ق ر ادىلەت مينيسترلىگى ەلدە الاياقتىق ىس-ارەكەتتىڭ جاڭا ءتۇرى پايدا بولعانىن مالىمدەي وتىرىپ، قازاقستاندىقتارعا ۇندەۋ جاسادى، دەپ حابارلايدى Dalanews.kz.
وزدەرىن ادىلەت ورگاندارىنىڭ قىزمەتكەرلەرى نەمەسە سوت ورىنداۋشىلارى رەتىندە تانىستىرىپ جۇرگەن الاياقتار ازاماتتارعا حابارلاسىپ، اتقارۋشىلىق قۇجاتتاردىڭ تالاپتارىن ورىنداۋدى، بانك شوتتارىن بۇعاتتاۋ، جۇرگىزۋشى كۋالىگىن توقتاتا تۇرۋ جانە ت. ب. ءتۇرلى جولدارمەن قورقىتا وتىرىپ، بەرەشەك وتەۋدى تالاپ ەتە باستادى - دەيدى ادىلەت مينيسترلىگىنىڭ وكىلدەرى.
مۇنداي قوڭىراۋلار كەلىپ تۇسكەن جاعدايدا اتقارۋشىلىق ءىس جۇرگىزۋدىڭ مەملەكەتتىك اۆتوماتتاندىرىلعان اقپاراتتىق جۇيەسىندە (https://aisoip.adilet.gov.kz/) نەمەسە ايس ويپ ءموبيلدى قوسىمشاسى ارقىلى اتقارۋشىلىق ءىس جۇرگىزۋدىڭ بار نەمەسە جوق ەكەنىنە كوز جەتكىزۋ ەسكەرتىلەدى.
الاياقتاردىڭ زاڭسىز ارەكەتتەرىنىڭ الدىن الۋ ءۇشىن مينيسترلىك تەك رەسمي دەرەك كوزدەرىنەن الىنعان مالىمەتتەرگە عانا سەنۋدى جانە دەربەس دەرەكتەردى ءۇشىنشى تۇلعالارعا جانە كۇماندى ينتەرنەت-رەسۋرستارعا بەرمەۋىڭىزدى ەسكەرتەدى - دەلىنگەن حابارلامادا.
