توقايەۆ سىرتقى ساياساتتى حالىق ۇنىنە قۇلاق اساتىن مەملەكەت تۇجىرىمداماسىنا ساي جۇرگىزۋ كەرەك ەكەنىن اتاپ ءوتتى.
"ءقازىر قازاقستاننىڭ سىرتقا باعىتتالعان جۇمىسىندا ءبىرتۇتاس، جالپى مەملەكەتتىك ستراتەگيا جوق دەۋگە بولادى. بۇل جۇيەلى سيپاتتاعى ماسەلە"، – دەدى مەملەكەت باسشىسى.
ول سىرتقى ىستەر ءمينيسترى ۇكىمەتتە ەرەكشە مارتەبەگە يە بولىپ، پرەمەر-مينيستردىڭ ورىنباسارى دەڭگەيىنە كوتەرىلگەنىن ەسكە سالدى. وسىعان وراي سىرتقى ىستەر مينيسترلىگى تىعىز مەكەمەارالىق ۇيلەستىرۋ جۇمىسىن اتقارۋى كەرەك، دەپ تولىقتىردى توقايەۆ.
"مەملەكەتتىك اپپارات ىشىندەگى بايلانىس، ءوزارا ىقپالداستىق ءالسىز. جەكەلەگەن مەكەمەلەردىڭ مۇددەسىنە باسىمدىق بەرىلىپ جاتادى. بۇل ءبىرازدان بەرى جالعاسىپ كەلە جاتقان تەرىس ءۇردىس. سونىڭ كەسىرىنەن ەلەۋلى كەمشىلىكتەر بولىپ جاتادى. وعان قوسا، ۇلتتىق مۇددەنى قورعايتىن كەزدە ءتيىمدى جۇمىس اتقارىلمايدى.
مىسالى ءقازىر جايىق وزەنى تارتىلىپ بارادى. قازاقستانعا جولدانعان جۇك جۇڭگو شەكاراسىندا تۇرىپ قالدى. ءبىزدىڭ كاسىپكەرلەردىڭ كورشى ەلدەر نارىعىنداعى مۇددەسى ويداعىداي قورعالماي وتىر"، – دەدى پرەزيدەنت.
ايتۋىنشا، وسىنداي كەلەڭسىزدىكتەر حالىقتىڭ تۇرمىس ساپاسىنا جانە كوڭىل كۇيىنە كەرى اسەر ەتەدى.
