قازاقستاندا مەملەكەتتىك قىزمەتشىلەرگە سىياقى (پرەميا)، ماتەريالدىق كومەك جانە ۇستەماقى تولەۋ قاعيدالارى جاڭارتىلدى. ءتيىستى وزگەرىستەر قازاقستان رەسپۋبليكاسىنىڭ ۇكىمەتى قابىلداعان 2026 جىلعى 29 قاڭتارداعى №54 قاۋلىدا كورسەتىلگەن. قۇجات 2026 جىلدىڭ 1 قاڭتارىنان باستاپ كۇشىنە ەندى، دەپ حابارلايدى Dalanews.kz.

قانداي جاعدايدا سىياقى تولەنەدى؟

Zanger.prg ساراپشىلارىنىڭ مالىمەتىنشە، جاڭا تارتىپكە سايكەس، مەملەكەتتىك قىزمەتشىلەرگە سىياقى كەلەسى جاعدايلاردا بەرىلۋى مۇمكىن:

• قىزمەتتىك مىندەتتەرىن ۇلگىلى ورىنداعانى ءۇشىن؛

• ءمىنسىز مەملەكەتتىك قىزمەتى ءۇشىن؛

• ەرەكشە ماڭىزى بار جانە كۇردەلى تاپسىرمالاردى ورىنداعانى ءۇشىن؛

• بەلگىلى ءبىر كەزەڭدەگى جۇمىس ناتيجەلەرى ءۇشىن؛

• شۇعىل ءارى الدىن الا جوسپارلانباعان، ءبىراق مەكەمەنىڭ نەمەسە ونىڭ بولىمشەلەرىنىڭ قالىپتى جۇمىس ىستەۋى ءۇشىن ماڭىزدى تاپسىرمالاردى ۋاقىتىندا ورىنداعانى ءۇشىن؛

• ۇكىمەتتىڭ زاڭ جوبالاۋ جۇمىستارى جوسپارىن، سونداي-اق پرەزيدەنتتىڭ، ۇكىمەتتىڭ جانە پرەمەر-مينيستردىڭ اكتىلەرى مەن تاپسىرمالارىن ۋاقتىلى ءارى ساپالى ورىنداعانى ءۇشىن؛

• ەگەر بۇل تىكەلەي قىزمەتتىك مىندەتىنە كىرمەسە، زاڭ جوبالارىن، كەلىسىمدەر مەن نورماتيۆتىك-قۇقىقتىق اكتىلەردى ازىرلەگەنى ءۇشىن؛

• وزگە دە ەڭبەك جەتىستىكتەرى مەن قىزمەتتىك باعالاۋ ناتيجەلەرى بويىنشا.

قاي كەزدە بەرىلۋى مۇمكىن؟

سىياقى تولەۋ:

• مەرەكە كۇندەرىنە،

• مەرەيتويلىق داتالارعا،

• قىزمەتكەرلەردىڭ جەكە مەرەيتويلارىنا وراي دا تاعايىندالۋى مۇمكىن.

كىم شەشىم قابىلدايدى؟

ورتالىق مەملەكەتتىك ورگانداردىڭ، جەرگىلىكتى اتقارۋشى ورگانداردىڭ جانە جەرگىلىكتى بيۋدجەتتەن قارجىلاندىرىلاتىن مەكەمەلەردىڭ ءبىرىنشى باسشىلارى (نەمەسە ولاردى الماستىراتىن تۇلعالار) قىزمەتكەرلەرگە سىياقى تولەۋ ءتارتىبىن وزدەرى ازىرلەپ، بەكىتۋگە قۇقىلى.