كورمەنىڭ سالتاناتتى اشىلۋىندا وبلىس باسشىسى بىرنەشە جىلدان كەيىن قايتادان جالعاسىن تاپقان اۋقىمدى سالالىق ءىس-شاراعا قاتىسۋشىلاردى قۇتتىقتاپ، تابىس تىلەدى.
– كوروناۆيرۋس پاندەمياسىنا بايلانىستى ۇزاق ۇزىلىستەن كەيىن مۇناي-گاز سالاسىنداعى ماڭىزدى ءىس-شارالاردىڭ ءبىرى جۇمىسىن قايتا جالعاستىرىپ وتىر. كورمە مۇناي كومپانيالارى مەن باسقا كومپانيالاردىڭ وكىلدەرى اراسىنداعى تىكەلەي ديالوگ ورناتۋدىڭ ءتيىمدى الاڭىنا اينالدى. مۇندا مۇناي-گاز سالاسىنىڭ جاڭا جابدىقتارىمەن، قىزمەتتەرىمەن جانە تەحنولوگيالارىمەن تانىسۋعا مۇمكىندىك مول. شيكىزات بازاسىنىڭ بولۋى ءوڭىردى مۇناي-حيميا، ەنەرگەتيكا، قۇرىلىس يندۋسترياسى جانە باسقا دا سالالاردى دامىتۋعا قۋاتتى سەرپىن بەرەتىن ۇلتتىق مۇناي-گاز كلاستەرى ءۇشىن وتە ءتيىمدى ورىنعا اينالدىرىپ وتىر، – دەگەن ماحامبەت دوسمۇحامبەتوۆ اتىراۋ وبلىسى رەسپۋبليكادا ينۆەستيسيا تارتۋ بويىنشا كوشباسشى ەكەنىن، ال قازاقستاندا وندىرىلەتىن قارا التىننىڭ شامامەن 55%-ى مۇنايلى وڭىرگە تيەسىلى ەكەنىن اتاپ ءوتتى.
كورمەنى ارالاپ شىققاننان ايماق باسشىسى باسقا دا قاتىسۋشىلارمەن بىرگە مۇناي-گاز سالاسىن دامىتۋ ماسەلەلەرى جونىندەگى «جاڭا باعىت – جاڭا تەحنولوگيالار» اتتى پلەنارلىق وتىرىسقا قاتىسىپ، ءسوز سويلەدى:
– پرەزيدەنتىمىز قاسىم-جومارت توقايەۆ ەكونوميكانى ءارتاراپتاندىرۋ، وندىرىلەتىن تاۋارلاردىڭ ءتۇرىن كوبەيتىپ، ەكسپورت گەوگرافياسىن كەڭەيتۋ جۇمىستارىن جالعاستىرۋ بويىنشا تاپسىرمالار بەردى. وسىعان وراي جوعارى وڭدەلگەن ءونىم شىعارۋ مەن وڭدەۋ ونەركاسىبىن دامىتۋعا باسىمدىق بەرۋدەمىز. ماسەلەن، اتىراۋ مۇناي وڭدەۋ زاۋىتى شيكىزاتتى تەرەڭ وڭدەپ، ءقازىردىڭ وزىندە ءونىمنىڭ 20-داي ءتۇرىن شىعارۋدا. مۇناي مەن گاز ءوندىرىسى نەگىزىندە جوعارى تەحنولوگيالىق مۇناي-گاز حيمياسى ونەركاسىبىن قارقىندى دامىتۋعا كۇش سالىپ جاتىرمىز، – دەدى.
سونداي-اق، ءوڭىر باسشىسى مۇناي-گاز سالاسىنىڭ بولاشاعى زور ەكەنىن، ونىڭ الداعى جىلدارى ەل ەكونوميكاسىندا الاتىن ماڭىزدى ورنىن ايتىپ، سونىڭ ىشىندە اتىراۋ وبلىسىنىڭ رولىنە ەرەكشە توقتالدى. ونىڭ ايتۋىنشا، الداعى جىلدارى تەڭىز كەن ورنىندا كەلەشەك كەڭەيۋ جوباسى ىسكە قوسىلىپ، قاشاعانداعى ءوندىرىس ۇلعايعاندا، وبلىستىڭ رەسپۋبليكاداعى مۇناي وندىرۋدەگى ۇلەسى 65%-عا جەتپەك.
