پرەزيدەنت جاڭادان قۇرىلعان اباي وبلىسىنا جۇمىس ساپارىمەن بارىپ، جەرگىلىكتى جۇرتشىلىقپەن كەزدەستى. وندا قاسىم-جومارت توقايەۆ سەمەي قالاسىنىڭ، اباي وبلىسىنىڭ قازاقستان تاريحىنداعى ورنى ەرەكشە ءارى ءتول شەجىرەمىزدە ايرىقشا ورنى بار ولكە ەكەنىن اتاپ ءوتتى.
– بۇل – قازاققا اباي، شاكارىم، مۇحتار اۋەزوۆ سياقتى ءبىرتۋار پەرزەنتتەردى سىيلاعان ۇلىلار مەكەنى. اباي تۋعان توپىراققا كەلگەن ادام بۇل جەردىڭ كيەسىن سەزىنەدى، قاسيەتىن ۇعادى. سەمەي – ۇلى دالانىڭ ۇلاعاتتى ولكەسى. بۇل – الاش ارىستارىنىڭ ءىزى قالعان، زيالىلارىمىز ەلدىڭ بولاشاعى ءۇشىن كۇرەسكەن قاستەرلى ءوڭىر. سەمەي – ۇلتتىق عىلىم مەن ءبىلىمنىڭ، ونەر مەن مادەنيەتتىڭ تاريحي ورتالىعى. ەلىمىزدەگى مۇعالىمدەر دايارلايتىن العاشقى وقۋ ورنى بۇدان 120 جىل بۇرىن وسى قالادا اشىلعانى بەلگىلى. وندا مۇحتار اۋەزوۆ، جۇسىپبەك ايماۋىتوۆ، قانىش ساتبايەۆ، الكەي مارعۇلان، شاكەن ايمانوۆ سىندى ۇلت زيالىلارى ءبىلىم العان. ال سەمەيدەگى مۋزىكالىق دراما تەاتر – قازاقتىڭ تەاتر ونەرىنىڭ بەرەكەلى باستاۋى. ۇلت فۋتبولىنىڭ تۇساۋى دا وسى جەردە كەسىلگەن. ەلىمىزدەگى تاريحي-ولكەتانۋ مۋزەيى، قوعامدىق كىتاپحانا، ارحيۆ، تەلەگراف العاش رەت وسىندا اشىلعان. سوندىقتان بۇل جەردى حالقىمىز قازاق رۋحانياتى تامىر جايعان جەر دەپ ەرەكشە قادىرلەيدى، – دەدى مەملەكەت باسشىسى.
قاسىم-جومارت توقايەۆ 2020 جىلى ءوزىنىڭ شەشىمىمەن سەمەي قالاسىنا تاريحي ورتالىق مارتەبەسى بەرىلگەنىن ايتتى.
– جالپى، ءوڭىردىڭ تىنىس-تىرشىلىگى ءاردايىم مەنىڭ ءجىتى نازارىمدا. وسىدان شيرەك عاسىر بۇرىن وبلىس تاراتىلىپ، شىعىس قازاقستانعا قوسىلدى. سودان بەرى ولكەگە بۇرىنعى مارتەبەسىن قايتارۋ ماسەلەسى قوعامدا تالاي رەت كوتەرىلدى. سەمەي وڭىرىندە ىرگەسى بولەك وبلىس قۇرۋ تۋرالى بىرنەشە حات-حابار، ۇسىنىس الدىم. ءبىز حالىق ۇنىنە قۇلاق اساتىن مەملەكەت قۇرىپ جاتىرمىز. سوندىقتان مەن بيىل حالىقتىڭ قالاۋىن ەسكەرە وتىرىپ، وسى ايماقتا جەكە وبلىس قۇرۋ تۋرالى شەشىم قابىلدادىم. اتالعان قادام ءوڭىردىڭ الەۋمەتتىك-ەكونوميكالىق ماسەلەلەرىن جەدەل شەشىپ، تۇرعىنداردىڭ ءال-اۋقاتىن ارتتىرۋعا ىقپال ەتەدى. ينۆەستيسيانىڭ كەلۋىنە، ونەركاسىپ پەن جۇمىس ورىندارىنىڭ اشىلۋىنا، شاعىن جانە ورتا بيزنەستىڭ دامۋىنا جاعداي جاسايدى. ايماقتى رەسپۋبليكالىق بيۋدجەتتەن تىكەلەي قارجىلاندىرۋ جۇيەسى جۇزەگە اسادى. بۇل شەشىم – شىن مانىندە، تاريحي ادىلدىكتىڭ سالتانات قۇرۋى. ءبىز جاڭادان قۇرىلعان وبلىستى ۇلتتىڭ ۇلى تۇلعاسىنا دەگەن ەرەكشە قۇرمەت بەلگىسى رەتىندە اباي دەپ اتادىق. ويتكەنى اباي – ۇلت پەن جۇرتتىڭ سيمۆولىنا اينالعان ۇلى تۇلعا. سەمەي مەن اباي – بىر-بىرىنەن ەشقاشان اجىرامايتىن ۇعىمدار. وسى مۇمكىندىكتى پايدالانىپ، بارشاڭىزدى اباي وبلىسىنىڭ قۇرىلۋىمەن تاعى دا قۇتتىقتايمىن! – دەدى پرەزيدەنت.
