قاسىم-جومارت توقايەۆ ۇستازدار قاۋىمىن كاسىبي مەرەكەسىمەن قۇتتىقتاپ، اسا جاۋاپتى ءارى قاستەرلى مىندەتتى ابىرويمەن اتقارىپ جۇرگەن پەداگوگتەرگە العىس ايتتى. سونىمەن قاتار ەلىمىزدەگى وقۋ-اعارتۋ سالاسىن دامىتۋ جولىندا جۇزەگە اسىرىلىپ جاتقان اۋقىمدى جۇمىستارعا توقتالدى، دەپ حابارلايدى Dalanews.kz.
"مەنىڭ تاپسىرماممەن "پەداگوگ مارتەبەسى تۋرالى" ارنايى زاڭ قابىلداندى. بۇل قۇجات ۇستازداردىڭ زاڭدى مۇددەسى مەن قۇقىقتارىن قورعاۋعا ىقپال ەتتى. ءقازىر مۇعالىمدەر مەن تاربيەشىلەردىڭ جالاقىسى ايتارلىقتاي كوبەيدى. ولار نەگىزگى قىزمەتىنە كەدەرگى كەلتىرەتىن ارتىق مىندەتتەردەن بوساتىلدى. وسى زاڭعا سايكەس "قازاقستاننىڭ ەڭبەك سىڭىرگەن ۇستازى" اتاعى ەنگىزىلدى. بۇل – جاي اتاق ەمەس، مارتەبەلى مەملەكەتتىك ناگرادا. ونىڭ يەگەرىنە قوماقتى سىياقى بەرىلەدى. رەسپۋبليكا بويىنشا 46 ءمۇعالىم وسى ناگراداعا يە بولدى. سونداي-اق ءقازىر ۇستازدارعا اكادەميالىق دارەجەسىنە سايكەس ۇستەمەاقى تولەنىپ جاتىر. حالىقارالىق وليمپيادا جۇلدەگەرلەرىن دايىنداعان مۇعالىمدەرگە قارجىلاي قولداۋ كورسەتىلەدى. پەداگوگ ماماندىعى بويىنشا وقىپ جاتقان ستۋدەنتتەردىڭ شاكىرتاقىسى 2،5 ەسە كوبەيدى. بيىل بولاشاق ۇستازداردى دايارلاۋ ءۇشىن 16 مىڭعا جۋىق گرانت ءبولىندى. سونىڭ ىشىندە شامامەن 1800 "التىن بەلگى" يەگەرى پەداگوگيكا ماماندىعىن تاڭدادى. بۇل – وتە جاقسى ءۇردىس"، – دەدى قاسىم-جومارت توقايەۆ.
پرەزيدەنت ەلىمىزدە ءبىلىم سالاسىنداعى ۇزدىك مامانداردى، ياعني ناعىز كوشباسشىلاردى ىرىكتەۋ جوباسى جۇزەگە اسىرىلىپ جاتقانىنا توقتالدى. ءقازىردىڭ وزىندە اتالعان جوباعا قاتىسقان 134 پەداگوگ مەكتەپ ديرەكتورى بولىپ تاعايىندالعان. بۇدان بولەك، مەملەكەت باسشىسى ءبىلىم ساپاسىن ارتتىرۋ، بالالاردى ۇيلەسىمدى جانە جان-جاقتى دامىتۋ ءۇشىن مەملەكەت تاراپىنان قولعا الىنعان جۇيەلى شارالارعا نازار اۋداردى.
"جايلى مەكتەپ" ۇلتتىق جوباسى اياسىندا كەلەسى جىلى 460 مىڭنان استام بالاعا ارنالعان 217 جاڭا مەكتەپ سالۋ جوسپارلانعان. ولار زاماناۋي تالاپتارعا ساي جابدىقتالعان وزىق ءبىلىم وشاعى بولادى. مەكتەپتەردە ەرەكشە قاجەتتىلىكتەرى بار بالالاردىڭ كەدەرگىسىز ءبىلىم الۋىنا قولايلى جاعداي جاسالادى. اتالعان اۋقىمدى جوبا ءۇش اۋىسىمدى مەكتەپتەر ماسەلەسىن شەشۋگە، قالا مەن اۋىل مەكتەپتەرىندەگى ءبىلىم الشاقتىعىن ازايتۋعا مۇمكىندىك بەرەدى. بۇدان بولەك، ەلىمىزدە جىل سايىن كەمىندە مىڭ مەكتەپتىڭ عيماراتىنا جاڭعىرتۋ جۇمىستارى جۇرگىزىلەدى. ءبىلىم بەرۋ پروسەسىن سيفرلاندىرۋعا باسا نازار اۋدارىلادى. بارلىق مەكتەپتى جىلدامدىعى جوعارى ينتەرنەتكە قوسۋ بويىنشا كەشەندى جۇمىس قولعا الىنادى. قوسىمشا ءبىلىم بەرۋگە ەرەكشە ءمان بەرىلەدى. ونىڭ اياسىندا ءۇش ميلليوننان اسا ادامدى قامتۋ جوسپارلانىپ وتىر. بيىل وتاندىق مەكتەپتەردىڭ وقۋشىلارى حالىقارالىق وليمپيادالاردان 360-تان استام مەدال جەڭىپ الدى. بۇل – ۇستازدارىمىزدىڭ جانكەشتى ەڭبەگى مەن كاسىبيلىگىنىڭ جەمىسى"، – دەدى مەملەكەت باسشىسى.
