Kórmeniń saltanatty ashylýynda oblys basshysy birneshe jyldan keiin qaitadan jalǵasyn tapqan aýqymdy salalyq is-sharaǵa qatysýshylardy quttyqtap, tabys tiledi.
– Koronavirýs pandemiiasyna bailanysty uzaq úzilisten keiin munai-gaz salasyndaǵy mańyzdy is-sharalardyń biri jumysyn qaita jalǵastyryp otyr. Kórme munai kompaniialary men basqa kompaniialardyń ókilderi arasyndaǵy tikelei dialog ornatýdyń tiimdi alańyna ainaldy. Munda munai-gaz salasynyń jańa jabdyqtarymen, qyzmetterimen jáne tehnologiialarymen tanysýǵa múmkindik mol. Shikizat bazasynyń bolýy óńirdi munai-himiia, energetika, qurylys indýstriiasy jáne basqa da salalardy damytýǵa qýatty serpin beretin ulttyq munai-gaz klasteri úshin óte tiimdi orynǵa ainaldyryp otyr, – degen Mahambet Dosmuhambetov Atyraý oblysy respýblikada investitsiia tartý boiynsha kóshbasshy ekenin, al Qazaqstanda óndiriletin qara altynnyń shamamen 55%-y munaily óńirge tiesili ekenin atap ótti.
Kórmeni aralap shyqqannan aimaq basshysy basqa da qatysýshylarmen birge munai-gaz salasyn damytý máseleleri jónindegi «Jańa baǵyt – jańa tehnologiialar» atty plenarlyq otyrysqa qatysyp, sóz sóiledi:
– Prezidentimiz Qasym-Jomart Toqaev ekonomikany ártaraptandyrý, óndiriletin taýarlardyń túrin kóbeitip, eksport geografiiasyn keńeitý jumystaryn jalǵastyrý boiynsha tapsyrmalar berdi. Osyǵan orai joǵary óńdelgen ónim shyǵarý men óńdeý ónerkásibin damytýǵa basymdyq berýdemiz. Máselen, Atyraý munai óńdeý zaýyty shikizatty tereń óńdep, qazirdiń ózinde ónimniń 20-dai túrin shyǵarýda. Munai men gaz óndirisi negizinde joǵary tehnologiialyq munai-gaz himiiasy ónerkásibin qarqyndy damytýǵa kúsh salyp jatyrmyz, – dedi.
Sondai-aq, óńir basshysy munai-gaz salasynyń bolashaǵy zor ekenin, onyń aldaǵy jyldary el ekonomikasynda alatyn mańyzdy ornyn aityp, sonyń ishinde Atyraý oblysynyń róline erekshe toqtaldy. Onyń aitýynsha, aldaǵy jyldary Teńiz ken ornynda Keleshek keńeiý jobasy iske qosylyp, Qashaǵandaǵy óndiris ulǵaiǵanda, oblystyń respýblikadaǵy munai óndirýdegi úlesi 65%-ǵa jetpek.
Plenarlyq otyrysta QR Energetika ministrliginiń birinshi vitse-ministri Murat Júrebekov, QR Indýstriia jáne infraqurylymdyq damý vitse-ministri Marat Qarabaev, «NKOK» kompaniiasynyń basqarýshy direktory Olive Lazar, «IMB ortalyq» munai-gaz mashinalaryn jasaýdy damytý halyqaralyq ortalyǵynyń bas direktory Marat Kárimov óz pikirlerin bildirdi.
Óz kezeginde QR Energetika ministrliginiń birinshi vitse-ministri Murat Júrebekov Soltústik Kaspii jobasy sheńberinde qýaty jylyna 1 mlrd. m3 gaz óńdeý zaýytyn salý, gazdy keri aidaý kompressorlaryn jańǵyrtý jáne basqa da investitsiialyq jobalar iske asyrylýda ekenin jetkizdi.
Al, QR Indýstriia jáne infraqurylymdyq damý vitse-ministri Marat Qarabaev bul saladaǵy jumystardy jetildirý baǵytynda qolǵa alynǵan is-sharalar týraly aitty.
Budan soń aimaq basshysy Mahambet Dosmuhambetov oblys ákimdigi uiymdastyrǵan Kórme ortalyǵynda «Atyraýda jasalǵan» jergilikti taýar óndirýshilerdiń kórmesine» qatysyp, kásipkerlermen tildesti.
Kórmege aýyl, aýdandardy qosa alǵanda oblys boiynsha 130-dan astam óńdeý ónerkásibiniń kásiporyndary men jeke kásipkerler óz ónimderin qoiypty. Budan keiin oblys ákimi «Jergilikti qamtýdy damytý» forýmyna qatysyp, jergilikti taýar óndirýshilerdi qoldaýdyń mańyzyn atap ótti.
Forým aiasynda birqatar jergilikti taýar óndirýshiler men iri kompaniialar arasynda yntymaqtastyq memorandýmdary jasaldy. Sonymen qatar, kásipkerlerge memlekettik qoldaý sharalaryn keńinen túsindirý maqsatynda, Atyraý oblysy kásipkerler palatasy, «Damý» KQQ, «Aýylsharýashylyǵyn qoldaý qory» jáne ÁKK «Atyraý» AQ ókilderi arnaiy burysh uiymdastyryp, qyzyǵýshylyq tanytýshylarǵa keńester berdi.
Aita keteiik, kórme jumysyna Túrkiia, AQSh, Niderlandy, Resei, Belorýssiia synda elderden 70-ke jýyq, sondai-aq qazaqstandyq kompaniialar qatysýda. Úsh kúnge sozylatyn kórme aiasynda taqyryptyq seminarlar, ekijaqty kezdesýler men basqa da is-sharalar ótkiziledi.
