Memleket basshysy el aýmaǵynyń úshten bir bóliginde jer silkinisi qaýpi bar ekenin aitty. Seismologiialyq stantsiialar sońǵy 5 jylda 45 myńnan astam dúmpý jaǵdaiyn tirkegen. Onyń kóbi - tómen baldyq jer silkinisi.
"Biraq, ashyǵyn aitý kerek, Almatyda bolǵan tótenshe jaǵdai kezinde tiisti organdar shuǵyl áreket etýge tolyq daiyn bolǵan joq. Al qala turǵyndary ne isterin bilmei, abdyrap qaldy. Degenmen bul jiynnyń basty maqsaty syn aitý emes, naqty sheshimder qabyldaý. ...Jumysty dereý qolǵa alý kerek", – dedi Prezident.
Toqaev jer silkinisi kezinde dabyl qosylmaǵany durys bolǵanyn aitty.
"Dabyl qosylmady. Bul durys sheshim boldy. Áitpese, qalada dúrbeleń týyndaityn edi.
Biraq halyqty basqa bailanys arnalary arqyly habardar etý qajet bolatyn. Qulaqtandyrý birneshe negizgi mindetti sheshýi kerek. Olardyń qaisysyn buryn qoldaný kerektigi qaýip-qaterdiń aýqymyna bailanysty. Alaida qoldanystaǵy algoritmderde bul eskerilmeidi. Qatty jer silkinisi kezinde adamdardy zilzalanyń fizikalyq sipattamalary men epitsentri týraly aqparat qyzyqtyrmaidy. Olar tabiǵat apatynyń qanshalyqty joiqyn ekenin onsyz da sezindi. Mundai sátte, eń bastysy, turǵyndardy ári qarai qalai áreket etý jónindegi aqparatpen qamtamasyz etý mańyzdy", – dedi Prezident.
Memleket basshysy ministr Syrym Sháriphanovtyń sala mamany retinde teoriialyq bilimi bar ekenin, biraq naqty iske kelgende jumysynyń nátijesi kórinbei jatqanyn aityp, ashyq synady.
"Qazirgi jumysty kóńilden shyǵady dep aitýǵa kelmeidi. Ministr Sháriphanovqa eskertemin. Eger siz óz jumysyńyzdy aýyr sanaityn bolsańyz, ashyǵyn aityńyz, ǵylymi-oqytýshylyq qyzmetińizge qaitaramyz. Onda turǵan eshteńe joq. Qazirgi ahýal óte kúrdeli jáne jaýapty, elimizdiń qaýipsizdigine tikelei bailanysty. Sondyqtan bárimiz jinaqy, uqypty jáne belsendi bolýymyz qajet. Basqa jol joq. Prezident Ákimshiligi búgin aitylǵan barlyq máseleni baqylaýda ustaidy", - dedi Memleket basshysy.
Qasym-Jomart Toqaev Almaty qalasynyń turǵyndaryn sabyrǵa shaqyrdy. Dúrbeleńde qaýeset pen jalǵan aqparattyń jetegine ermeý kerek ekenin, naǵyz almatylyqtar mundai jaǵdaida ózin qalai ustaitynyn aitty.
Kollaj: Dalanews.kz
Taǵy oqyńyz:
https://dalanews.kz/del-qazir/98519-maraldydagy-altyn-ondirisin-aiaqtan-sh
https://dalanews.kz/del-qazir/98476-zhyndykhanaga-zhauypty-pavlodarda-poli
