قازاقستان مۇسىلماندارى ءدىني باسقارماسى (قمدب) كەيبىر بۇقارالىق اقپارات قۇرالدارى مەن ينتەرنەت-رەسۋرستار تاراپىنان تانىمال ۆيدەويىندارعا بايلانىستى قوعامدا جاڭساق پىكىر قالىپتاستىراتىن بۇرمالانعان اقپارات تاراتىلعانىن مالىمدەدى، دەپ حابارلايدى Dalanews.kz.

بۇعان دەيىن الەۋمەتتىك جەلىلەردە قمدب Minecraft، GTA، CS2، Dota سىندى كەڭ تانىلعان ويىنداردى يسلام شاريعاتىنا قايشى دەپ تانىدى دەگەن حابارلاما تاراعان ەدى.

الايدا قمدب بۇل اقپاراتتى جوققا شىعارىپ، يسلامدا ادامنىڭ وي-ساناسىن تىنىقتىرىپ، دەمالۋىنا كومەكتەسەتىن پايدالى ويىندارعا رۇقسات ەتىلەتىنىن اتاپ ءوتتى.

قمدب وكىلدەرىنىڭ ايتۋىنشا، ەگەر بەلگىلى ءبىر شارتتار ورىندالسا، PlayStation نەمەسە كومپيۋتەرلىك ويىندار ويناۋعا تىيىم سالىنبايدى. اتاپ ايتقاندا، مىنا تالاپتار ەسكەرىلۋى ءتيىس:

• ويىن قۇلشىلىقتى كەشىكتىرۋگە نەمەسە مۇلدە توقتاتۋعا سەبەپ بولماۋى كەرەك؛

• ويىن قۇرامىندا قۇمارلىق پەن تاۋەلدىلىك ەلەمەنتتەرى بولماۋى ءتيىس؛

• ويىن مازمۇنى ادامنىڭ لوگيكاسىن، زياتكەرلىگىن دامىتۋعا ىقپال ەتۋى قاجەت؛

• ويىن ۋاقىتى شەكتەن تىس بولماۋى كەرەك – ادامنىڭ نەگىزگى مىندەتتەرى: وقۋ، جۇمىس، وتباسى الدىنداعى جاۋاپكەرشىلىگى ءبىرىنشى ورىندا تۇرۋى ءتيىس؛

• پسيحيكاعا، مىنەزگە، رۋحاني دۇنيەگە زيان تيگىزبەۋى شارت؛

• ادەپ ساقتالىپ، بەيادەپ سوزدەردەن، بالاعاتتان اۋلاق بولۋ قاجەت؛

• ويىن ىشىندە زورلىق-زومبىلىقتى، قىلمىستى، ءدىندى قورلاۋ مەن ارسىزدىقتى ناسيحاتتايتىن ەلەمەنتتەر بولماۋى كەرەك.

"ەلەكتروندى ويىندارعا دۇرىس نيەتپەن، بەلگىلى تارتىپپەن قاراپ، اتالعان شارتتار ساقتالعان جاعدايدا رۇقسات بەرىلەدى. الايدا ءدىندى مازاق ەتەتىن، ونى جوققا شىعاراتىن نەمەسە دىنگە قارسى باعىتتاعى ويىندار — شاريعات بويىنشا قاتاڭ تۇردە تىيىم سالىنعان"، – دەپ اتاپ ءوتتى قمدب.

سونداي-اق ءدىني باسقارما قانداي دا ءبىر “تىيىم سالىنعان ويىنداردىڭ” ناقتى ءتىزىمىن جاريالاماعانىن رەسمي تۇردە حابارلادى. دەمەك، جەلىدە تاراعان اقپارات شىندىققا جاناسپايدى.