مەملەكەت باسشىسى سەمەيدىڭ حالىقارالىق ترانزيتتىك ساۋدانىڭ ماڭىزدى ورتالىعى بولعانىنا نازار اۋدارىپ، بۇگىندە وبلىس ەكى ءىرى كورشىمىز رەسەيمەن جانە قىتايمەن شەكتەسىپ جاتقانىن اتاپ ءوتتى.
وسى وراسان زور كولىك-لوگيستيكالىق، ساۋدا-ەكونوميكالىق الەۋەتتى تولىق پايدالانۋ قاجەت. بولاشاقتا سەمەي وزىنە استانا، الماتى، شىمكەنت جانە اقتوبە قالالارىمەن قاتار ەڭبەك ادامدارىن، يننوۆاسيا مەن ينۆەستيسيا تارتا وتىرىپ، ەلىمىزدىڭ قارقىندى دامۋىنا ۇلەس قوساتىن شاھارعا اينالادى دەپ سانايمىن. اباي وبلىسى ەلىمىزدىڭ دامۋىنا سەرپىن بەرەتىن قۋاتتى ايماق بولارىنا سەنەمىن. ءبىز قايتا شاڭىراق كوتەرگەن وبلىستىڭ كوركەيۋى ءۇشىن بارلىق جاعدايدى جاسايمىز، – دەدى قاسىم-جومارت توقايەۆ.
بۇدان كەيىن پرەزيدەنت اباي ءوڭىرىن دامىتۋدىڭ باسىم باعىتتارى مەن وزەكتى ماسەلەلەرىنە توقتالدى. اتاپ ايتقاندا، اباي وبلىسىنداعى مەكتەپتەردە 9 مىڭعا جۋىق بالاعا ورىن جەتىسپەيدى. الداعى ۋاقىتتا 11 مەكتەپ پەن 14 بالاباقشا سالۋ جوسپارلانعان. الايدا قاسىم-جومارت توقايەۆ مۇنىڭ ءوزى جەتكىلىكسىز ەكەنىن ايتتى.
– ۇكىمەت پەن اكىمدىككە وبلىس مەكتەپتەرىندەگى ورىن تاپشىلىعى ماسەلەسىن ءبىرجولا شەشۋدى تاپسىرامىن. ءبىز ۇستازدى قۇرمەت تۇتقان ەلمىز. بۇل ءسوزىمىز ناقتى ىسپەن بەكىتىلىپ جاتىر. ارنايى وقۋ-اعارتۋ مينيسترلىگى قۇرىلدى. ءبىز بۇعان دەيىن «پەداگوگتاردىڭ مارتەبەسى تۋرالى» زاڭ قابىلداپ، ونىڭ اياسىندا مۇعالىمدەردىڭ جالاقىسىن وسىردىك. «الىپپەنى» قايتاردىق. ورتا ءبىلىمدى دامىتۋعا باعىتتالعان ءبىرقاتار جاعىمدى وزگەرىستەر بار. وسىنداي يگى شارالار ارقىلى ءبىز قوعامدا ءمۇعالىمنىڭ مارتەبەسىن ودان ءارى بيىكتەتەمىز. ۇستاز ءبىزدىڭ قوعامدا ءاردايىم سىيلى تۇلعا بولادى. سەمەي ءبىلىم بەرۋ سالاسىندا كوش باسىندا ءجۇرۋى قاجەت. باتىستىڭ وزىق ۋنيۆەرسيتەتتەرىنىڭ ءبىرى سەمەيدە ءوز فيليالىن اشسا نەمەسە سەمەيدىڭ جوعارى وقۋ ورنىمەن بايلانىس ورناتسا، جاقسى بولار ەدى، – دەدى مەملەكەت باسشىسى.
