مەملەكەتتىك كەڭەسشى ەرلان قارين «Qazaqstan» تەلەارناسىنىڭ «باس تاقىرىپ» باعدارلاماسىنا بەرگەن سۇحباتىندا سوڭعى جىلدارى كەيبىر ەلدى مەكەندەردە ەسكەرتكىشتەردى ورناتۋ بويىنشا «جارىس» وتەتىنىنە نازار اۋدارىپ، بۇل جۇمىستاردى ورتالىقتاندىرۋ قاجەت ەكەندىگىنە توقتالدى، - دەپ جازادى Dalanews.kz.
مەمكەڭەسشىنىڭ اتاپ وتكەنىندەي سوڭعى جىلدارى بۇل سالادا بىر-بىرىمەن جارىسۋ، بەي-بەرەكەت شەشىمدەر قابىلداۋ كوبەيگەن.
ەرلان قارين بۇل جاعدايدى توقتاتۋ ءۇشىن ەسكەرتكىشتەردى ورناتۋدى مينيسترلىك دەڭگەيىندەگى كوميسسيانىڭ كەلىسىمىمەن جانە بەكىتىلگەن ستاندارتتارعا ساي جۇرگىزۋ قاجەت ەكەنىن ايتتى.
«كەيبىر اۋىلداردا، ەلدى مەكەندەردە ءتىپتى بىر-بىرىمەن جارىساتىندار بار. قايسىسىنىڭ اتا-باباسىنا ەسكەرتكىش قالاي قويىلدى، ءتىپتى ونىڭ بيىكتىگىمەن جارىساتىن ءۇردىس پايدا بولدى. ءبىر جەردە 4 مەتر ەسكەرتكىش تۇرسا، سول اۋدانداعى ەكىنشى ءبىر ەسكەرتكىشتى جارىسىپ 5 مەتر قىلىپ قويادى، ءتىپتى بىزگە سوڭعى كەلگەن ءبىر ەسكيزدەردىڭ بيىكتىگى 8 مەتردەن اسىپ كەتكەن. مۇنى توقتاتۋ كەرەك»، - دەدى ول «باس تاقىرىپ» باعدارلاماسىنا بەرگەن سۇحباتىندا.
ءقاريننىڭ ايتۋىنشا سوڭعى كەزدە جەرگىلىكتى اتقارۋشى بيلىك پەن مينيسترلىكتىڭ كوميسسياسىنان وتپەي، ماقۇلداماي، اقىلداسپاي بىردەن ەسكەركىشتى قۇرىپ قوياتىن جاعدايلار جيىلەپ كەتكەن. ءتىپتى، «ەسكەرتكىش دايىن تۇر، وسىنى ورناتۋ كەرەك» دەپ تالاپ قوياتىندار دا بار.
«تاۋەلسىزدىك جىلدارىندا قازاقستاندا 1000-نان اسا ەسكەرتكىش ورناتىلعان. بۇل كەڭەس وداعى كەزەڭىندەگى كورسەتكىشتەن ءۇش ەسە ارتىق. ەسكەرتكىش ورناتۋ جارىس بولىپ كەتتى. ەگەر مۇنى رەتكە كەلتىرمەسەك، وندا تاعى دا بەرەكەسىزدىك بولادى.
وسىعان بايلانىستى ءار ەسكەرتكىشتىڭ كوركەمدىك جانە ءمان-ماعىنالىق جاعى باستى نازارعا الىنادى. جاقىندا ورناتىلعان احمەت بايتۇرسىنوۆ، مۇحتار اۋەزوۆ، بەردىبەك سوقپاقبايەۆ ەسكەرتكىشتەرى حالىقتىڭ وڭ باعاسىن العانى وسى تالاپتاردىڭ ناتيجەسى دەۋگە بولادى»، - دەدى مەملەكەتتىك كەڭەسشى.
