"QAZBILIM GROUP" كومپانياسىنىڭ باسقارما ءتوراعاسى، ۇلتتىق مەكتەپتەر جوباسى جەتەكشىسى اياتجان احمەتجان وقۋ-اعارتۋ ءمينيسترى عاني بەيسەمبايەۆتىڭ قۋدالاۋىنا ۇشىراعانىن مالىمدەدى، - دەپ حابارلايدى Dalanews.kz.
2023 جىلى اسحات ايماعامبەتوۆ مينيستر لاۋازىمىنان بوساتىلدى. شەنەۋنىك 2019 جىلعى ماۋسىمنان باستاپ 2022 جىلعى ماۋسىمعا دەيىن ءبىلىم جانە عىلىم ءمينيسترى قىزمەتىن اتقاردى. 2022 جىلعى 11 ماۋسىمنان باستاپ وقۋ-اعارتۋ ءمينيسترى بولىپ تاعايىندالدى. ول 4 جىلعا جۋىق ۋاقىتتا "حالىقتىڭ سۇيىكتى مينيسترىنە" اينالدى. ارتىنشا بۇل قىزمەتكە عاني بەكتاي ۇلى بەيسەمبايەۆ كەلدى. بۇعان دەيىن ول ى.التىنسارين اتىنداعى ۇلتتىق ءبىلىم اكادەمياسىنىڭ پرەزيدەنتى قىزمەتىن اتقارعان ەدى.
پەداگوگ اياتجان احمەتجان بەيسەمبايەۆتان ايتارلىقتاي جاڭالىق كۇتپەيتىنىن اشىق ايتتى.
"وقۋ-اعارتۋ مينيسترلىگىنە مينيستر كەلگەلى 1 جىل 4 اي بولدى. ءبىر ورىندا تۇر. ءسوز، ءسوز، سوزبەن كەلە جاتىر. مۇعالىمدەردىڭ دە اتتەستاسيالاۋ ماسەلەسى ءالى شەشىلگەن جوق. ەندى شەشىلدىمەن قۇجات قابىلداندى. قۇجاتىنىڭ ءوزى شيكىلى-پىسىلى. سوندىقتان ءتاپ-تاۋىر ءجۇرىپ، ىزگە ءتۇسىپ قالعان پويىزدى الدىق تا، توقتاتا سالدىق. جاڭا ىزگە ءتۇسىپ، ءجۇرىپ كەت دەگەنشە تاعى ۋاقىت ءوتىپ جاتىر.
شىنى كەرەك، مىنا مينيستر تۇسىندا ءبىلىم سالاسىنان ۇلكەن جاڭالىق كۇتپەيمىن"، - دەدى ول Barys Media-عا بەرگەن سۇحباتىندا.
ۇلتتىق مەكتەپتەر جوباسىنىڭ نەگىزىن قالاۋشى وزىنە قانداي قىسىمدار جاسالعانىن باياندادى.
"ۇيرەنگەنمىن، (جولىن بوگەۋ - ەسك.)، ونداي مەندە كوپ بولادى. سول ءۇشىن دە مەن مەكتەپ ديرەكتورلىعىنان كەتتىم. سىپايى تۇردە "كەت" دەدى، "جاقسى" دەپ كەتتىم. ويتكەنى ماعان ورىن دا، باسقا دا قىزىق ەمەس. ماعان ءبىر عانا نارسە قىزىق. ءبىلىم سالاسىنا، ۇرپاقتىڭ بولاشاعىنا قىزمەت ەتۋ دەيتىن مۇمكىندىك قانا قىزىق. ال ول مۇمكىندىكتى ماعان مينيسترلىك بەرمەسە مەملەكەتتىڭ زاڭدارى بەرەدى.
...وتكەن جىلى استانا قالاسىندا "№90 گيمنازيانىڭ ديرەكتورلىعىنان كەتسىن" دەدى. ونى ءبىلىم باسقارماسى "ساعان كەت دەپ جاتىر" دەپ جەتكىزدى. "قۇلاعىم تىنىش بولسىنشى، كەتە سالشى" دەپ. وزىمە قويعان ناقتى پرينسيپتەرىم بار: اتاق ءۇشىن جۇگىرمەيمىن، ورىن ءۇشىن كۇرەسپەيمىن دەگەن. "جاقسى" دەدىم، كەتە سالدىم. ودان كەيىن QAZBILIM ۇلتتىق ليسەيلەرىن اشقان كەزدە ليسەنزيا بەرىلمەسىن دەگەن تاپسىرمالار بولدى. مينيستر تاراپىنان، مينيسترلىك تاراپىنان.
ءبارى ءبىر ءسوز عوي. ونى دا زاڭمەن دالەلدەپ، ءوتىنىشىمىزدى بەرىپ ءجۇرىپ، ليسەنزيامىزدى الدىق. مەكتەپتەرىمىزگە تەكسەرىستەر كىرگىزدى. ايىپپۇلىن تولەدىك. تەكسەرگەننەن كەيىن ايىپپۇل تابادى عوي.
ال الەۋمەتتىك جەلىدە "اياتجاننىڭ ارتىندا كىم تۇر؟" دەگەن ءبىر قيتۇرقى پوستتار جازعىزدى. مەنىڭ ارتىمنان جۇڭگو ىزدەگىسى كەلەتىندەر، مەنىڭ ارتىمنان ساياسات ىزدەگىسى كەلەتىندەر كوپ. مەن ساياساتكەر دە ەمەسپىن. تازا ءبىلىم سالاسىنىڭ مەنەدجەرىمىن. ارينە، ادىمداپ، قارىشتاپ باسىپ جۇگىرگىڭ كەلەدى"، - دەدى ول.
ايتا كەتەيىك، بەيسەمبايەۆ تۇسىندا مەكتەپتەگى ءدىن ماسەلەسى دە ۋشىعىپ تۇر. جىل سايىن مينيسترلىك وقۋشىلاردىڭ حيدجاب كيۋى، ناماز وقۋى سەكىلدى ماسەلەلەردە سىنعا قالادى.
