دەنساۋلىق ساقتاۋ مينيسترلىگى ءمامس جۇيەسىنە جارنانى بەس ەسە ارتتىرۋ تۋرالى ماسەلەنى قاراستىرىپ جاتىر. بۇل جالاقىسى 850 مىڭ تەڭگەدەن اساتىن قىزمەتكەرلەرگە قاتىستى بولادى. مۇنداي قۇجات "اشىق نقا" پورتالىندا جاريالاندى. كەشە ۇكىمەتتەگى باسپا ءسوز ءماسليحاتىندا ۇلتتىق ەكونوميكا مينيسترلىگىنىڭ باسشىسى الىبەك قۋانتىروۆ وسى جاعدايعا قاتىستى پىكىر ءبىلدىردى، دەپ حابارلايدى Dalanews.kz.

شەنەۋنىك مەملەكەت بۇكىل الەۋمەتتىك شىعىندى كوتەرە المايدى دەگەن پىكىردە. 

"مەنىڭ ويىمشا، بۇعان بىرتىندەپ كەلۋ كەرەك، ويتكەنى مەملەكەت بارلىق الەۋمەتتىك شىعىندى كوتەرە المايدى. ءبىز الەۋمەتتىك باعدارلانعان مەملەكەتپىز، ال بىزدە مەملەكەتتىك بيۋدجەتتىڭ 50 پايىزدان استامى الەۋمەتتىك شىعىنعا جۇمسالىپ وتىر. ءبىراق دامۋشى ەلدەردە دە، دامىعان ەلدەردە دە بيزنەستىڭ الەۋمەتتىك جاۋاپكەرشىلىگى بولۋى كەرەك ەكەنى تۇسىنىكتى جانە بۇل ەڭ الدىمەن جۇمىسشىلارعا قاجەت. سوندا عانا ولار قورعالادى، ساقتاندىرىلعان كەزدە تولەم دە كوبىرەك بولادى"، - دەدى قۋانتىروۆ.

سونىمەن قاتار، مينيستردەن جالاقىسى 850 مىڭ تەڭگەدەن اساتىن قازاقستاندىقتارعا جارنانى ۇلعايۋتۋعا كوزقاراسى قانداي ەكەنى سۇرالدى. شەنەۋنىك بۇعان تۇسىنىستىكپەن قارايتىنىن جەتكىزدى.

"مەن بۇعان جاقسى قارايدى دەگەن ءسوز ەمەس. مەن وعان تۇسىنىستىكپەن قارايمىن. ءبىراق، ارينە، بيزنەسكە جۇكتەمەنى دە ەسكەرۋ كەرەك"، - دەدى ول.

ايتا كەتەيىك، زاڭ جوباسى قابىلدانعان جاعدايدا 2024 جىلى جۇمىس بەرۋشىلەر ءۇشىن مامس-كە ەڭ جوعارى اۋدارىم 127 500 تەڭگەگە دەيىن، ال جالدامالى قىزمەتكەرلەر ءۇشىن جارنا 85 000 تەڭگەگە دەيىن وسەدى. بۇل نورمانى 2025 جىلعى 1 قاڭتاردان باستاپ ەنگىزۋ ۇسىنىلىپ وتىر.