– قۇرمەتتى تۇركىستاندىقتار! بارشاڭىزدى وبلىس اكىمى ءومىرزاق ەستاي ۇلىنىڭ اتىنان مەرەكەمەن قۇتتىقتايمىن. وسىدان 27 جىل بۇرىن قازاقستان رەسپۋبليكاسىنىڭ مەملەكەتتىك رامىزدەرى قابىلدانعان بولاتىن. ەۋرازيا تورىندە ورنالاسقان قازاقستان تاۋەلسىز ەل رەتىندە ءوز ءانۇرانى، ءوز تۋى، ءوز ەلتاڭباسى بار مەملەكەتتەر قاتارىنا قوسىلىپ، ۇلتتىق قۇندىلىقتارىن پاش ەتتى. ال 2007 جىلى 4 ماۋسىمدا ق ر مەملەكەتتىك رامىزدەرى تۋرالى زاڭ قابىلداندى. مىنە، سول ۋاقىتتان بەرى 4 ماۋسىم رامىزدەر كۇنى مەرەكەسى رەتىندە اتالىپ كەلەدى. مەملەكەتتىك رامىزدەردى قۇرمەتتەۋ – وتانشىلدىقتىڭ بەلگىسى. كەزىندە تۇركىستانننىڭ سايىپقىرانى بەكزات ساتتارحانوۆ سيدنەي تورىندە چەمپيون اتانىپ، رامىزدەرىمىزدى كۇللى الەمگە تانىتتى. مىنە، قازىرگى جاستار سول بەكزات باتىرداي نامىستى بولىپ، ەلگە قىزمەت ەتۋلەرى ءتيىس. بارشاڭىزدى مەملەكەتتىك رامىزدەر كۇنىمەن قۇتتىقتايمىن! ەلتاڭبامىز ماڭگى جارقىراپ، كوك تۋىمىز ماڭگى جەلبىرەي بەرسىن. كۇللى الاشتىڭ بولاشاعى جارقىن بولسىن! – دەدى ول.
سالتاناتتى جيىندا كىتاپ كورمەسى ءوتىپ، اقىندار مەن انشىلەر وتانشىلدىققا شاقىراتىن شىعارمالارىن ورىندادى. تۇلپار مىنگەن جىگىتتەر كوك تۋدى جەلبىرەتىپ، تۇركىستان تۇرعىندارى مەن قوناقتارىنا اسقاق رۋح پەن جىگەر سىيلادى.
مەرەكەلىك ءىس-شارادا «اسىل قازىنا» اجەلەر ءانسامبلى، وقۋشىلاردىڭ حور ۇجىمى، «سەمسەر»، «بولاشاق» توپتارى مەن «شابىت»، «بيسۇلتان» بيشىلەر توبى ونەر كورسەتتى. سونىمەن بىرگە تۇركىستان قالالىق مادەنيەت ءۇيىنىڭ ونەرپازدارى مەن وزگە دە جاس انشىلەر ءان شىرقادى.
ساربازدار مەن «جاس ساربازدار» كلۋبىنىڭ مۇشەلەرى مەملەكەتتىك رامىزدەردى ورتاعا الىپ شىعىپ، وسى قۇندىلىقتاردى قۇرمەتتەۋ جونىندە ۇران تاستادى.
رامىزدەر كۇنىنە ارنالعان مەرەكەدە تۇركىستان قالاسىنداعى ءبىلىم ۇيالارىنىڭ ورەندەرى بەلسەندى قاتىسىپ، قالا جاستارى فلەشموب كورسەتتى. اعا بۋىن وكىلدەرى مەن قالا تۇرعىندارى دا رامىزدەردىڭ ماڭىزدىلىعى تۋرالى وي قوزعادى. مەملەكەتتىك رامىزدەردى قۇرمەتتەۋگە شاقىرعان ءىس-شارا تۇركىستاندىقتارعا كوتەرىڭكى كوڭىل-كۇي سىيلاپ، وتانشىلدىق دارىپتەلدى.
