وزبەكستان باسشىسى شاۆكات ميرزيويەۆتىڭ تۇڭعىش قىزى سايدا ميرزيويەۆانىڭ جاقتاسى كوميلجون اللامجونوۆتىڭ كولىگىنە شابۋىل جاسالدى. بۇل ەلدە ساياسي احۋال تۇراقسىز ەكەنىن كورسەتۋى مۇمكىن، - دەپ حابارلايدى Dalanews.kz ازاتتىققا سىلتەپ.
وزبەكستان پرەزيدەنتى شاۆكات ميرزيايەۆتىڭ ۇلكەن قىزىنىڭ ساياساتتاعى سەرىگى كوميلجون اللامجونوۆ بيىل جازدا قىسىم كورىپ جۇرگەن ادامداي كورىنگەن.
ول شىلدەدە وتكەن ۇلتتىق اقپارات قۇرالدارىنىڭ باسشىلارى مەن جۋرناليستەرگە ارنالعان بريفينگتە وزبەكستاننىڭ اقپارات كەڭىستىگىندە "جالعان اقپارات پەن دەزينفورماسيا كوبەيگەنىن" سىنادى.
وعان دەيىن بىرنەشە اپتا بويى كوپشىلىكتىڭ الدىنا شىقپاعان اللامجونوۆ ويىن اشىپ تۇسىندىرمەدى. ءبىراق ول كەزدە اللامجونوۆتىڭ قايدا جۇرگەنى جانە ساياسي بولاشاعى تۋرالى قاۋەسەت كۇشەيگەن ەدى.
جەلىدە اللامجونوۆ ەلدەن قاشىپ كەتتى، قىلمىستىق قۋدالاۋدا ءجۇر ەكەن دەگەن سىبىس تارادى.
ءبىراق اللامجونوۆ پرەزيدەنت اكىمشىلىگى اقپاراتتىق ساياسات دەپارتامەنتىنىڭ باسشىسى قىزمەتىن جالعاستىرىپ كەلگەنى بەلگىلى بولدى. ول بۇل لاۋازىمدى قىركۇيەكتىڭ سوڭىنا دەيىن اتقاردى.
اللامجونوۆ وتستاۆكاعا كەتەتىنى جايلى مالىمدەمەسىن پرەزيدەنتتىڭ قىزى ءارى كومەكشىسى سايدا ميرزيايەۆامەن بىرگە جاسادى. سايدا وعان بارىنشا اشىق قولداۋ كورسەتتى.
ميرزيايەۆتىڭ ۇلكەن قىزى اللامجونوۆقا "پرەزيدەنتتىڭ تاپسىرمالارىن جاۋاپكەرشىلىكپەن ورىنداپ، مەملەكەت پەن قوعام ءۇشىن ماڭىزدى جوبالاردى جۇزەگە اسىرىپ، باسپا ءسوز بەن ءبىلىم جۇيەسىن جاقسارتۋدا تاماشا ناتيجە كورسەتكەنى ءۇشىن" العىس ءبىلدىردى.
ءبىر ايعا جەتپەي اللامجونوۆقا شابۋىل جاسالىپ، وزبەكستان "قاستاندىق جاساۋ" بابىمەن ءىس قوزعادى.
40 جاستاعى اللامجونوۆ پەن ول مىنگەن Range Rover كولىگىنىڭ جۇرگىزۋشىسى 26 قازاندا جاسالعان قاستاندىقتان امان قالعان. پوليسيانىڭ دەرەگىنشە، قاستاندىق جاساۋشىلار كولىككە بىرنەشە مارتە وق اتقان.
وقيعاعا قاتىسى بار دەگەن كۇدىكپەن ءتورت ادام ۇستالعان.
وزبەكستان استاناسى تاشكەنتتە جول ۇستىندەگى اتىس – قالىپتى جاعداي ەمەس. ونىڭ ۇستىنە، تانىمال ساياساتكەردىڭ كولىگىنە وق اتۋ – ىلۋدە ءبىر كەزدەسەتىن قۇبىلىس. وسىعان وراي، حالىق اراسىندا "قاستاندىقتىڭ ارتىندا كىمدەر تۇر؟"، "ميرزيايەۆ وتباسى باسقاراتىن رەجيم ءۇشىن بۇل نەنى بىلدىرەدى؟" دەگەن سۇراق كوبەيدى.