سەمەيدە ەلىمىزدەگى نەگىزگى مەديسينا ۋنيۆەرسيتەتتەرىنىڭ ءبىرى ورنالاسقان. قاسىم-جومارت توقايەۆتىڭ تاپسىرماسىمەن ءبىلىم ورداسى جانىنان كوپبەيىندى اۋرۋحانا سالۋ ماسەلەسى قاراستىرىلىپ جاتىر.
– مەنىڭ تاپسىرمام بويىنشا سەمەيدە ونكولوگيالىق ديسپانسەردىڭ راديولوگيالىق ورتالىعى پايدالانۋعا بەرىلدى. بالالاردى وڭالتۋ ورتالىعى سالىنىپ جاتىر. «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا ايماقتا 65 نىسان سالىنادى. ءبىز يادرولىق سىناقتاردان زارداپ شەككەن ازاماتتارىمىزدى وڭالتۋ ماسەلەسىنە باسا ءمان بەرۋىمىز كەرەك، – دەدى پرەزيدەنت.
پرەزيدەنتتىڭ پىكىرىنشە، سەمەي زامان تالابىنا ساي، ىڭعايلى قالاعا اينالۋعا ءتيىس. وبلىس ورتالىعى ونەركاسىپتەر مەن كولىكتەرگە ەمەس، قالا تۇرعىندارىنا قولايلى مەكەنگە اينالۋى قاجەت. سەمەيدى دامىتۋ جۇمىسىن جوسپارلاعان كەزدە جوعارى ستاندارتتارعا ساي تىڭ ۋربانيستيكالىق تۇجىرىم كەرەك. اسىرەسە، «جاسىل قالا» يدەياسىنا ەرەكشە نازار اۋدارعان ءجون.
سونداي-اق مەملەكەت باسشىسى سەمەي قالاسىنىڭ ينفراقۇرىلىمى ابدەن توزعانىن ايتتى. جازدا ىستىق سۋ جوق، ال قىستا ۇيلەر جىلىنبايدى. قالاداعى جىلۋ ەلەكتر ورتالىعىنان شىعاتىن زياندى قالدىقتار اۋانى شەكتەن تىس لاستاپ جاتىر. بۇل ماسەلەلەردى تۇپكىلىكتى شەشەتىن ۋاقىت جەتتى.
اباي وبلىسى توعىز جولدىڭ تورابىندا رەسەيمەن، قىتايمەن شەكتەسىپ جاتىر. پرەزيدەنت وسى مۇمكىندىكتى ۇتىمدى پايدالانۋ ءۇشىن جولدارىمىز ساپالى ءارى ءقاۋىپسىز بولۋى قاجەت ەكەنىنە توقتالدى.
– ەلىمىزدىڭ كولىك الەۋەتىن دامىتۋ ءۇشىن باقتى ارقىلى قىتايعا باراتىن تەمىرجول جەلىسىن سالۋدى جوسپارلاپ وتىرمىز. بۇل تەمىرجولدى مىندەتتى تۇردە سالۋىمىز كەرەك. ۇكىمەت وسى ماسەلەمەن اينالىسادى. وڭىردە «قۇرعاق پورت»، «لوگيستيكالىق پارك» سالىپ، كولىك ءدالىزىن دامىتۋ اسا ماڭىزدى. حالىقارالىق ماڭىزى بار كۇرە جول سەمەي ارقىلى وتەدى. سوندىقتان، ەڭ الدىمەن، قالاداعى ەكى كوپىردى جوندەۋ قاجەت، – دەدى مەملەكەت باسشىسى.
