پرەزيدەنت باسپا ءسوز قىزمەتىنىڭ حابارىنا قاراعاندا، شاۆكات ميرزيايەۆ اۆتوكولىك جاسايتىن سالا باسشىلارىنا اۆتوموبيل باعاسىن 5 پايىزعا ارزانداتىپ، يمپورت الماستىرۋدى 100 ميلليون دوللارعا جەتكىزۋدى، اۆتوموبيل ءوندىرىسىن لوكاليزاسيالاۋدى 48%-دان 56%-عا كوتەرۋدى مىندەتتەگەن.
سونىمەن قاتار 336 ميلليون دولللار ينۆەستيسيالىق جوبانى يگەرىپ، Tracker جانە Onix اۆتوموبيل ءوندىرىسىن ىسكە قوسۋدى، جاڭا دۆيگاتەل ءوندىرىسىن جولعا قويۋدى تاپسىرعان.
پرەزيدەنت باسپا ءسوز قىزمەتىنىڭ حابارىنا قاراعاندا، ۇكىمەتكە بيىل 1 مامىرعا دەيىن اۆتوكولىك كەزەگىن تولىعىمەن جويىپ، UzAuto Motors كولىكتەرىنە الدىن الا تولەنەتىن قارجىنى 85%-دان 50%-عا ءتۇسىرۋ ماسەلەسى جۇكتەلگەن.
بيىل قاڭتار قىرعىنىنان كەيىن قازاقستان پرەزيدەنتى قاسىم-جومارت توقايەۆ شەتەلدەن كەلەتىن كولىكتەردىڭ جانە وزگە دە تەحنيكا مەن زاتتاردىڭ ۋتيليزاسيا الىمىن جينايتىن "وپەراتور روپ" كومپانياسىنىڭ جۇمىسىن توقتاتۋدى بۇيىرعان ەدى.
بۇل كومپانيانىڭ بۇرىنعى پرەزيدەنت نۇرسۇلتان نازاربايەۆتىڭ قىزى ءاليا نازاربايەۆاعا قاتىسى بارى ايتىلادى. بۇعان دەيىن بيلىك ۋتيليزاسيا الىمىن جينايتىن "وپەراتور روپ" كومپانياسىنا كەيىنگى بەس جىلدا 691،9 ملرد تەڭگە قاراجات تۇسكەنىن ايتقان.
شەتەلدەن اكەلەتىن كولىكتەرگە كەدەن الىمىن ازايتۋ، ۋتيليزاسيا الىمىن الىپ تاستاۋ جونىندە قازاقستاندا بىرنەشە جىلدان بەرى ءتۇرلى تالاپ ايتىلعان.
