مەملەكەت باسشىسى ەل اۋماعىنىڭ ۇشتەن ءبىر بولىگىندە جەر سىلكىنىسى ءقاۋپى بار ەكەنىن ايتتى. سەيسمولوگيالىق ستانسيالار سوڭعى 5 جىلدا 45 مىڭنان استام ءدۇمپۋ جاعدايىن تىركەگەن. ونىڭ كوبى - تومەن بالدىق جەر سىلكىنىسى.
"ءبىراق، اشىعىن ايتۋ كەرەك، الماتىدا بولعان توتەنشە جاعداي كەزىندە ءتيىستى ورگاندار شۇعىل ارەكەت ەتۋگە تولىق دايىن بولعان جوق. ال قالا تۇرعىندارى نە ىستەرىن بىلمەي، ابدىراپ قالدى. دەگەنمەن بۇل جيىننىڭ باستى ماقساتى سىن ايتۋ ەمەس، ناقتى شەشىمدەر قابىلداۋ. ...جۇمىستى دەرەۋ قولعا الۋ كەرەك"، – دەدى پرەزيدەنت.
توقايەۆ جەر سىلكىنىسى كەزىندە دابىل قوسىلماعانى دۇرىس بولعانىن ايتتى.
"دابىل قوسىلمادى. بۇل دۇرىس شەشىم بولدى. ايتپەسە، قالادا دۇربەلەڭ تۋىندايتىن ەدى.
ءبىراق حالىقتى باسقا بايلانىس ارنالارى ارقىلى حاباردار ەتۋ قاجەت بولاتىن. قۇلاقتاندىرۋ بىرنەشە نەگىزگى مىندەتتى شەشۋى كەرەك. ولاردىڭ قايسىسىن بۇرىن قولدانۋ كەرەكتىگى قاۋىپ-قاتەردىڭ اۋقىمىنا بايلانىستى. الايدا قولدانىستاعى الگوريتمدەردە بۇل ەسكەرىلمەيدى. قاتتى جەر سىلكىنىسى كەزىندە ادامداردى ءزىلزالانىڭ فيزيكالىق سيپاتتامالارى مەن ەپيسەنترى تۋرالى اقپارات قىزىقتىرمايدى. ولار تابيعات اپاتىنىڭ قانشالىقتى جويقىن ەكەنىن ونسىز دا سەزىندى. مۇنداي ساتتە، ەڭ باستىسى، تۇرعىنداردى ءارى قاراي قالاي ارەكەت ەتۋ جونىندەگى اقپاراتپەن قامتاماسىز ەتۋ ماڭىزدى"، – دەدى پرەزيدەنت.
مەملەكەت باسشىسى مينيستر سىرىم ءشارىپحانوۆتىڭ سالا مامانى رەتىندە تەوريالىق ءبىلىمى بار ەكەنىن، ءبىراق ناقتى ىسكە كەلگەندە جۇمىسىنىڭ ناتيجەسى كورىنبەي جاتقانىن ايتىپ، اشىق سىنادى.
"قازىرگى جۇمىستى كوڭىلدەن شىعادى دەپ ايتۋعا كەلمەيدى. مينيستر ءشارىپحانوۆقا ەسكەرتەمىن. ەگەر ءسىز ءوز جۇمىسىڭىزدى اۋىر سانايتىن بولساڭىز، اشىعىن ايتىڭىز، عىلىمي-وقىتۋشىلىق قىزمەتىڭىزگە قايتارامىز. وندا تۇرعان ەشتەڭە جوق. قازىرگى احۋال وتە كۇردەلى جانە جاۋاپتى، ەلىمىزدىڭ قاۋىپسىزدىگىنە تىكەلەي بايلانىستى. سوندىقتان ءبارىمىز جيناقى، ۇقىپتى جانە بەلسەندى بولۋىمىز قاجەت. باسقا جول جوق. پرەزيدەنت اكىمشىلىگى بۇگىن ايتىلعان بارلىق ماسەلەنى باقىلاۋدا ۇستايدى"، - دەدى مەملەكەت باسشىسى.
قاسىم-جومارت توقايەۆ الماتى قالاسىنىڭ تۇرعىندارىن سابىرعا شاقىردى. دۇربەلەڭدە قاۋەسەت پەن جالعان اقپاراتتىڭ جەتەگىنە ەرمەۋ كەرەك ەكەنىن، ناعىز الماتىلىقتار مۇنداي جاعدايدا ءوزىن قالاي ۇستايتىنىن ايتتى.
كوللاج: Dalanews.kz
تاعى وقىڭىز:
https://dalanews.kz/del-qazir/98519-maraldydagy-altyn-ondirisin-aiaqtan-sh
https://dalanews.kz/del-qazir/98476-zhyndykhanaga-zhauypty-pavlodarda-poli
