جۋىردا "شاڭىراق" قوعامدىق بىرلەستىگىنىڭ باسشىسى الماسبەك سادىربايەۆ اسا ءىرى مولشەردە الاياقتىق جاسادى دەگەن كۇدىكپەن ۇستالدى. اۋىل شارۋاشىلىعى ءمينيسترى ايداربەك ساپاروۆ وسى جايتقا قاتىستى پىكىر ءبىلدىردى،- دەپ حابارلايدى Dalanews.kz.

ساپاروۆ بۇل جاعدايعا مينيسترلىكتىڭ ەشقانداي قاتىسى جوق ەكەنىن جەتكىزدى.

"ول "سەلحوزنيك" ەمەس. قۇقىق قورعاۋ ورگاندارى ۇستاسا، سول كىسىلەردىڭ وزدەرى بىلەتىن شىعار نە ءۇشىن ۇستاپ جاتقانىن. مەن جاڭا عانا ايتتىم، تاعى دا ايتام، سۋبسيديا دەگەن – شىعىنداردىڭ ورنىن تولتىرۋ. سۋبسيديانى وبلىستار بەرەدى. 2020 جىلدان باستاپ وبلىستارعا بەرىپ قويعانبىز. اۋىل شارۋاشىلىعى مينيسترلىگىندە تەك ەرەجە قابىلدانادى. سۋبسيديا الاتىن ادام ءوتىنىش بەرگەندە جاۋاپكەرشىلىكتىڭ ءبارىن موينىنا الاتىنداي استىنا قولىن قويادى. سوندىقتان نە ءۇشىن ۇستالعانىن، قالاي ەكەنى جونىندە پىكىر بىلدىرە المايمىن. مەن ونى بىلمەيمىن. قاي وبلىستان الدى؟ جۇمىس جۇرگىزىپ جاتقان قىزمەتكەرلەر بىلەتىن شىعار، – دەدى مينيستر Ulysmedia.kz-كە.

ايتا كەتەيىك، 6 قاراشادا سادىربايەۆ ءوزى باسقاراتىن ادامدار توبى بالقاش، ەڭبەكشىقازاق، كەگەن، رايىمبەك جانە ۇيعىر اۋداندارىندا جالعان اۋىل شارۋاشىلىعى كووپەراتيۆتەرىن قۇردى دەگەن كۇدىككە ىلىنگەن.

نەگىزگى ماقسات - ۇساق مالدىڭ انالىق باسىن ۇرىقتاندىرۋعا سۋبسيديالاردى زاڭسىز الۋ جانە جەمشوپ شىعىندارىن وتەۋ.

"بۇل ءۇشىن زاڭناماعا قايشى اۋىلشارۋاشىلىق جەرلەرى جوق شارۋا قوجالىقتارى تارتىلدى. بۇدان ءارى جالعان كاداسترلىق نومىرلەردى كورسەتە وتىرىپ، دايەكسىز مالىمەتتەردى قامتيتىن سۋبسيديالار الۋعا وتىنىمدەر قاشىقتان بەرىلدى. بۇل رەتتە اۋىل شارۋاشىلىعى كووپەراتيۆتەرى باسشىلارىن حاباردار ەتپەي، ولاردىڭ ەسق-سى پايدالانىلدى.

وسىلايشا 1،2 ملرد تەڭگەدەن استام قاراجات ۇرلانعان"، - دەپ حابارلادى بۇعان دەيىن قما.

كەيىن الماسبەك سادىربايەۆ ۇستالدى. ونىڭ سىبايلاسى تەرگەۋ سوتىنىڭ سانكسياسىمەن ءۇي قاماققا الىندى.

ال ۇستالعانىنان ەكى اپتا بۇرىن الماسبەك سادىربايەۆ ارمان ابدوللاعا سۇحبات بەرگەن. سادىربايەۆ ءوز سۇحباتىندا ەلدەگى نان باعاسىنىڭ قىمبات ەكەنىن ايتىپ، ونىڭ شىن باعاسى 50 تەڭگە بولۋى كەرەگىن دە ايتتى. 

سونداي-اق، قازاقستاندا قاشان اشارشىلىق بولاتىنىن دا بولجاعان.

”رەسەي مەن ۋكراينا اراسىنداعى سوعىس اياقتالعان كەزدە قازاقستاندا اشارشىلىق بولادى. سەبەبى، رەسەي بۇكىل الەمدى ازىقتاندىرۋشى ەل عوي. ول بەلارۋسپەن بىرگە بار قۇشاعىن اشىپ، ساۋداسىن دوللارمەن وتكىزەدى. ال ءبىز سوڭعى قالعان فەرمەرلەردەن دە ايىرىلىپ جاتىرمىز. اگروونىم وندىرەتىن ماماندار جوق بىزدە. وسى سەبەپتەن دە قازاقستان سوعىستان كەيىن اشارشىلىققا ۇشىرايدى”،- دەدى ول.