سوڭعى تاۋلىكتە ۆاكسينانىڭ ءبىرىنشى كومپونەنتىن 23 مىڭ، ەكىنشىسىن 25 مىڭنان اسا وتانداسىمىز قابىلداپتى. ال بۇل وتكەن اپتامەن سالىستىرعاندا ستاتيستيكانىڭ ەداۋىر تومەندەگەنىن كورسەتەدى.
ويتكەنى جەتى كۇن بۇرىن دەرتتەن قورعايتىن پرەپاراتتىڭ العاشقىسىن 114 مىڭنان اسا ادام سالدىرىپ، 48 مىڭعا جۋىعى 2ء-شى كومپونەنتىن العان.
اسىرەسە قوس قالادا دا ۆاكسيناعا تۇرعىنداردىڭ بەيجاي قاراۋىنىڭ سەبەبىنەن كورسەتكىش كوڭىل كونشىتپەي تۇر.
ءبىر اپتا بۇرىن ەلوردادا 7 مىڭعا جۋىق جۇرتشىلىق ۆاكسينا الۋعا بارسا، سوڭعى تاۋلىكتە بۇل ءتىزىم مىڭنان اسا اداممەن عانا تولىعىپتى.
الماتىدا دا جاعداي وسى تەكتەس. كۇن سايىن 15 مىڭعا جۋىق قاراشا ەكپە ەكتىرىپ كەلسە، كەشە ىندەتكە قارسى پرەپاراتتى قابىلداعاندار 4 مىڭعا دا جەتپەگەن.
دەنساۋلىق ءمينيسترى الەكسەي سويدىڭ ايتۋىنشا قازاقستانداعى كوروناۆيرۋستىق ەپيدەميولوگيالىق جاعدايدىڭ وربۋىنە قاتىستى بىرنەشە سەناريي بار.
“ءبىز كوروناۆيرۋسپەن سىرقاتتانۋشىلىعىمىزدى باقىلاپ وتىرمىز جانە عالىمداردىڭ بۇكىل جۇمىس توبى بولجام جاساۋ ۇستىندە. ياعني بۇل سوڭعى ەكى اپتاداعى ديناميكاداعى ناقتى ەسەپتەۋلەر، ول سىرقاتتانۋشىلىق، ونىڭ ىشىندە توسەك جۇكتەمەسىنىڭ كورسەتكىشتەرىن سالىستىرادى.
ارينە، ءبىز ەكى اپتا سايىن بولجام جاسايمىز، بولجامدارىمىزدى قايتا قاراستىرامىز.
ءقازىر بىزدە وپتيميستىك سەنارييمەن كۇنىنە شامامەن 6000-6100 جاعداي بولۋى مۇمكىن دەپ بولجاپ وتىرمىز. بۇل تامىز ايىندا بولاتىن ءورشۋ. ال تاۋلىگىنە ناقتى سەنارييمەن 9 مىڭعا دەيىن جانە پەسسيميستىك سەنارييمەن 11 مىڭعا دەيىن ءوسۋى مۇمكىن. ءبىز وسىنداي بولجامداردى كەلتىرەمىز، ءبىزدىڭ توسەك-ورىن قورىنىڭ مۇمكىندىگى قانداي بولاتىنىن قارايمىز جانە بۇل جەردە ءتيىستى شارالار قابىلدانۋدا”، – دەدى سوي.
وسىعان دەيىن ءماجبۇرلى ۆاكسيناعا قارسى شىققان ءبىر توپ ادام دەنساۋلىق ساقتاۋ مينيسترلىگىنىڭ وكىلىنە تاپ بەرگەنى حابارلانعان ەدى.
