پارتيالىق باقىلاۋ كوميتەتىنىڭ مۇشەسى ءانۋار ءىلياسوۆا اتاپ وتكەندەي، جەلىلەردىڭ توزۋىنا بايلانىستى سۋدىڭ اعىپ كەتۋىنەن كەلگەن شىعىن جىلىنا 16 ملرد تەڭگەگە جۋىقتاعان. پارتيالىقتار جۇرگىزگەن تالداۋ قورىتىندىسى بويىنشا قالالىق جەرلەردەگى توزىعى جەتكەن بارلىق سۋ قۇبىرلار جەلىسىن اۋىستىرۋ ءۇشىن 20 جىل، ال كارىز جەلىلەرىن اۋىستىرۋعا – 40 جىل قاجەت ەكەنى انىقتالدى.
پارتيالىقتاردىڭ پىكىرىنشە، وسىنداي احۋالدىڭ قالىپتاسۋىنا تەك جوسىقسىز مەردىگەرلەر عانا ەمەس، شەنەۋنىكتەر دە كىنالى. مىسالى، تۇركىستان وبلىسى سارىاعاش اۋدانى جىبەك جولى اۋىلىندا گاز تاراتۋ ستانسياسى 2012 جىلى 220 ملن تەڭگەدەن استام قاراجاتقا سالىنعان. نىساندى قابىلداۋ تۋرالى مەملەكەتتىك اكتىگە قول قويىلعان. ءبىر جىل وتكەن سوڭ گاز ينسپەكسياسى كوپتەگەن جونسىزدىكتەردى انىقتاعان، الايدا اۋداندىق شەنەۋنىكتەر، جۇمسارتىپ ايتقاندا، بۇعان قاتىستى كەش قيمىلداپ وتىر.
– قۇرىلىس ءبولىمى تەك 7 جىل وتكەننەن كەيىن، ياعني 2020 جىلعى اقپاندا عانا مەردىگەرگە جونسىزدىكتەردى جويۋ جونىندە حات جولداعان، ال ول بولسا، بانكروتقا ۇشىراعان. وسىناۋ بيۋدجەت قارجىسىنىڭ بارلىعى قۇمعا قۇيعان سۋداي اعىپ كەتكەن، ال گاز تاراتۋ ستانسياسى پايدالانۋعا بەرۋگە جارامسىز دەپ تانىلعان. بۇل – مەملەكەتتىك قىزمەتشىلەردىڭ ارەكەتسىزدىگى جانە بيۋدجەت قاراجاتىن ىسىراپ ەتۋ، – دەدى ءانۋار ءىلياسوۆ.
نۇروتاندىقتاردىڭ پىكىرىنشە، تاعى ءبىر وزەكتى ماسەلەنىڭ ءبىرى – كوپ پاتەرلى تۇرعىن ءۇي كەشەندەرىن جاڭا باسقارۋ فورماسىنا كوشىرۋ ماسەلەسى. ەلىمىزدەگى تۇرعىن ۇيلەردىڭ بارلىعى 2021 جىلدىڭ 7 قاڭتارىنا دەيىن پاتەر يەلەرى كووپەراتيۆتەرىنىڭ (پيك) ورنىنا مۇلىك يەلەرىنىڭ بىرلەستىگىن (ميب) نەمەسە جاي سەرىكتەستىك قۇرۋعا ءتيىس بولاتىن. الايدا پارتيالىق باقىلاۋ كوميتەتى بۇل باعىتتاعى جۇمىستار شىن مانىندە جۇرگىزىلمەي وتىر دەپ سانايدى.
