بيىل قاڭتاردان قىركۇيەكتىڭ ورتاسىنا دەيىن پەداگوگيكالىق سالاداعى مەدياندىق ۇسىنىلعان جالاقى 250 877 تەڭگە بولدى. بۇل وتكەن جىلعى دەڭگەيدەن (240 622 تەڭگە) 4،3% جوعارى دەيدى HeadHunter ساراپشىلارى، دەپ حابارلايدى Dalanews.kz.

جۇمىس ىزدەۋشىلەر كۇتكەن مەدياندىق جالاقى 250 377 تەڭگەنى كورسەتكەن. بۇل وتكەن جىلمەن سالىستىرعاندا 1،2% كوپ. وسىلايشا، پەداگوگتاردىڭ سۇرانىسى مەن جۇمىس بەرۋشىلەردىڭ مۇمكىندىكتەرى ءىس جۇزىندە سايكەس كەلىپ وتىر.

مەدياندىق جالاقى – بارلىق جۇمىس ورىندارىن ەكى تەڭ بولىككە بولەتىن كورسەتكىش: 50%-ى وسى مولشەردەن تومەن، ال قالعان 50%-ى جوعارى تولەنەدى.

ساراپشىلاردىڭ دەرەگىنشە، جاريالانعان بوس ورىندار سانى 7،7%-عا وسكەن. بۇل ءبىلىم بەرۋ سالاسىندا ماماندارعا دەگەن سۇرانىستىڭ ارتقانىن كورسەتەدى. ال تۇيىندەمەلەر سانى كەرىسىنشە، 1،4%-عا ازايعان. سونىڭ ناتيجەسىندە باسەكەلەستىك يندەكسى 5،9-عا ءتۇستى: ەندى ءبىر بوس ورىنعا شامامەن التى ۇمىتكەردەن كەلەدى.

ەڭ كوپ بوس ورىندار مەن تۇيىندەمەلەر الماتى مەن استاناعا تيەسىلى. الماتىدا جۇمىس بەرۋشىلەردىڭ مەدياندىق بەلسەندىلىگى 7%-عا، استانادا 15%-عا وسكەن. تارازدا بوس ورىندار سانى 34%-عا ارتسا، اقتاۋدا كەرىسىنشە 19%-عا تومەندەگەن.