ونىڭ اتاپ وتكەنىندەي زاڭ الدىندا ازاماتتاردىڭ ءبارى تەڭ. ودان نازاربايەۆ اۋلەتى دە اتتاپ وتە المايدى.
"ەكس-پرەزيدەنتتىڭ شەتەلدەگى كاپيتالى مەن دۇنيە-مۇلكى كەرى قايتارىلا ما؟" دەگەن ساۋالعا جاۋاپ قاتقان قوشانوۆ:
"ەگەر قارجى استىرتىن، زاڭسىز جولمەن شىعارىلسا، كىم بولسا دا زاڭ الدىندا جاۋاپ بەرەدى. ول تۋىسقان با، تۋىس ەمەس پە، لاۋازىمدى قىزمەتكەر مە، ونىڭ ءبارى زاڭنىڭ الدىندا جاۋاپ بەرەدى جانە زاڭسىز شىعارىلعان قارجىنىڭ ءبارى قايتارىلادى. الايدا، قايتالاپ ايتامىن، ونىڭ ءوزىنىڭ الگوريتمى بار، بۇل وتە كۇردەلى پروسەس"، - دەدى.
ءماجىلىس ءتوراعاسى جاقىندا پرەزيدەنت توقايەۆتىڭ جارلىعىمەن شەتەلگە زاڭسىز شىعارىلعان كاپيتالدى قايتارۋ بويىنشا كوميسسيا قۇرىلعانىن ەسكە سالدى. ول تەك پرەزيدەنتكە باعىنادى جانە وعان ەسەپ بەرەدى.
"سوندىقتان كوميسسيانىڭ جۇمىسىن كۇتۋ كەرەك. ارينە، ول شەتەلگە كەتكەن اقشانى قايتارۋ وڭاي جۇمىس ەمەس. سەبەبى قازاقستاندا دا، شەت ەلدە دە اقشانىڭ زاڭسىز جولمەن الىنعانى دالەلدەنۋى ءتيىس"، - دەدى قوشانوۆ.
بۇگىن ماجىلىستە "قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل ماسەلەلەرى تۋرالى" زاڭ جوباسى ەكىنشى وقىلىمدا ماقۇلداندى.
بۇعان دەيىن توقايەۆ "ەكونوميكالىق رەسۋرستاردى زاڭسىز شوعىرلاندىرۋعا قارسى ءىس-قيمىل ماسەلەلەرى جونىندەگى ۆەدومستۆوارالىق كوميسسيا (ۆاك) قۇرۋ تۋرالى" جارلىق شىعارعان. كوميسسيا ەلدەن زاڭسىز شىعارىلعان اقشانى قازاقستانعا قايتارۋمەن اينالىسادى.
سونداي-اق زاڭسىز جولمەن الىنعان ەكونوميكالىق رەسۋرستاردىڭ مونوپوليالىق (وليگوپوليالىق) شوعىرلانۋىن انىقتايدى.
ۇلتتىق ەكونوميكا ءمينيسترى الىبەك قۋانتىروۆاتىڭ ءمالىم ەتكەنىندەي تاۋەلسىزدىك جىلدارى ىشىندە قازاقستاننان، شامامەن، 100 ملرد دوللار زاڭسىز شىعارىلعان.
https://dalanews.kz/sadak/60052-ar-norvegting-shotynda-190-myng-dollar-bar
