بۇگىن كەشكە مەملەكەت باسشىسى قاسىم-جومارت توقايەۆ پرەمەر-مينيستر ولجاس بەكتەنوۆتىڭ، ۇلتتىق بانك ءتوراعاسى تيمۋر سۇلەيمەنوۆتىڭ جانە باسقا دا لاۋازىمدى تۇلعالاردىڭ قاتىسۋىمەن جيىن وتكىزدى. جيىندا الەمدىك نارىقتاعى تاريفتىك قاقتىعىستاردىڭ سالدارىنان ەنەرگەتيكا رەسۋرستارى جانە نەگىزگى تاۋارلار باعاسىنىڭ قۇلدىراۋىنا بايلانىستى ەل ەكونوميكاسىندا قالىپتاسقان احۋال قارالدى، دەپ حابارلايدى Dalanews.kz اقوردانىڭ باسپا ءسوز قىزمەتىنە سىلتەمە جاساپ.
مەملەكەت باسشىسى ۇكىمەت پەن جەرگىلىكتى اتقارۋشى ورگانداردىڭ ءىس-قيمىل جوسپارىن قىسقا مەرزىمدە اياقتاۋدى تاپسىردى. بۇل جۇمىس قارجى-ەكونوميكالىق داعدارىس كەزىندە ءوسىمدى جانە تارتىلاتىن ينۆەستيسيا كولەمىن تومەندەتپەۋدى كوزدەيدى.
قاسىم-جومارت توقايەۆ قازىرگى اسا قولايسىز جاعدايعا قاراماستان، ەلىمىزدىڭ ەكونوميكالىق دامۋى بويىنشا ءوزى جاريالاعان باسىمدىقتار، سونىڭ ىشىندە ءىرى ينفراقۇرىلىمدىق جوبالار، سيفرلاندىرۋ مەن جاساندى ينتەللەكتىنى دامىتۋ، اۋىل شارۋاشىلىعى مەن كولىك-لوگيستيكا سالاسىن جاڭعىرتۋ باستامالارى تولىق جۇزەگە اسىرىلاتىنىن ايتتى.
پرەزيدەنت كەلەسى اپتادا وسى ماسەلەگە وراي ارنايى كەڭەس وتكىزۋدى جوسپارلاپ وتىر.
ايتا كەتسەك، اقش پەن جۇڭگو اراسىنداعى ساۋدا سوعىسى ۋشىعىپ، حالىقارالىق نارىقتاردا قۇلدىراۋلار ورىن الۋىنا تۇرتكى بولۋدا. سونىڭ ىشىندە شيكىزات سەكتورىنا دا تەرىس ىقپال ەتىپ، بۇگىن Brent ماركالى مۇنايدىڭ ءبىر باررەلىنىڭ باعاسى 60 دوللاردان تومەندەدى.
