اتقارىلعان جۇمىس بارىسىمەن الماتى وبلىسى اكىمىنىڭ ورىنباسارى ارسلان داندىبايەۆ تانىسىپ شىقتى. اقىننىڭ مۇراجايى 1991 جىلى اشىلعان. عيمارات جوندەۋدەن وتكەننەن كەيىن ىشكى زالدارى جاڭاردى. جەر توسەنىشتەر مەن جارىق بەرۋشى شامدار تەگىستەي جاڭاسىنا اۋىستىرىلعان.
ىرگەلەس اۋماقتا جاسىل جەلەكتەردى سۋارۋدىڭ جەراستى زاماناۋي جۇيەسى سالىنعان. مۇراجايدىڭ اينالاسىنداعى قورشاۋلار بويالىپ، جاقىن ماڭداعى ساياباقتا دەمالۋعا ارنالعان ورىندىقتار جاڭارتىلعان. شاتىردى جوندەۋ ماسەلەسى شەشىلۋدە.
بۇگىنگى تاڭدا مۇراجايدا مۇقاعالي ماقاتايەۆتىڭ ءومىرى مەن شىعارماشىلىعىنا تىكەلەي قاتىسى بار 800 جۋىق زاتتار مەن قۇجاتتار بار. ولاردىڭ قاتارىندا ونىڭ جەكە قولجازبالارى، كيىمدەرى، كەڭسە زاتتارى، جۇمىس جيھازى، تۇرمىستىق كەرەك-جاراقتار، كۇندەلىكتەر سىندى قۇندى جادىگەرلەر بار.
قىركۇيەك ايىندا مۇندا كوپتەگەن سالتاناتتى ءىس-شارالار وتكىزۋ جوسپارلانعان.
مۇراجاي ديرەكتورى ەرلىك احمەتوۆتىڭ ايتۋىنشا، بۇل ادەبي-مەموريالدىق مۇراجاي بيىلعى كۇزدە مەرەيتويلىق سالتاناتتاردىڭ ورتالىعىنا اينالادى.
– ءبىزدىڭ مۋزەي اۋدان ورتالىعى – نارىنقول اۋىلىنان الپىس شاقىرىم جەردە ورنالاسقان جانە ۇلى ءمۇقاعاليدىڭ التىن مۇراسىنىڭ بىرەگەي قويماسى بولىپ تابىلادى. وسى جىلدار ىشىندە ونداعى ەكسپوناتتار سانى ۇنەمى ءوسىپ كەلەدى. بۇگىنگى وسكەلەڭ ۇرپاقتىڭ، مەكتەپ وقۋشىلارىنىڭ تۋعان جەرگە دەگەن سۇيىسپەنشىلىگىن جىرلاعان اقىننىڭ ءومىر تاريحىن بىلۋگە ۇمتىلاتىنى قۋانتادى، – دەدى ول.
