بۇگىن بقو وڭىرلىك كوممۋنيكاسيالار قىزمەتىنىڭ الاڭىندا وبلىستاعى جانۋ-جاعارماي نارىعىنداعى قالىپتاسقان جاعداي تۋرالى بريفينگ ءوتتى. بريفينگكە ق ر ۇلتتىق ەكونوميكا مينيسترلىگىنىڭ تابيعي مونوپوليالاردى رەتتەۋ، باسەكەلەستىكتى جانە تۇتىنۋشىلاردىڭ قۇقىقتارىن قورعاۋ كوميتەتى بقو بويىنشا دەپارتامەنتىنىڭ باسشىسى م.وسپانوۆ قاتىستى.



2015 جىلى حالىق تاراپىنان ۇلكەن سۇرانىسقا يە اي-92 ماركالى بەنزينگە مەملەكەتتىك رەتتەۋ جويىلىپ، باعا بوساتىلعان بولاتىن. سول ۋاقىتتان باستاپ ونىڭ قۇنى نارىقتاعى ۇسىنىس پەن سۇرانىسقا ساي بەلگىلەنىپ وتىر. الايدا، بۇل باعانىڭ شامادان تىس وسۋىنە جول بەرىلەدى دەگەن ءسوز ەمەس.  م.وسپانوۆتىڭ  ايتۋىنشا، كۇنى بۇگىن وبلىستا جانارماي باعاسىنىڭ (اي-92، 95 ماركالى بەنزين) بەلگىلى ءبىر دەڭگەيدە جوعارىلاۋىنا قاتىستى تالداۋ، تەكسەرۋ جۇمىستارى جۇرگىزىلۋدە. نەگىزگى نازار – جانارمايدى كوتەرمە باعامەن اكەلەتىن تاسىمالداۋشىلاردىڭ ءوزارا ءسوز بايلاسۋىنا جول بەرمەۋگە اۋدارىلۋدا.

– مونوپولياعا قارسى زاڭدىلىقتى بۇزعان سۋبەكتىلەرگە سالىنعان بارلىق اكىمشىلىك ايىپپۇلداردىڭ مولشەرى 380 ملن. تەڭگە. ءدال قازىرگى تاڭدا 6 سۋبەكتىگە قاتىستى تەكسەرۋ باستالدى. ال ەندى جانارماي نارىعىنا توقتالار بولساق، باعانىڭ شامادان تىس وسۋىنە جول بەرگەن «موسكۆيچي» (بوكەي ورداسى اۋدانىنداعى وسى كاسىپورىننىڭ جانارماي قۇيۋ بەكەتىندە اي-92 ماركالى بەنزين باعاسى ليترىنە 200 تەڭگەگە جەتكەن) بەكەتتەرىنە قاتىستى ارنايى حابارلاما  جىبەرىلدى. حابارلاما قولعا تيگەننەن كەيىن 10 جۇمىس كۇنى ىشىندە جانارماي قۇيۋ مەكەمەسىنىڭ باسشىلىعى كەمشىلىكتەردى جويۋى ءتيىس. كەمشىلىك جويىلماسا، زاڭ اياسىندا شارالار قولدانىلادى، – دەدى ءوز سوزىندە م.وسپانوۆ.