Qazaqstan musylmandary dini basqarmasy (QMDB) keibir buqaralyq aqparat quraldary men internet-resýrstar tarapynan tanymal videoiyndarǵa bailanysty qoǵamda jańsaq pikir qalyptastyratyn burmalanǵan aqparat taratylǵanyn málimdedi, dep habarlaidy Dalanews.kz.
Buǵan deiin áleýmettik jelilerde QMDB Minecraft, GTA, CS2, Dota syndy keń tanylǵan oiyndardy islam shariǵatyna qaishy dep tanydy degen habarlama taraǵan edi.
Alaida QMDB bul aqparatty joqqa shyǵaryp, Islamda adamnyń oi-sanasyn tynyqtyryp, demalýyna kómektesetin paidaly oiyndarǵa ruqsat etiletinin atap ótti.
QMDB ókilderiniń aitýynsha, eger belgili bir sharttar oryndalsa, PlayStation nemese kompiýterlik oiyndar oinaýǵa tyiym salynbaidy. Atap aitqanda, myna talaptar eskerilýi tiis:
• oiyn qulshylyqty keshiktirýge nemese múlde toqtatýǵa sebep bolmaýy kerek;
• oiyn quramynda qumarlyq pen táýeldilik elementteri bolmaýy tiis;
• oiyn mazmuny adamnyń logikasyn, ziiatkerligin damytýǵa yqpal etýi qajet;
• oiyn ýaqyty shekten tys bolmaýy kerek – adamnyń negizgi mindetteri: oqý, jumys, otbasy aldyndaǵy jaýapkershiligi birinshi orynda turýy tiis;
• psihikaǵa, minezge, rýhani dúniege ziian tigizbeýi shart;
• ádep saqtalyp, beiádep sózderden, balaǵattan aýlaq bolý qajet;
• oiyn ishinde zorlyq-zombylyqty, qylmysty, dindi qorlaý men arsyzdyqty nasihattaityn elementter bolmaýy kerek.
"Elektrondy oiyndarǵa durys nietpen, belgili tártippen qarap, atalǵan sharttar saqtalǵan jaǵdaida ruqsat beriledi. Alaida dindi mazaq etetin, ony joqqa shyǵaratyn nemese dinge qarsy baǵyttaǵy oiyndar — shariǵat boiynsha qatań túrde tyiym salynǵan", – dep atap ótti QMDB.
Sondai-aq Dini basqarma qandai da bir “tyiym salynǵan oiyndardyń” naqty tizimin jariialamaǵanyn resmi túrde habarlady. Demek, jelide taraǵan aqparat shyndyqqa janaspaidy.