قاسىم-جومارت توقايەۆ اباي وبلىسىنىڭ اگرارلىق ايماق ەكەنىنە ەرەكشە نازار اۋداردى.
– كەزىندە سەمەي ءوڭىرى بۇكىل رەسپۋبليكاعا، ءتىپتى، الىس-جاقىن شەتەلدەرگە ەت، ءسۇت، تەرى، ءجۇن جانە باسقا دا ونىمدەر شىعاراتىن. وبلىستىڭ وسى الەۋەتىن قالپىنا كەلتىرۋ قاجەت. اۋىل شارۋاشىلىعى ونىمدەرىن وڭدەيتىن كاسىپورىنداردىڭ جۇمىسىن جانداندىرۋ كەرەك. بۇل – اسا ماڭىزدى مىندەت. تاعى ءبىر وزەكتى ماسەلە – بوس جاتقان جەرلەردى مەملەكەتكە قايتارۋ. مەن بۇل جۇمىستى بۇكىل ەل اۋماعىندا جۇرگىزۋدى تاپسىردىم. اباي وبلىسىندا ءقازىردىڭ وزىندە وسىنداي 200 مىڭ گەكتار جەر انىقتالدى. سونىڭ 62 مىڭ گەكتارى قايتارىلدى. قايتارىلعان جەرلەردى جەرگىلىكتى شارۋالارعا ءادىل ۇلەستىرىپ، ەل يگىلىگىنە ءتيىمدى پايدالانۋ اسا ماڭىزدى. جالپى، بۇل جۇمىس ودان ءارى جالعاسادى، – دەدى پرەزيدەنت.
ءوڭىردىڭ جەر قويناۋى پوليگوننىڭ كەسىرىنەن جىلدار بويى يگەرىلگەن جوق. سول سەبەپتى مەملەكەت باسشىسى وبلىس اۋماعىندا اۋقىمدى گەولوگيالىق زەرتتەۋ جۇمىسىن جۇرگىزۋ قاجەت ەكەنىن ايتتى. پرەزيدەنتتىڭ پىكىرىنشە، قازبا بايلىقتار تابىلادى. تاۋ-كەن ونەركاسىبى وبلىس ەكونوميكاسىن جانداندىرىپ، جاڭا جۇمىس ورىندارىن اشۋعا مۇمكىندىك بەرەدى.
قاسىم-جومارت توقايەۆ اباي وبلىسىنىڭ كۇردەلى ەكولوگياسى حالىقتىڭ دەنساۋلىعى مەن تۇرمىس ساپاسىنا اسەر ەتىپ وتىرعانىن اتاپ ءوتىپ، سەمەي پوليگونىنداعى يادرولىق سىناقتاردان كەيىن جۇزدەگەن مىڭ گەكتار جەرگە زالال كەلگەنىنە توقتالدى. سونىمەن قاتار ەرتىس وزەنىنىڭ لاستانۋىنا، شوققاراعايدى ساقتاۋعا نازار اۋدارىلدى. مەملەكەت باسشىسى اكىمدىككە ءوڭىردىڭ ەكولوگيالىق ماسەلەسىن ۇنەمى نازاردا ۇستاۋدى تاپسىردى.
– ءتۇرلى ەكولوگيالىق باستامالاردى جۇزەگە اسىرۋ ءۇشىن ءبىز تۇتاس قوعام بولىپ جۇمىلۋىمىز قاجەت. حالىقارالىق ستاندارتقا جانە ەكولوگيالىق نورمالارعا ساي كەلەتىن قوقىس جينايتىن جاڭا پوليگون سالۋ كەرەك. بۇل جۇمىس وبلىس اكىمىنىڭ جەكە باقىلاۋىندا بولۋعا ءتيىس. ەنەرگەتيكا مينيسترلىگى سەمەي يادرولىق قاۋىپسىزدىك ايماعى تۋرالى زاڭ جوباسىن ازىرلەدى. بيىلعى ءساۋىر ايىندا بۇل جوبانى ءماجىلىس ماقۇلدادى. ەندى ونى تەزىرەك قابىلداپ، تازا جەردى اۋىل شارۋاشىلىعى ءۇشىن پايدالانۋعا بەرۋ كەرەك، – دەدى پرەزيدەنت.
