تۇركىستان وبلىسى اكىمى ءومىرزاق شوكەيەۆ جاقىن ەلدى مەكەندەرگە وقۋشىلاردى تاسىمالداۋ، اۆتوبۋسپەن قامتۋ ءىسىن جانداندىرۋ كەرەكتىگىن جەتكىزدى.
– مەكتەپ سالۋ – بيۋدجەتكە ۇلكەن سالماق. سوندىقتان ءبىلىم ۇيالارىن سالۋدىڭ لوگيكالىق ءمانى بولۋى ءتيىس. بىلتىر رەسپۋبليكا بويىنشا سالىنعان مەكتەپتەردىڭ تورتتەن ءبىرى بىزدە سالىندى. ەندىگى كەزەكتە جاقىن اۋىلداردى ساراپتاپ، جاقىن ەلدى مەكەندەردە وقۋشىلاردى اۆتوبۋسپەن تاسىمالداۋعا باسىمدىق بەرۋ كەرەك. 10-15 شاقىرىم جەردەن بالالاردى تاسىمالداعان ءجون. ەكىنشىدەن، ينۆەستورلار ەسەبىنەن جەكە مەنشىكتەگى مەكتەپتەردى كوبەيتكەن ابزال، – دەدى ءومىرزاق شوكەيەۆ.
تۇركىستان وبلىستىق ادامي الەۋەتتى دامىتۋ باسقارماسىنىڭ باسشىسى د.بولاتحان ۇلىنىڭ مالىمدەۋىنشە، وبلىستا 2023 جىلى – 2، 2024 جىلى – 31، 2025 جىلى – 56 مەكتەپتى پايدالانۋعا بەرۋ جوسپارلانىپ وتىر. ەڭ كوپ مەكتەپ قاجەتتىلىگى بار اۋدان، قالالارعا توقتالساق، تۇركىستان قالاسىندا 8 مەكتەپ بوي كوتەرەدى. سونىمەن بىرگە كەلەس اۋدانىندا – 8، ساۋران اۋدانىندا – 9، سايرام اۋدانىندا 12 مەكتەپ سالىنباق.
اپتالىق وتىرىستا تۇركىستان قالاسىن دامىتۋ ماسەلەسى دە قارالىپ، شاھار باسشىسى ن.تۇراشبەكوۆتىڭ بايانداماسى تىڭدالدى. تۇركىستان قالاسىنىڭ اكىمشىلىك-ىسكەرلىك ورتالىعىندا 2022 جىلى 7، 9 جانە 12 قاباتتى، جالپى 53 تۇرعىن ءۇي مەملەكەتتىك بيۋدجەت ەسەبىنەن جۇرگىزىلىپ، قابىلدانادى. «ارمان» تۇرعىن ءۇي كەشەنىن اباتتاندىرۋ ماقساتىندا جەر تەگىستەۋ، اياقجولدار توسەۋ جانە اۆتوتۇراق ورىندارىن اسفالتتاۋعا دايىندىق جۇمىستارى اتقارىلدى. قالادا ساياباقتار سانى ارتۋدا. وبلىس اكىمى قالانى كوگالداندىرۋ، سۋلاندىرۋ جۇمىسىن كۇشەيتۋدى تاپسىردى.
– بارلىق كانالداردى جاياۋ ارالاپ، كورىپ ءجۇرمىن. ەگەر شىلدە كۇنى قالانى سۋلاندىرا الماساق، بۇل ءىس دۇرىس بولمايدى. كۇندە تاڭەرتەڭ ءاربىر سۋ بەرىلەتىن اۋماققا بارىپ، سۋدىڭ جىبەرىلگەنىن نازاردا ۇستاۋ قاجەت. ءبىز قالاعا قانشاما گيدرانتتار، كانالدار سالدىق. ەندى وعان سۋ بەرمەسە، جاۋاپتى تۇلعالار قاداعالاماسا ءىس ونبەيدى. اعىن سۋدى ەسەپتەپ، باقىلاۋ كەرەك، – دەدى ءومىرزاق شوكەيەۆ.
جاز ايلارىندا جاسىل جەلەكتەردى سۋعارۋدى قارقىندى ءارى ءتيىمدى جۇرگىزۋ ماقساتىندا 3 اۋىسىمدىق جۇمىس كەستەسى جاسالدى. اتالعان جۇمىستاردى «جاسىل-تۇركىستان» كمم جانە «جارىق-تازالىق» ج ش س بىرلەسە جۇرگىزىپ جاتىر. ب.ساتتارحانوۆ داڭعىلى بويىنا كۇندەلىكتى ساعات 21:00-دەن 02:00-گە دەيىن 8 تەحنيكا قويىلىپ، 3 اۋىسىمدىق تۇنگى كەزەكشىلىك ۇيىمداستىرىلعان.
«وتىرار» مولتەك اۋدانىنداعى ياسسى كوشەسى بويىنان 2،34 گا اۋماقتا گۇلزار قۇرىلىسى باستالدى. اتالعان نىساندا ۇلكەن سۋبۇرقاق، دەمالىس ورىندارى، سپورت الاڭشالارى، بالالار الاڭشالارى، اياقجولدار، ۆەلوجولدار، جۇگىرۋ جولاقتارى مەن جاسىل جەلەكتەر قاراستىرىلعان. قازىرگى تاڭدا مەردىگەر تاراپىنان جەر جۇمىستارى جۇرگىزىلىپ، بەتون ارىقتار جانە بورديۋر ورناتۋ، ينجەنەرلىك جەلىلەردى تارتۋ جۇمىستارى اياقتالعان.