پرەزيدەنت ۇلاعاتتى ۇستازدار تۇتاس ۇلتتى تاربيەلەيتىنىن اتاپ ءوتىپ، جاستاردىڭ بويىنا ادال ازاماتقا ءتان قاسيەتتەردى ءسىڭىرۋ وتە ماڭىزدى ەكەنىن جەتكىزدى
"وقۋشىلاردى ءبىلىمپازدىققا، وتانشىلدىققا، ەڭبەكقورلىققا باۋلۋ قاجەت. ارينە، قازىرگى زاماندا بۇل وڭاي شارۋا ەمەس. سوڭعى كەزدە ينتەرنەتتىڭ تەرىس باعىتتاعى شىرماۋىنا تۇسكەن جاستار كوبەيىپ كەتتى. ءبىز بالالاردى ءتۇرلى قاتەردەن قورعاي ءبىلۋىمىز كەرەك. وسىعان بايلانىستى ناقتى شارالار قابىلدانىپ جاتىر. مەنىڭ تاپسىرماممەن «ءبىرتۇتاس تاربيە» اتتى ارنايى باعدارلاما دايىندالدى. بۇل قۇجاتتا ۇلتتىق قۇرىلتايدا ايتىلعان ۇسىنىس-پىكىرلەر ەسكەرىلدى. مەكتەپتەردە اتا-انالاردى پەداگوگيكالىق قولداۋ ورتالىقتارى اشىلدى"، – دەدى مەملەكەت باسشىسى.
قاسىم-جومارت توقايەۆ سانالى ۇرپاق تاربيەلەۋ ىسىنە ۇستازدارمەن بىرگە اتا-انالار دا اتسالىسۋى قاجەت دەپ سانايدى. بۇل ورايدا، پرەزيدەنت مۇعالىمدەردىڭ پاندەميا، سۋ تاسقىنى كەزىندە وقۋ ۇدەرىسىن توقتاتپاي، مىندەتىن ادال اتقارىپ، ەلگە جاناشىرلىق تانىتقانىن مىسال ەتتى.
"ءمۇعالىمنىڭ مارتەبەسى قاشاندا بارىنەن بيىك. ۇلى تۇلعالاردىڭ ءوزى ۇستازىنىڭ الدىندا شاكىرت بولىپ قالا بەرەدى. ءبىر سوزبەن ايتساق، بارشا جەتىستىكتىڭ باستاۋىندا ۇستاز تۇر. ۇلتتىڭ بولاشاعى – ۇستازدىڭ قولىندا. مەنىڭ ماقساتىم – ۇستازدى قوعامىمىزدىڭ باستى كەيىپكەرى رەتىندە دارىپتەۋ. سەبەبى سىزدەر بالا وقىتۋ ارقىلى كەلەشەكتىڭ كىرپىشىن قالايسىزدار. قازاقستاننىڭ دامىعان ەل بولۋىنا زور ۇلەس قوسىپ جۇرسىزدەر. سىزدەردىڭ تاباندى ەڭبەكتەرىڭىز ەرەكشە قۇرمەت پەن جوعارى ماراپاتقا لايىق"، – دەدى پرەزيدەنت.
مەملەكەت باسشىسى قازاقستاننىڭ تۇكپىر-تۇكپىرىندە ەڭبەگى ەرەن مۇعالىمدەر جەتكىلىكتى ەكەنىن اتاپ ءوتىپ، الداعى ۋاقىتتا ولار دا نازاردان تىس قالمايتىنىن ايتتى.
"ۇستازدار اۋلەتىنە ايرىقشا ءمان بەرىلەدى. بۇگىن مەن ءبىلىم بەرۋ ىسىندە 350 جىل ەڭبەك ءوتىلى بار اسىلايەۆتار وتباسى تۋرالى ماقالانى وقىدىم. ولار اباي وبلىسىندا تۇرادى ەكەن. مۇنداي ونەگەلى اۋلەتتەر ەلىمىزدە كوپ دەپ ويلايمىن"، – دەدى قاسىم-جومارت توقايەۆ.
جيىن سوڭىندا مەملەكەت باسشىسى ءبىلىم بەرۋ ىسىندەگى اسا ۇزدىك جەتىستىكتەرى جانە قازاقستان رەسپۋبليكاسىنا سىڭىرگەن ايرىقشا ەڭبەگى ءۇشىن ءبىر توپ پەداگوگكە "قازاقستاننىڭ ەڭبەك سىڭىرگەن ۇستازى" اتاعىن تاپسىردى.
