ءماجىلىس ساعاتىندا جوعارى ءبىلىم بەرۋ گرانتتارىنىڭ قىسقارۋىنا قاتىستى سۇراقتارعا عىلىم جانە جوعارى ءبىلىم ءمينيسترى ساياسات نۇربەك جاۋاپ بەردى، دەپ حابارلايدى Dala News.
دەپۋتاتتار 2025 جىلى مەكتەپ بىتىرۋشىلەر سانى 216 مىڭ بولعانىن، ال گرانت سانى 78 مىڭدى قۇراعانىن ايتتى. 2026 جىلى تۇلەكتەر سانى 232 مىڭعا دەيىن وسەدى دەپ بولجانىپ وتىر، ياعني 16 مىڭعا كوپ. سوعان قاراماستان گرانت سانى 72 مىڭعا دەيىن قىسقارىپ وتىر. وسىعان بايلانىستى دەپۋتاتتار گرانتتاردىڭ نە سەبەپتى ازايعانىن جانە بۇل شەشىمنىڭ ەڭبەك نارىعىنا نەمەسە قارجىلاندىرۋعا قاتىسى بار ما ەكەنىن سۇرادى.
مينيستر بۇل وزگەرىستەر جوعارى ءبىلىم بەرۋ جۇيەسىندەگى قارجىلاندىرۋ مودەلىن قايتا قاراۋمەن بايلانىستى ەكەنىن ءتۇسىندىردى. ونىڭ ايتۋىنشا، مەملەكەتتىك بيۋدجەت ەسەبىنەن بولىنەتىن ءبىلىم گرانتتارىن جىل سايىن شەكسىز ارتتىرۋ مۇمكىن ەمەس.
«ءبىز ءقازىر جوعارى ءبىلىمدى قارجىلاندىرۋ مودەلىن قايتا قاراپ جاتىرمىز. بيۋدجەت مۇمكىندىگى شەكتەۋلى. سوندىقتان تەك مەملەكەتتىك گرانتقا سۇيەنەتىن جۇيە وزگەرۋى كەرەك»، دەدى ساياسات نۇربەك.
ءمينيستردىڭ ايتۋىنشا، وسىعان بايلانىستى بىرنەشە قوسىمشا قارجىلاندىرۋ تەتىگى ەنگىزىلىپ جاتىر. ءبىرىنشى باعىت «كەلەشەك» جيناقتاۋ جۇيەسى. بۇل باعدارلاما بويىنشا اتا انالار بالالاردىڭ بولاشاق ءبىلىمى ءۇشىن الدىن الا قارجى جيناي الادى. قازىرگى تاڭدا شامامەن 197 مىڭ ەسەپشوت اشىلعان. مينيستر مۇنى قوعامدا ءبىلىم ءۇشىن جاۋاپكەرشىلىكتىڭ بىرتىندەپ بولىسە باستاعانىنىڭ بەلگىسى دەپ اتادى.
ەكىنشى باعىت ستۋدەنتتىك نەسيە جۇيەسى. بۇل حالىقارالىق تاجىريبەدە كەڭ تارالعان مودەل. ءمينيستردىڭ ايتۋىنشا، وتكەن جىلى بۇل جوبا پيلوتتىق رەجيمدە ىسكە قوسىلعان، ال بيىل تولىق ەنگىزىلەدى. مۇنداي نەسيە ۇزاق مەرزىمگە بەرىلەدى جانە ستۋدەنتكە وقۋ اقىسىن تولەۋگە مۇمكىندىك بەرەدى.
ءۇشىنشى باعىت ديففەرەنسيالانعان گرانتتار. ياعني مەملەكەت وقۋ قۇنىنىڭ تولىق ەمەس، بەلگىلى ءبىر بولىگىن عانا وتەيدى. مىسالى، 50 پايىزىن جابادى. بۇل ءتاسىل بىردەي بيۋدجەت كولەمىمەن كوبىرەك تالاپكەردى قامتۋعا مۇمكىندىك بەرەدى.
«100 پايىز گرانتتىڭ ورنىنا جارتىلاي گرانت بەرۋ ارقىلى سول قاراجاتقا كوبىرەك ستۋدەنتتى وقىتۋعا بولادى»، دەدى مينيستر.
ءتورتىنشى باعىت «ۇلتتىق قور بالالارعا» باعدارلاماسى. بۇل باستاما بويىنشا ءار بالاعا ۇلتتىق قوردان قاراجات جيناقتالىپ جاتىر. قازىرگى تاڭدا جالپى سوماسى شامامەن 2،5 ملرد دوللاردى قۇرايدى. بۇل قاراجاتتى جوعارى ءبىلىم الۋعا جۇمساۋعا بولادى. ەگەر تالاپكەر گرانت جەڭىپ السا، جينالعان قاراجاتتى باسقا ماقساتتارعا پايدالانۋعا نەمەسە كەيىنگە قالدىرۋعا مۇمكىندىك بار.
ءمينيستردىڭ سوزىنشە، بۇل وزگەرىستەر گرانت سانىن ازايتۋ ءۇشىن ەمەس، جۇيەنى يكەمدى ەتۋ ءۇشىن قولعا الىنعان. ياعني ەندى جوعارى ءبىلىم بەرۋ تەك مەملەكەتتىك گرانتقا عانا تاۋەلدى بولمايدى، ونىڭ ورنىنا ارالاس قارجىلاندىرۋ تەتىكتەرى قولدانىلادى.
وسىلايشا، ماجىلىستەگى تالقىلاۋدا گرانتتاردىڭ قىسقارۋى بيۋدجەت مۇمكىندىگىمەن قاتار، جاڭا قارجىلاندىرۋ مودەلىنە كوشۋ اياسىندا جۇزەگە اسىپ جاتقانى ايتىلدى.