قاسىم-جومارت توقايەۆ وڭىردە مادەني-تانىمدىق ءتۋريزمدى دامىتۋ ماسەلەسىنە دە توقتالدى. مەملەكەت باسشىسىنىڭ ايتۋىنشا، تەڭىزگە شىعاتىن جولى جوق ەڭ ۇلكەن مەملەكەت قازاقستان ءۇشىن جەردىڭ كونتينەنتتىك ءپوليۋسىنىڭ ءبىزدىڭ تەرريتوريادا ورنالاسۋىنىڭ سيمۆولدىق ءمانى بار. پرەزيدەنت بۇل نۇكتە اباي اۋدانىندا، جيدەبايدا ابايدىڭ ءمۇراجاي-ۇيىنىڭ جانىندا ورنالاسقانىن اتاپ ءوتتى.
– سەمەيدىڭ بىرەگەي مۇراسى مەن ساۋلەتتىك كەلبەتىن ساقتاۋ وتە ماڭىزدى. وبلىستىڭ تۋريستىك الەۋەتىن نىعايتۋدىڭ نەگىزگى شارتتارىنىڭ ءبىرى – ينفراقۇرىلىمدى دامىتۋ. ەڭ الدىمەن جول ماسەلەسىن شەشۋ كەرەك. تۋريستەر ءۇشىن تارتىمدى جەرلەرگە كەدەرگىسىز جانە ىڭعايلى قولجەتىمدىلىكتى قامتاماسىز ەتۋ كەرەك. سونداي-اق مادەني نىسانداردىڭ كوممۋنالدى جەلىلەرگە قاتىستى ماسەلەلەرىن شەشۋ قاجەت. ەرتىس وزەنىنىڭ جاعالاۋىن اباتتاندىرۋعا ەرەكشە نازار اۋدارۋ كەرەك. سەمەي قالاسىنىڭ جاڭا مارتەبەسىن ەسكەرە وتىرىپ، ونى دامىتۋدىڭ باس جوسپارىن جاڭارتۋ قاجەت، – دەدى قاسىم-جومارت توقايەۆ.
پرەزيدەنت جاڭا وبلىس قۇرۋ وڭاي شارۋا ەمەس ەكەنىن ايتا كەلىپ، بارلىق سالادا جان-جاقتى جانە مۇقيات ويلاستىرىلعان جۇمىس جۇرگىزۋدىڭ ماڭىزىنا توقتالدى.
– ۇكىمەتكە جاقىن ارادا اباي وبلىسىن دامىتۋدىڭ كەشەندى جوسپارىن ازىرلەۋدى تاپسىرامىن. كەلەشەكتە وبلىس ءوزىن-وزى تولىققاندى قامتاماسىز ەتە الاتىن، وركەندەگەن ايماققا اينالۋعا ءتيىس. قاسىرەتكە شالدىقسا دا، قاسيەتىن جوعالتپاعان ولكەنى بارىنشا دامىتۋ – ورتاق پارىز. بۇل مەنىڭ پرەزيدەنت رەتىندەگى پارىزىم دەپ ايتسام، ارتىق ەمەس. وسى ورايدا، ءبىر ماسەلەگە ارنايى توقتالعىم كەلەدى. شىن مانىندە، ۇلتتى جاڭعىرتۋدىڭ نەگىزى ساياسات پەن ەكونوميكادان گورى ءبىلىم مەن مادەنيەتتە جاتىر دەۋگە بولادى. سەمەي وتكەن عاسىردىڭ باسىندا قازاقتىڭ رۋحاني استاناسى سانالعان. اباي باستاپ، الاش ارىستارى جالعاعان ۇلى جول ۇلتىمىزدى ەسەيتىپ، مۇلدە جاڭا دەڭگەيگە كوتەردى. ولار قازاقتىڭ بولاشاعى قانداي بولۋى كەرەكتىگىن ايقىنداپ بەردى، – دەدى مەملەكەت باسشىسى.
