"اۋىل" پارتياسىنىڭ، ق ر پارلامەنت ءماجىلىسىنىڭ اگرارلىق ماسەلەلەر كوميتەتىنىڭ ءتوراعاسى سەرىك ەگىزبايەۆ "ۋادە" جوباسىنا بەرگەن سۇحباتىندا اۋىل شارۋاشىلىعى سالاسىنداعى بىلىقتى اشكەرەلەدى، – دەپ حابارلايدى Dalanews.kz.
اگرارلىق ماسەلەلەر كوميتەتىنىڭ ءتوراعاسىنىڭ سوزىنشە، ءقازىر اۋىل شارۋاشىلىعى مينيسترلىگىندە وتە جاقسى كوماندا جۇمىس ىستەپ جاتىر.
"ايداربەك سەيپىل ۇلى ءوزى باسقارىپ، سەرىك ماقاش ۇلى قولداپ، ءبىز وتىرىپ، بىرلەسكەن ۇسىنىس دايىندادىق. ءبىزدىڭ اگرارلىق كوميتەتتە ءتورت پارتيانىڭ وكىلدەرى بار: حالىقتىق پارتيا، رەسپۋبليكا، امانات جانە دە اۋىل. ءبىز ۇسىنىستار دايىندادىق. مەن ەفيردە اشىق ايتىپ وتىرمىن. ايداربەك سەيپىل ۇلى مىرزا پرەزيدەنتتىڭ قابىلداۋىندا بولدى. سول كەزدە ەسىڭىزدە بولسا، ول ءبىر ستاتيستيكانىڭ ماسەلەسىن كوتەردى. جالعان ستاتيستيكانى. مەملەكەت باسشسىسى وتىرىك ستاتيستيكانى كورگەندە تاڭعالعان.
ميلليونداعان توننا ءسۇت، ميلليونداعان توننا كوكونىس، ميلليونداعان توننا استىق، ءبارى - وتىرىك. جوق. جالعان ستاتيستيكا ءۇشىن جازالاۋ دەگەن ۇسىنىسپەن كەلىسەمىن"، - دەدى ول.
سەرىك ەگىزبايەۆ جۋىردا كارتوپ جونىندە ۇكىمەتتىڭ وتىرىسى وتكەنىن ەسكە سالدى. سول كەزدە دە وسىنداي جالعان دەرەكتەر انىقتالعان.
"ءجۇز ەسە كارتوپ قورىن وتىرىك (جاساعان - ەسك.). 20 توننا بار كارتوپتان 2000 توننا كارتوپ جاتىر دەپ جازعان. "كارتوپتىڭ باعاسى نەگە ءورشىپ كەتتى؟" دەپ ۇكىمەتتە قارالدى. بۇكىل وڭىردە مىڭداعان توننا جوق كارتوپتى جازىپ قويعان. نەگە ولاي ىستەيدى؟ نەگە قورىقپايدى؟ سەبەبى جالعان ستاتيستيكا ءۇشىن جازاعا تارتىلمايدى.
ءبىزدىڭ ارامىزدا كەزىندە ءىرى شارۋا قوجالىقتارىن باسقارىپ كەلگەن ارىپتەستەرىمىز (ماجىلىستە - ەسك.) بار. "اۋدان اكىمدەرى كەلەدى دە، ونىمدىلىكتى قوسىپ جاز، قوسىپ جاز" دەپ ايتادى دەيدى. "20 سەنتنەر ءونىم السا، 30 سەنتنەر دەپ جاز" دەپ ايتادى دەيدى. وكىنىشكە قاراي، ول ءالى كۇنگە دەيىن باسىلعان جوق.
كەشە عانا وسىنى تالقىلادىق. نەگە ولاي ىستەيدى دەسەك، ونىڭ ارعى جاعىندا مۇددە تۇر ەكەن. مىسالى سولتۇستىكتە ءبىر شارۋاشىلىقتى ايتتى، "ول ءومىر باقي ونىمدىلىكتى 10 سەنتنەردەن اسىرعان جوق" دەيدى. ءبىراق جىلدا "30، 40 سەنتنەر الدىم" دەپ جازادى دەيدى. "سوسىن كولەڭكەلى يمپورتتى رەسەيدەن الىپ كەلەدى دە، سونى قازاقستاننىڭ استىعى رەتىندە ساتادى" دەيدى. بۇل - ءبىزدىڭ ەكونوميكامىزعا زيان. رەسەيدىڭ جەرىنەن الىپ كەلىپ، ول ءۇشىن تاعى سۋبسيديا الادى. ول ءۇشىن مەملەكەتتەن كومەك الادى. ول تەك ءبىر مىسال ەمەس، وكىنىشكە قاراي، كوپ"، - دەدى "اۋىل" پارتياسىنىڭ ءتوراعاسى.