پلەنارلىق وتىرىستا ق ر ەنەرگەتيكا مينيسترلىگىنىڭ ءبىرىنشى ۆيسە-مينيسترى مۇرات جۇرەبەكوۆ، ق ر يندۋستريا جانە ينفراقۇرىلىمدىق دامۋ ۆيسە-مينيسترى مارات قارابايەۆ، «نكوك» كومپانياسىنىڭ باسقارۋشى ديرەكتورى وليۆە لازار، «IMB ورتالىق» مۇناي-گاز ماشينالارىن جاساۋدى دامىتۋ حالىقارالىق ورتالىعىنىڭ باس ديرەكتورى مارات كارىموۆ ءوز پىكىرلەرىن ءبىلدىردى.
ءوز كەزەگىندە ق ر ەنەرگەتيكا مينيسترلىگىنىڭ ءبىرىنشى ۆيسە-مينيسترى مۇرات جۇرەبەكوۆ سولتۇستىك كاسپيي جوباسى شەڭبەرىندە قۋاتى جىلىنا 1 ملرد. م3 گاز وڭدەۋ زاۋىتىن سالۋ، گازدى كەرى ايداۋ كومپرەسسورلارىن جاڭعىرتۋ جانە باسقا دا ينۆەستيسيالىق جوبالار ىسكە اسىرىلۋدا ەكەنىن جەتكىزدى.
ال، ق ر يندۋستريا جانە ينفراقۇرىلىمدىق دامۋ ۆيسە-مينيسترى مارات قارابايەۆ بۇل سالاداعى جۇمىستاردى جەتىلدىرۋ باعىتىندا قولعا الىنعان ءىس-شارالار تۋرالى ايتتى.
بۇدان سوڭ ايماق باسشىسى ماحامبەت دوسمۇحامبەتوۆ وبلىس اكىمدىگى ۇيىمداستىرعان كورمە ورتالىعىندا «اتىراۋدا جاسالعان» جەرگىلىكتى تاۋار وندىرۋشىلەردىڭ كورمەسىنە» قاتىسىپ، كاسىپكەرلەرمەن تىلدەستى.
كورمەگە اۋىل، اۋدانداردى قوسا العاندا وبلىس بويىنشا 130-دان استام وڭدەۋ ونەركاسىبىنىڭ كاسىپورىندارى مەن جەكە كاسىپكەرلەر ءوز ونىمدەرىن قويىپتى. بۇدان كەيىن وبلىس اكىمى «جەرگىلىكتى قامتۋدى دامىتۋ» فورۋمىنا قاتىسىپ، جەرگىلىكتى تاۋار وندىرۋشىلەردى قولداۋدىڭ ماڭىزىن اتاپ ءوتتى.
فورۋم اياسىندا ءبىرقاتار جەرگىلىكتى تاۋار وندىرۋشىلەر مەن ءىرى كومپانيالار اراسىندا ىنتىماقتاستىق مەموراندۋمدارى جاسالدى. سونىمەن قاتار، كاسىپكەرلەرگە مەملەكەتتىك قولداۋ شارالارىن كەڭىنەن ءتۇسىندىرۋ ماقساتىندا، اتىراۋ وبلىسى كاسىپكەرلەر پالاتاسى، «دامۋ» كقق، «اۋىلشارۋاشىلىعىن قولداۋ قورى» جانە اكك «اتىراۋ» اق وكىلدەرى ارنايى بۇرىش ۇيىمداستىرىپ، قىزىعۋشىلىق تانىتۋشىلارعا كەڭەستەر بەردى.
ايتا كەتەيىك، كورمە جۇمىسىنا تۇركيا، اقش، نيدەرلاندى، رەسەي، بەلورۋسسيا سىندا ەلدەردەن 70-كە جۋىق، سونداي-اق قازاقستاندىق كومپانيالار قاتىسۋدا. ءۇش كۇنگە سوزىلاتىن كورمە اياسىندا تاقىرىپتىق سەمينارلار، ەكىجاقتى كەزدەسۋلەر مەن باسقا دا ءىس-شارالار وتكىزىلەدى.
