باتىس قازاقستان وبلىسى اكىمى ناريمان تورەعالييەۆتىڭ جەتەكشىلىگىمەن جازعى ۋاقىتتاعى بالالاردىڭ قاۋىپسىزدىگى تاقىرىبىندا كەڭەس ءوتتى.

كەڭەس بارىسىندا توتەنشە جاعدايلار، پوليسيا دەپارتامەنتتەرىنىڭ، ءبىلىم، دەنساۋلىق ساقتاۋ باسقارمالارىنىڭ وكىلدەرى وڭىردەگى بالالار قاۋىپسىزدىگىن قامتاماسىز ەتۋ باعىتىندا اتقارىلىپ جاتقان جۇمىستار بويىنشا بايانداما جاسادى.

اشىق دەرەككوزدەردەگى مالىمەتتەرگە سايكەس، سوڭعى ۋاقىتتا بقو-دا بالالاردىڭ قاتىسۋىمەن ورىن الاتىن قايعىلى جاعدايلار سانى ارتقان. ماسەلەن، بىلتىرعى جىلى سۋعا باتقان كامەلەتكە تولماعاندار سانى 4 بولسا، بيىلعى جىلى جاز ايىندا 5 بالا سۋعا كەتكەن (اقجايىق اۋدانىندا 3 بالا، بايتەرەك اۋدانىندا – 1 بالا، ورال قالاسىندا – 1 بالا).

بقو اكىمى ناريمان تورەعالييەۆ بالالاردىڭ قاۋىپسىزدىگىن قاتاڭ باقىلاۋدا ۇستاۋدى تاپسىردى.

«وبلىسىمىزدا قازىرگى تاڭدا ورىن الىپ وتىرعان جاعدايلاردى بارلىعىڭىز بىلەسىزدەر. سونىڭ ىشىندە بالالاردىڭ سۋعا باتۋى، تەرەزەدەن قۇلاۋى كوپتەپ ورىن الۋدا.

سونداي-اق، جول كولىگىنەن زارداپ شەككەن بالالار سانى بيىلعى جىلى 3،5 ەسەگە، جاراقاتتانعاندار سانى 3،8 ەسەگە ءوسىپ وتىر. وسىعان بايلانىستى شۇعىل تۇردە، بارلىق قۇزىرلى مەكەمەلەرمەن بىرلەسىپ ءتيىستى شارالاردى قابىلداۋىمىز قاجەت.

كامەلەتكە تولماعانداردىڭ قاۋىپسىزدىگى مەنىڭ جەكە باقىلاۋىمدا بولادى. قۇزىرلى مەملەكەتتىك مەكەمەلەر بالالاردى قاۋىپتەن بارىنشا قورعاۋى ءتيىس. اتا-انالار دا شەتتە قالماۋى كەرەك. بارلىق اتا-انالاردى بالالاردىڭ قاۋىپسىزدىگىن مۇقيات باقىلاۋعا شاقىرامىن.

پوليسيا جانە توتەنشە جاعدايلار دەپارتامەنتىنە ءاربىر فاكتى بويىنشا تەرگەۋ جۇرگىزۋدى تاپسىرامىن. ناتيجەلەر تۋرالى ماعان جەكە حابارلاڭىزدار»، - دەدى ناريمان تورەعالييەۆ.

وبلىس اكىمى سالا ماماندارىنا بالالاردىڭ قاۋىپسىزدىگىن قامتاماسىز ەتۋ باعىتىندا ءتيىستى جۇمىستاردى كۇشەيتۋدى تاپسىردى.

اتاپ ايتقاندا، سۋعا تۇسۋگە رۇقسات ەتىلمەگەن جەرلەردە رەيدتىك جۇمىستاردى جۇرگىزۋدى، ءورت ءقاۋپى جاعدايلارى، جول قاۋىپسىزدىگى، ۇيلەردىڭ تەرەزەلەرىنىڭ بەكىتىلۋى جانە قوعامدىق جەرلەردەگى قاۋىپسىزدىكتى قامتاماسىز ەتۋ جانە ت.ب جۇمىستار.