بايقاۋعا قاتىسقان وزگە وتباسىلار اراسىندا شىعارماشىلىق وتباسىلار، كوپبالالى وتباسىلار، ونىڭ ىشىندە، مۇعالىمدەر، دارىگەرلەر، مەحانيزاتورلار، سپورتشىلار، كاسىپكەرلەر وتباسالار دا بولدى.
ماراپاتتاۋ سالتاناتى بايقاۋعا ءار اۋدان، قالالاردان قاتىسقان وتباسىلار تۋرالى بەينەفيلم كورسەتۋدەن باستالدى. مۇنان سوڭ قۇتتىقتاۋ ءسوز سويلەگەن وبلىس اكىمىنىڭ ورىنباسارى جاقسىلىق ومار وتباسى قۇندىلىعى تۋرالى ايتىپ ءوتتى.
– بۇل بايقاۋ وتباسىلار اراسىنداعى جارىس ەمەس، ەڭ الدىمەن وسىنداي ۇلگى بولارلىق وتباسىلاردىڭ بار ەكەنىن، ولاردى جاستارعا ونەگە ەتۋگە بولاتىنىن كورسەتۋ. وتباسى – مەملەكەتتىڭ تىرەگى. سوندىقتان ەلىمىزدە وتباسىلارعا كوڭىل ءبولىنىپ، مەرەيى اسقان شاڭىراقتاردى كوپتىڭ الدىندا قۇرمەتتەپ، ماراپاتتاۋ يگى داستۇرگە اينالدى. بۇگىنگى كۇنى، ءبىر وكىنىشتىسى، جاس وتباسىلاردىڭ اجىراسۋ فاكتىلەرى ءجيى ورىن الىپ وتىر. سونداي كەلەڭسىزدىكتىڭ الدىن الۋ ءۇشىن، ەكى جاستىڭ ءبىر-بىرىنىڭ الدىنداعى جاۋاپكەرشىلىگىن، وتباسى قۇندىلىقتارىن ءتۇسىنۋى ءۇشىن ۇلگىلى وتباسىلاردى ماقتان ەتىپ، ناسيحاتتاپ وتىرۋىمىز كەرەك، – دەگەن الماتى وبلىسى اكىمنىڭ ورىنباسارى جاقسىلىق ومار ماراپاتتاۋ راسىمىنە كوشتى.
تاعايىندالعان ەكى ءبىرىنشى ورىننىڭ ءبىرىن تالدىقورعاندىق راحىمبەكوۆتار وتباسى يەلەندى. وتاعاسى مىقتىبەك راحىمبەكوۆ مىقتى زاڭگەر، ءبىلىم، رۋحانيات سالالارىندا دەمەۋشىلىك جاساپ جۇرەتىن جومارت جان. «ءبىلىم بەرۋ ءىسىنىڭ ۇزدىگى» اتانعان. جۇبايى قالقا بالجانوۆا دا ءبىلىم بەرۋ سالاسىنىڭ ارداگەرى. ەكەۋى ەكى ۇل، ءۇش قىز تاربيەلەپ، بۇگىندە ولاردىڭ ءارقايسىسى ومىردەن ءوز ورنىن تاپقان.
تاعى ءبىر ءبىرىنشى ورىنعا لايىق دەپ تانىلعان جامبىل اۋدانىنان كەلگەن كارىموۆتار وتباسى كوپ بالالى جانۇيا. ءوزىنىڭ 2 بالاسىنا قوسا 7 جەتىم بالانى ءوسىرىپ، جەتكىزىپ، تاربيەلەپ وتىر. ولار ءبىر شاڭىراق استىندا ءتاتۋ-تاتتى، باۋىرمال بولىپ ءوسىپ كەلەدى. وتاعاسى ءبىرجان – كاسىپكەر. وتاناسى ءاليا ەكونوميست، جۋرناليست جانە ديزاينەر. سال جانە ونكولوگيالىق اۋرۋلارعا شالدىققان بالالارعا قاراجات جيناۋ قورىنىڭ ەرىكتىسى. ەكەۋى بىرلەسىپ UZYN.kz سايتىن قۇرىپ، جۇرگىزىپ وتىر. جەڭىمپازدارعا 1 ملن. تەڭگەدەن اقشالاي سىيلىق جانە ارنايى ديپلومدار بەرىلدى.
ەكىنشى ورىندى قاراسايلىق بەكايدار وتباسى، كوكسۋلىق جۇنىسوۆتەر وتباسى جانە الاكولدىك دۇيسەبايەۆتار وتباسى يەلەندى. ءۇشىنشى ورىن قاراتال اۋدانىنان كەلگەن شالوۆتارعا، ۇيعىر اۋدانىنان توحتاحۋنوۆتارعا، كەگەن اۋدانىنان بوتەيەۆتار وتباسىنا بەرىلدى. جەڭىمپازدارعا 300 مىڭ جانە 250 مىڭ تەڭگەدەن اقشالاي سىيلىق پەن ديپلومدار تابىستالدى.
بۇل بايقاۋدىڭ وبلىستىق تۋرىنا 38 وتباسى ىرىكتەلىپ الىنعان بولاتىن. جۇلدەگە ىلىكپەگەن، ءبىراق سول ىرىكتەلگەندەر قاتارىنداعى وتباسىلاردىڭ بارلىعىنا دا سىي-سياپات كورسەتىلدى. وبلىس اكىمىنىڭ اتىنان بارشا قاتىسۋشىلاردى قۇتتىقتاعان جاقسىلىق ومار جەڭىمپاز اتانعان ەكى وتباسىنىڭ رەسپۋبليكالىق بايقاۋدا توپ جارىپ شىعۋىنا تىلەكتەستىگىن ءبىلدىردى.
جالپى، كونكۋرس العاش وتكىزىلگەن 2014 جىلى بايقاۋعا 172 وتباسى قاتىسسا، بيىلعى جىلى ولاردىڭ سانى 400-دەن اسقان. ەندى «مەرەيلى وتباسى» ۇلتتىق كونكۋرسىندا وبلىستىڭ اتىنان كارىموۆتار مەن راحىمبەكوۆتار وتباسى شىعاتىن بولادى.
