"كروكۋس سيتي حوللداعى" شابۋىلدان كەيىن ماسكەۋ ميگراسيالىق زاڭدارىن تاعى كۇشەيتپەك. ازاتتىق ءمالىم ەتكەندەي، رەسەيدەگى قىرعىزستاندىقتار كوشەدە، ۇيدە تەكسەرۋلەردىڭ كوبەيگەنىن، ورتالىقازيالىقتارعا كوزقاراس وزگەرگەنىن ايتادى، دەپ حابارلايدى Dalanews.kz.
قىرعىز پارلامەنتى ميگرانتتاردىڭ سوڭعى جاعدايىنا دا ءمان بەرىپ، ارنايى تالقىلادى.
تىلەك (اتى وزگەرتىلدى) رەسەيدە "قارا تىزىمدە" ەكەنىن، وعان بۇل ەلگە ءومىر بويى كىرۋگە تىيىم سالىنعانىن جاقىندا بىلگەن. رەسەيدە جۇمىس ىستەپ كەلىپ، قىرعىزستانعا بارىپ، كەرى قايتقاندا ونى كىرگىزبەگەن.
"مەن ساحاروۆوعا اناليز تاپسىرۋعا بارعام. ناتيجەسى جاقسى بولدى. قىرعىستانعا كەلىپ، قايتادان رەسەيگە بارا جاتقانىمدا، مەنى كەرى قايتاردى. مەن ول جاقتا ەشقانداي زاڭ بۇزعان ەمەسپىن. زاڭگەرلەرگە قايرىلسام، ولار رەسەيگە ءومىر بويى كىرۋگە شەكتەۋ قويىلعانىن مالىمدەدى. دەنساۋلىعىما بايلانىستى مەنى كىرگىزبەيدى ەكەن" دەدى تىلەك.
جاقىندا ەكى پوليسيا مايرامنىڭ ۇيىنە باسا-كوكتەپ كىرىپ، قۇجاتتارىن تەكسەرگەن. ماسكەۋدە جۇمىس ىستەيتىن ول پوليسيا مەترودا وتە كوپ ەكەنىن جەتكىزدى.
ساعىن ماسكەۋدە اۆتوبۋس جۇرگىزەدى.
"كوشەگە شىعۋدان قالدىق. كوبىندە تاجىكتەردى ۇستاپ جاتىر. ولاردىڭ كوبى ساقالىن قىرىپ جۇرەتىن بولدى. كوشەدە تەكسەرۋلەر وتە كوپ"، - دەيدى ساعىن.
ميگرانتتارمەن جۇمىس ىستەيتىن زاڭگەر ميرلان توكتوبەكوۆتىڭ ايتۋىنشا، "كروكۋس سيتي حوللداعى" وقيعادان كەيىن ولارعا كومەك سۇراپ كەلىپ جاتقانداردىڭ سانى بەس ەسەگە كوبەيگەن.
رەسەيدەگى ميگرانتتاردىڭ جاعدايى جوگوركۋ كەڭەشتە كوتەرىلدى. ميگرانتتار جاعدايى تۋرالى سىرتقى ىستەر ءمينيسترىنىڭ ورىنباسارى الماز يمانگازييەۆ اقپارات بەردى.
ونىڭ سوزىنشە، "كروكۋس سيتي حوللداعى" شابۋىلدان كەيىن ءتۇرلى سەبەپتەرمەن 69 قىرعىزستاندىق رەسەي اۋماعىنا كىرگىزىلمەگەن.
