Memlekettik keńesshi Erlan Qarın «Qazaqstan» telearnasynyń «Bas taqyryp» baǵdarlamasyna bergen suhbatynda sońǵy jyldary keıbir eldi mekenderde eskertkishterdi ornatý boıynsha «jarys» ótetinine nazar aýdaryp, bul jumystardy ortalyqtandyrý qajet ekendigine toqtaldy, - dep jazady Dalanews.kz.

Memkeńesshiniń atap ótkenindeı sońǵy jyldary bul salada bir-birimen jarysý, beı-bereket sheshimder qabyldaý kóbeıgen.

Erlan Qarın bul jaǵdaıdy toqtatý úshin eskertkishterdi ornatýdy mınıstrlik deńgeıindegi komısıanyń kelisimimen jáne bekitilgen standarttarǵa saı júrgizý qajet ekenin aıtty.

«Keıbir aýyldarda, eldi mekenderde tipti bir-birimen jarysatyndar bar. Qaısysynyń ata-babasyna eskertkish qalaı qoıyldy, tipti onyń bıiktigimen jarysatyn úrdis paıda boldy. Bir jerde 4 metr eskertkish tursa, sol aýdandaǵy ekinshi bir eskertkishti jarysyp 5 metr qylyp qoıady, tipti bizge sońǵy kelgen bir eskızderdiń bıiktigi 8 metrden asyp ketken. Muny toqtatý kerek», - dedi ol «Bas taqyryp» baǵdarlamasyna bergen suhbatynda.

Qarınniń aıtýynsha sońǵy kezde jergilikti atqarýshy bılik pen mınıstrliktiń komısıasynan ótpeı, maquldamaı, aqyldaspaı birden eskerkishti quryp qoıatyn jaǵdaılar jıilep ketken. Tipti, «eskertkish daıyn tur, osyny ornatý kerek» dep talap qoıatyndar da bar.

«Táýelsizdik jyldarynda Qazaqstanda 1000-nan asa eskertkish ornatylǵan. Bul Keńes Odaǵy kezeńindegi kórsetkishten úsh ese artyq. Eskertkish ornatý jarys bolyp ketti. Eger muny retke keltirmesek, onda taǵy da berekesizdik bolady. 

Osyǵan baılanysty ár eskertkishtiń kórkemdik jáne mán-maǵynalyq jaǵy basty nazarǵa alynady. Jaqynda ornatylǵan Ahmet Baıtursynov, Muhtar Áýezov, Berdibek Soqpaqbaev eskertkishteri halyqtyń oń baǵasyn alǵany osy talaptardyń nátıjesi deýge bolady», - dedi Memlekettik keńesshi.