– تەك ەلوردانىڭ وزىندە 3 مىڭداي تۇرعىن ءۇي كەشەنى بولسا، قازىرگى ۋاقىتتا نەبارى 260 ميب قانا قۇرىلعان. ەگەر ەلوردانىڭ وزىندە وسىلاي جۇرسە، وڭىرلەر تۋرالى نە ايتۋعا بولادى؟ مۇنىڭ سەبەبى زاڭنامانىڭ جەتىلمەگەندىگىندە بولىپ وتىر. پيك-تەر قارسىلىق تانىتىپ، قۇجاتتاردى، ءۇي-جايلاردى بەرمەيدى، ال بۇعان جاۋاپكەرشىلىك شارالارى كوزدەلمەگەن. تۇرعىن ءۇي باسقارماسى بۇل رەتتە كومەك بەرە المايدى، پيك-تى دە جازالاي المايدى، تەك كەڭەس قانا بەرە الادى، – دەدى ءانۋار ءىلياسوۆ.
تۇرعىن ۇي-كوممۋنالدىق شارۋاشىلىعى سالاسىنداعى قوردالانعان ماسەلەلەردى شەشۋ ءۇشىن نۇروتاندىقتار يەسىز جەلىلەردى پايدالانۋشى ۇيىمداردىڭ مەنشىگىنە وتەۋسىز بەرۋ مۇمكىندىگىن قاراستىرۋدى ۇسىندى. ەلەكتر قۋاتى مەن جىلۋ تاريفتەرىنىڭ بۇدان ارى وسۋىنە جول بەرمەۋ ءۇشىن حالىقارالىق قارجى ينستيتۋتتارىنىڭ قاراجاتىن تارتىپ، توزعان جابدىقتاردى اۋىستىرۋعا جانە جاڭعىرتۋعا ارنالعان شىعىندى سۋبسيديالاۋ تەتىگى ارقىلى «نۇرلى جەر» باعدارلاماسىن پايدالانۋ ۇسىنىلادى.
مۇندا جوبانى 50%-كە دەيىن قارجىلاندىرۋ رەسپۋبليكالىق بيۋدجەتتەن بولۋى مۇمكىن. ۇسىنىلعان تەتىك تاريفكە اۋىرتپالىقتى ازايتىپ، وسى ارقىلى الەۋمەتتىك تاۋەكەلدەردى ەسكەرۋگە جانە رەتتەۋگە مۇمكىندىك بەرەدى.
تالقىلاۋ قورىتىندىسى بويىنشا پارتيالىقتار وڭىرلەردەگى تۇرعىن ۇي-كوممۋنالدىق شارۋاشىلىقتىڭ ەڭ پروبلەمالى نىساندارىنا پارتيالىق باقىلاۋ كوميسسياسىنىڭ ناقتى مۇشەلەرى مەن ءماسليحاتتارداعى «Nur Otan» پارتياسىنىڭ دەپۋتاتتارىن بەكىتۋدى ۇسىندى.
سونىمەن قاتار، ەندى وڭىرلىك كوميسسيالار مەملەكەتتىك ورگانداردىڭ، مەردىگەرلىك جانە پايدالانۋشى كومپانيالاردىڭ وكىلدەرىن، سونداي-اق جەرگىلىكتى تۇرعىنداردى شاقىرا وتىرىپ، وسىنداي ماسەلەلەردى كەم دەگەندە توقسان سايىن ءبىر رەت تالقىلايتىن بولادى.
پارتيانىڭ باسپا ءسوز قىزمەتىنىڭ اقپاراتى بويىنشا، ارەكەتسىزدىگى جانە ءتيىستى پارتيالىق باقىلاۋ جاساماعانى ءۇشىن پاۆلودار قالاسى اكىمىنىڭ ورىنباسارى دارحان ساحانوۆقا، سارىاعاش اۋدانىنىڭ اكىمى مۇحيت وتارشييەۆكە، ءبىرقاتار وبلىستىڭ ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ باسشىلارى رۋسلان تۇرعامبايەۆقا (تۇركىستان وبلىسى)، ۇلانتاي ۇسەنوۆكە (قاراعاندى وبلىسى)، ادىلبەك اۋباكىروۆكە (سولتۇستىك قازاقستان وبلىسى) سوگىس جاريالاندى. سونداي-اق، باتىس قازاقستان وبلىسىنىڭ ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ باسشىسى اسقار عابيدۋللينگە پارتيالىق ەسكەرتۋ جاسالدى.
