«ءبىر جينالىس بولدى، شىنى كەرەك. مىنە، مىرزاتاي (جولداسبەكوۆ – اۆت.) اعامىز وتىردى، نۇرلان ورازالين وتىردى. مەنىڭ كوللەگام (ءبىلىم جانە عىلىم ءمينيسترى – اۆت.) وتىردى. (اعالالار – اۆت.) جالىنىپ تۇرىپ ايتتى، وسى ءۇش تىلدىكتى اسىقپايىقشى دەپ، قازاق ءتىلى مەن قازاق ادەبيەتىن ازىرشە قوسپايىقشى، تۇرا تۇرايىق دەپ. الدىمەن فيلولوگيانى رەتتەپ الايىق. ادەبيەتتى...ءبىر ساعات ەكەۋى ەكى جاقتان جالىندى. جوق، قويماي، ەندىگى اپتادا زاڭ قابىلدايمىن، سۇيتەم-بۇيتەم دەدى. ءقازىر ەندى كورىپ تۇرسىزدار، ەلباسى ءۇش تىلدىكتى دە توقتاتتى، 12 جىلدىق بار، جازدىق كانيكۋل بار. ارينە، ويى دۇرىس. ءبىراق سونى اقىلداسپاي شەشەمىن دەگەنى كەرى اسەرىن تيگىزىپ جاتىر»، - دەگەن بولاتىن ا.مۇحامەدي ۇلى.
بۇگىن حالىق الدىنداعى ەسەپ بەرۋ كەزدەسۋىنەن كەيىن جۋرناليستەرگە سۇحبات بەرگەن ا.مۇحامەدي ۇلى سوزىنەن جاڭىلىسىپ كەتكەنىن مويىنداپ، ءۇش ءتىلدى وقىتۋ جۇيەسى تالقىلانعان جينالىستا ءبىلىم جانە عىلىم ءمينيسترىنىڭ بولماعانىن جەتكىزدى.
«ول...ءبىز...ادەبيەتتە...كەزدەسۋىمىز بولدى. ەندى، شىن ايتقاندا، ول ۇلكەن كەزدەسۋ بولدى. بۇل جەردە، بىلايشا ايتقاندا، ءبىلىم جانە عىلىم مينيسترلىگىنىڭ...ۇلكەن...نەسى..ەندى، بۇل وبرازدىق بولدى. دەپۋتاتتارمەن وتىرعاندا ءبىز ويلادىق ول كىسى (ءبىلىم جانە عىلىم ءمينيسترى – اۆت.) دە وتىرعان دەپ. بىلاي كەلگەندە...ول جەردە ءبىلىم جانە عىلىم ءمينيسترى جوق بولدى. ەندى، مەن ول جەردە، بىلايشا ايتقاندا، قاتەلىك جىبەردىم... جوق، ونى نەعىپ تۇرعانىم، بىزدە ۇلكەن جينالىس بولدى. بىزگە (ءبىلىم جانە عىلىم ءمينيسترى – اۆت.) وتىر دەپ ايتتى. ەندى ۇلكەن زال، قاراعان جوقپىز. نەگىزى، ءبىزدىڭ اكادەميكتەرىمىزدىڭ سونداي ۇسىنىستارى بولدى. قازىرگى كەزدە قازاق ءتىلى مەن ادەبيەتتى بىرىكتىرمەيىك دەگەن...نۇرلان ورازالين، مىرزاتاي جولداسبەكوۆ وسى جەردە... سۇراساڭىزدار بولادى»، - دەدى ا.مۇحامەدي ۇلى.
سونداي-اق مينيستر پرەزيدەنتتىڭ ءۇش ءتىلدى وقىتۋ جۇيەسىن توقتاتتى دەگەن سوزىنە تۇسىنىكتەمە بەردى. وسى ورايدا ول الدىمەن پرەزيدەنتتىڭ ءۇش ءتىلدى وقىتۋ باستاماسىنا قاتىستى ءسوزىن كەلتىرگەندى ءجون كوردى.
«ءبىلىم جانە عىلىم مينيسترلىگىنىڭ ءۇش ءتىلدى وقىتۋ مەن وقۋ جىلىن ۇزارتۋعا قاتىستى ادامداردىڭ سۇراقتارى كوپ ەكەنىن بىلەمەن. وسىعان بايلانىستى ۇكىمەتكە قوعامدىق پىكىردى جان-جاقتى زەردەلەپ شىعىپ، تامىز كەڭەسىن وسى ماسەلەنى تالقىلاۋ الاڭى رەتىندە پايدالانۋدى تاپسىرامىن. مەنىڭشە، جۇمىس دۇرىس باعىتتا اتقارىلىپ جاتىر»، - دەگەن بولاتىن ن.نازاربايەۆ.
«دەمەك، ەلباسىنىڭ ايتۋىنشا، ءبىز تامىز كەڭەسى ارقىلى ءۇش تىلدىكتى ازىرشە ويلاستىرۋمىز قاجەت. مەن سوزبە-سوز بولعان زاتتى ايتتىم»، - دەدى ول.
ايتا كەتكەن ءجون، مينيستر ا.مۇحامەدي ۇلى ءۇش ءتىلدى وقىتۋ ماسەلەسىنەن كەيىن حالىقتىڭ كوڭىلى وزگەرىپ كەتتى دەگەن سوزىنەن دە باس تارتقان جوق. بۇعان دەيىن ول: «ءتىل ساياساتىن دامىتۋ وڭاي ەمەس. شىنىن ايتۋ كەرەك، جەر ماسەلەسى قوزعالاردىڭ الدىندا ءۇش تىلدىككە قاتىستى قوزعالىس بولعان. سول كەزدەن باستاپ ءوزىمىز يكەمسىز قيمىلىمىزبەن حالىقتىڭ كوڭىلىن ءبىرشاما وزگەرتىپ الدىق دا، ونىڭ ۇستىنە جەر تۋرالى كودەكستى كىرگىزدىك. سونىمەن ءقازىر مۇلدەم ىڭعايسىز جاعدايدا وتىرمىز»، - دەپ ايتقان.
دەرەككوز: baq.kz
