady. Resei tarapynan usynys bolmady, sol sebepti tender ótpei qaldy.
Qazirgi qatań ustanym Kremlge unamai otyr. Áitpese basqasha qalai túsindirýge bolady?Jeke pikirim: AES-ti qytailar salady. Iá, RosAtom arzan bolýy múmkin, biraq sanktsiialyq máseleler úlken kúmán týdyrady", - dedi ol.