پرەزيدەنت سونداي-اق قوعامدىق سانانى تۇبەگەيلى جاڭعىرتۋمەن اينالىسۋىمىز قاجەت ەكەنى دە ايتتى.
– جوعارى مادەنيەت، وزىق ءبىلىم جانە ادال ەڭبەك سياقتى قۇندىلىقتار بۇل جۇمىستىڭ وزەگىنە اينالادى. «تالاپ، ەڭبەك، تەرەڭ وي، قاناعات، راقىم، ويلاپ قوي» دەگەن حاكىم ابايدىڭ وسيەتى جاس ۇرپاققا ۇلگى-ونەگە بولۋعا ءتيىس. ۇلى اقىننىڭ اتاپ كورسەتكەن بەس اسىل قاسيەتى ءبىزدىڭ بۇگىنگى ماقساتىمىزبەن تولىق ۇندەسەدى. ۇلى اباي «تولىق ادام» دەگەن ۇعىمدى قازاق قوعامىنا ۇسىنعان ەدى. تولىق ادام، بۇل – بولمىسى كەمەل، كوزقاراسى تەرەڭ، كوكىرەگى وياۋ، ەڭبەكشىل ادام دەگەن ءسوز. وزدەرىڭىزگە ءمالىم، مەن قوعامدا جاڭا قۇندىلىقتار ورنىقتىرۋ قاجەتتىگى جونىندە ۇنەمى ايتىپ جۇرەمىن. ۇلتتىق قۇرىلتايدا، «جاستار رۋحىنىڭ» سەزىندە جانە تۇركىستاندا جۇرتشىلىقپەن كەزدەسكەندە بۇعان ارنايى توقتالدىم. تاعى دا قايتالاپ ايتامىن. جاستارىمىز ءۇش نارسەنىڭ ايرىقشا ماڭىزدى ەكەنىن ءتۇسىنۋى كەرەك. بۇل – تەرەڭ ءبىلىم، ەڭبەكقورلىق جانە وتانشىلدىق قاسيەت، – دەدى پرەزيدەنت.
مەملەكەت باسشىسى ەۋرازيا قۇرلىعىنىڭ ورتاسىندا ورنالاسقان ەلىمىزدىڭ قازىرگى حالىقارالىق احۋالعا قاتىستى ۇستانىمىن تاعى دا ايقىنداپ ءوتتى.
– بۇگىندە الەمدە بۇرىن-سوڭدى بولماعان گەوستراتەگيالىق شيەلەنىس بايقالادى. الەمنىڭ تۇكپىر-تۇكپىرىندەگى ساياساتكەرلەر مەن ساراپشىلار يادرولىق قارۋدىڭ قولدانىلۋ ءقاۋپىن قىزۋ تالقىلاپ جاتىر. سەمەي يادرولىق پوليگونىنداعى سوڭعى جارىلىستان بەرى 33 جىلعا جۋىق ۋاقىت ءوتتى. بۇل ايماقتىڭ تۇرعىندارى «قىرعي-قاباق سوعىستاعى» يادرولىق الەۋەتپەن اقىلعا قونىمسىز باسەكەلەستىكتىڭ بارلىق قيىندىعىن باستان وتكەردى. جاقىندا مەن بۇل تۋرالى نيۋ-يوركتەگى بۇۇ-نىڭ جوعارى مىنبەرىنەن ايتتىم. ادامداردىڭ دەنساۋلىعىنا، جەرگىلىكتى ەكوجۇيەگە وراسان زور زالال كەلدى. تۇڭعىش پرەزيدەنت نۇرسۇلتان نازاربايەۆتىڭ جارلىعىمەن پوليگوندى جاۋىپ، الەمدەگى ءتورتىنشى يادرولىق ارسەنالدان ءوز ەركىمەن باس تارتا وتىرىپ، ءبىزدىڭ ەلىمىز يادرولىق قارۋسىز الەم ءۇشىن جاھاندىق قوزعالىس كوشباسشىلارىنىڭ بىرىنە اينالدى، – دەدى قاسىم-جومارت توقايەۆ.
