ەلىمىزدەگى توتەنشە جاعدايدىڭ جويىلۋى تۋرالى بريفينگتە ق ر پرەمەر-مينيسترىنىڭ ورىنباسارى ەرالى توعجانوۆ وقۋ جىلىنىڭ اياقتالۋىنا قاتىستى جوسپارلارمەن ءبولىستى، دەپ حابارلايدى Dalanews.kz.
نەگىزىنەن، ول مەكتەپتەردەگى سوڭعى قوڭىراۋ بولاتىنىن ايتتى.
ادامدار سانى شەكتەۋلى، اشىق اسپان جاعدايىندا مەكتەپتەردە 3-4 ماۋسىمدا سوڭعى قوڭىراۋ وتەدى، - دەدى توعجانوۆ.
ق ر ءبىلىم جانە عىلىم ۆيسە-مينيسترى شولپان كارينوۆا وسىعان قاتىستى جەلىدە جازبا جاريالادى.
"3-4 ماۋسىمدا 11 سىنىپ تۇلەكتەرى قولىنا اتتەستات تاپسىرۋ تۋرالى شەشىم قابىلداندى. بۇل شارا جىل سايىن ماۋسىم ايىنىڭ ورتاسىندا وتكىزىلەتىن. بيىل تۇلەكتەرگە ارنالعان قورىتىندى اتتەستاتسيالاۋ بولمايتىنىن جانە ۇبت-عا دايىندىقتى ەسكەرە وتىرىپ، ءبىز ونى ماۋسىمنىڭ باسىنا قاراي جىلجىتتىق. بيىلعى سالتاناتتى شارانىڭ ەرەكشەلىگى - مەرەكە اياسىندا 11 سىنىپتى ءتامامداعان تۇلەكتەرگە اتتەستاتتار سالتاناتتى تۇردە تاپسىرىلىپ، سوڭعى قوڭىراۋ سوعىلادى"، - دەپ جازدى كارينوۆا facebook-تا.
سونىمەن بىرگە بۇل ءىس-شارا مەكتەپتە، اشىق اسپان اياسىندا بوتەن قوناقتارسىز، 11 سىنىپ تۇلەكتەرىنىڭ قاتىسۋىمەن جانە سانيتارلىق نورمالارعا سايكەس وتكىزىلۋى كەرەك.
"شارا كەزىندە تۇلەكتەرگە مەكتەپ فورماسىندا بولۋ ۇسىنىلدى. سونىمەن قاتار، سالتاناتتى شارادان سوڭ 11-سىنىپتى بىتىرۋشىلەردىڭ اعاش وتىرعىزۋ شاراسىن ەكولوگيا مينيسترلىگىمەن بىرلەسىپ، ۇيىمداستىرۋ جوسپارلانۋدا. كەيىننەن مۇنداي اكسيانى وتكىزۋ 25 مامىرعا بەلگىلەنەدى"، - دەدى ول.
