اۋىل شارۋاشىلىعى ءمينيسترى ايداربەك ساپاروۆ سەرگەي كۋلاگيننىڭ يەلىگىندەگى جەرلەرگە قاتىستى سۇراققا جاۋاپ بەردى، دەپ حابارلايدى Dalanews.kz.
مينيستر ساپاروۆ ەكەۋىنە قانشا گەكتار جەر تيەسىلى ەكەنىن ناقتى ايتا المادى.
"جالپى جوسپار بويىنشا جۇمىس جۇرگىزىپ جاتىرمىز، كوميسسيا قۇرىلعان. ول كىسىلەردە ناقتىى قانشا گەكتار جەر بار ەكەنىنە جاۋاپ بەرۋگە دايىن ەمەسپىن. قاعاز جۇزىندە قانشا ەكەنىن كەيىن جىبەرەيىن. ءبىراق جەر يگەرىلمەي جاتسا، ونى قايتارۋ بويىنشا جۇمىس جۇرگىزىپ جاتىرمىز. تاپسىرما بەرىلگەن، جۇمىس ىستەپ جاتىرمىز. “انانىڭ جەرى، مىنانىڭ جەرى” دەمەيمىز. جۇمىس ىستەمەسە جەردى بوساتۋى كەرەك، باسقا ادامعا بەرۋى كەرەك"، دەيدى مينيستر.
ەسكە سالايىق، بۇعان دەيىن اقمولا وبلىسىندا بۇرىنعى جوعارى لاۋازىمدى شەنەۋنىك سەرگەي كۋلاگيننىڭ يەلىگىندەگى جەر ۋچاسكەسىنە قاتىستى سوت داۋى باستالعان بولاتىن. وبلىستىق جەر رەسۋرستارىن باسقارۋ دەپارتامەنتى مەن ق ر پرەزيدەنتى ءىس باسقارماسىنا قاراستى "بۋراباي" مەملەكەتتىك ۇلتتىق تابيعي پاركى سوتقا ارىز ءتۇسىرىپ، جەر ۋچاسكەسىنە قاتىستى شارتتاردى جارامسىز دەپ تانۋدى تالاپ ەتىپ وتىر.
تالاپ ارىز "اسكوپ" جانە "ينتەگراسيا-سەلينا" جاۋاپكەرشىلىگى شەكتەۋلى سەرىكتەستىكتەرىنە، سونداي-اق، بۋراباي اۋدانى جەر قاتىناستارى بولىمىنە قارسى بەرىلگەن.
ىسكە قاتىستى مامانداندىرىلعان اۋدانارالىق ەكونوميكالىق سوت جەر ۋچاسكەسىنىڭ كاداسترلىق دەرەكتەرىن تولىق زەرتتەۋگە كىرىستى. وسى ماقساتتا "ازاماتتارعا ارنالعان ۇكىمەت" مەملەكەتتىك كورپوراسياسىنان ششۋچينسك قالاسىنداعى "سۆەتلىي" شيپاجايى ورنالاسقان جەردىڭ ناقتى يەسى تۋرالى اقپارات تالاپ ەتىلگەن.
سوت، سونداي-اق، مەملەكەتتىك كورپوراسيا قىزمەتكەرلەرىنە داۋلى ۋچاسكەگە بارىپ، "اسكوپ" سەرىكتەستىگىنىڭ جەرى پرەزيدەنت ءىس باسقارماسىنا قاراستى "بۋراباي" ۇلتتىق تابيعي پاركى جەرىنە قاباتتاسىپ جاتقان-جاتپاعانىن انىقتاۋدى تاپسىردى. تەكسەرىس ناتيجەسى بويىنشا سوتقا رەسمي جازباشا قورىتىندى ۇسىنىلۋعا ءتيىس.
