Батыс Қазақстан облысы әкімі Нариман Төреғалиевтің жетекшілігімен жазғы уақыттағы балалардың қауіпсіздігі тақырыбында кеңес өтті.

Кеңес барысында Төтенше жағдайлар, Полиция департаменттерінің, Білім, Денсаулық сақтау басқармаларының өкілдері өңірдегі балалар қауіпсіздігін қамтамасыз ету бағытында атқарылып жатқан жұмыстар бойынша баяндама жасады.

Ашық дереккөздердегі мәліметтерге сәйкес, соңғы уақытта БҚО-да балалардың қатысуымен орын алатын қайғылы жағдайлар саны артқан. Мәселен, Былтырғы жылы суға батқан кәмелетке толмағандар саны 4 болса, биылғы жылы жаз айында 5 бала суға кеткен (Ақжайық ауданында 3 бала, Бәйтерек ауданында – 1 бала, Орал қаласында – 1 бала).

БҚО әкімі Нариман Төреғалиев балалардың қауіпсіздігін қатаң бақылауда ұстауды тапсырды.

«Облысымызда қазіргі таңда орын алып отырған жағдайларды барлығыңыз білесіздер. Соның ішінде балалардың суға батуы, терезеден құлауы көптеп орын алуда.

Сондай-ақ, жол көлігінен зардап шеккен балалар саны биылғы жылы 3,5 есеге, жарақаттанғандар саны 3,8 есеге өсіп отыр. Осыған байланысты шұғыл түрде, барлық құзырлы мекемелермен бірлесіп тиісті шараларды қабылдауымыз қажет.

Кәмелетке толмағандардың қауіпсіздігі менің жеке бақылауымда болады. Құзырлы мемлекеттік мекемелер балаларды қауіптен барынша қорғауы тиіс. Ата-аналар да шетте қалмауы керек. Барлық ата-аналарды балалардың қауіпсіздігін мұқият бақылауға шақырамын.

Полиция және төтенше жағдайлар департаментіне әрбір факті бойынша тергеу жүргізуді тапсырамын. Нәтижелер туралы маған жеке хабарлаңыздар», - деді Нариман Төреғалиев.

Облыс әкімі сала мамандарына балалардың қауіпсіздігін қамтамасыз ету бағытында тиісті жұмыстарды күшейтуді тапсырды.

Атап айтқанда, суға түсуге рұқсат етілмеген жерлерде рейдтік жұмыстарды жүргізуді, өрт қаупі жағдайлары, жол қауіпсіздігі, үйлердің терезелерінің бекітілуі және қоғамдық жерлердегі қауіпсіздікті қамтамасыз ету және т.б жұмыстар.