پرەزيدەنت ءقازىر قوعامدا ادامداردىڭ بىر-بىرىنە دەگەن قۇرمەتى مەن سەنىمى ازايىپ بارا جاتقانىن ەرەكشە اتاپ ءوتتى.
– بۇل – وتە ءقاۋىپتى. قاتىگەزدىك پەن سەنىمسىزدىك، نەمقۇرايلىلىق پەن ەنجارلىق – حالىقتى جارعا جىعاتىن جاعىمسىز ادەتتەر. ءبىز ەل بولامىز دەسەك، ەڭ الدىمەن، جاستاردىڭ بويىنا ادامگەرشىلىك قاسيەتتەردى ءسىڭىرۋىمىز كەرەك. سونداي-اق، ءوزارا تىلەكتەستىك پەن باۋىرمالدىقتى ءاردايىم دارىپتەۋىمىز كەرەك. مۇنى ابايدان ارتىق ايتقان ەشكىم جوق. ول «ءبىرىڭدى قازاق ءبىرىڭ دوس، كورمەسەڭ ءىستىڭ ءبارى بوس» دەگەنىن بىلەسىزدەر. ۇلى ويشىلدىڭ وسى وسيەتىن ۇمىتپايىق، اعايىن! – دەدى مەملەكەت باسشىسى.
قاسىم-جومارت توقايەۆ ايماقتاردى دامىتۋعا مەملەكەت قانا ەمەس، بيزنەس وكىلدەرى دە اتسالىسۋى قاجەت ەكەنىن جەتكىزدى.
– مەن وسى وڭىردەن شىققان ىسكەر ازاماتتاردى اباي وبلىسىن بىرگە كوركەيتۋگە شاقىرامىن. مەكتەپ، ەمحانا جانە باسقا دا الەۋمەتتىك نىسانداردى مەملەكەت پەن جەكە سەكتوردىڭ سەرىكتەستىگى اياسىندا سالۋعا مۇمكىندىك بار. اۋىل-ايماقتى وركەندەتۋگە ءاربىر ازامات پايداسىن تيگىزە الادى. اعاش وتىرعىزۋ، كوشەلەردى، ءتىپتى، اۋلانى قوقىستان تازارتۋ سياقتى قاراپايىم جۇمىستار – تۋعان جەرگە دەگەن جاناشىرلىقتىڭ كورىنىسى. جاستارىمىز ۇقىپتى، بەلسەندى، ءبىلىمدى، ءوز ىسىنە جاۋاپتى بولۋى كەرەك. ەڭ باستىسى، ىزگى نيەت، ورتاق ىسكە دەگەن تىلەكتەستىككە ادال بولۋىمىز قاجەت. مەن ءاردايىم ايتىپ ءجۇرمىن. تاعى دا قايتالاپ وتكىم كەلەدى. وتانشىلدىق قۇر سوزدەن ەمەس، ناقتى ىستەن كورىنەدى، – دەدى پرەزيدەنت.
كەزدەسۋ سوڭىندا مەملەكەت باسشىسى اباي وبلىسىنىڭ ءبىرقاتار ازاماتىن مەملەكەتتىك ناگرادالارمەن ماراپاتتادى. «اباي اتىنداعى تەاتر» كمقك ءارتيسى يماحانوۆ بەكەن جانە ەڭبەك ارداگەرى مۇقاتايەۆ امانتاي «پاراسات» وردەنىمەن، «سەمەي سەمەنت زاۋىتى» وك» ج ش س كران ءماشينيسى پونوماريەۆا سۆەتلانا «قۇرمەت» وردەنىمەن ماراپاتتالدى. سونداي-اق «قاينار اگرو» شق سۋارۋ ماشينالارىنىڭ وپەراتورى لەبەديەۆ ميحايلگە «ەرەن ەڭبەگى ءۇشىن» مەدالى، كوكپەكتى جولدارى» ءجشس-نىڭ ديرەكتورى گۇلناز نۇرعالييەۆاعا «شاپاعات» مەدالى تابىس ەتىلدى.
