قازاقستان قارجىگەرلەرى قاۋىمداستىعىنىڭ (ققق) تالداۋ ورتالىعى قارجى نارىعىنىڭ كاسىبي قاتىسۋشىلارى اراسىندا جۇرگىزگەن كەزەكتى ساۋالناما ناتيجەلەرىن جاريالادى. وندا، نەگىزىنەن، 2025 جىلعى ماۋسىمداعى ماكروەكونوميكالىق كورسەتكىشتەرگە قاتىستى بولجامدار بەرىلگەن، دەپ حابارلايدى Dalanews.kz.
بازالىق مولشەرلەمە
ايلىق ينفلياسيا كورسەتكىشتەرىنىڭ ءۇش اي قاتارىنان باياۋلاۋىنىڭ تىركەلۋىنە بايلانىستى ساۋالناماعا قاتىسقان ساراپشىلاردىڭ 79%-ى ۇلتتىق بانك 5 ماۋسىمدا وتەتىن الداعى وتىرىسىندا بازالىق مولشەرلەمەنى وزگەرىسسىز قالدىرادى دەپ كۇتەدى.
نارىقتىڭ قالعان قاتىسۋشىلارى شامالى وسىمگە جول بەرەدى: 16،75% دەيىن. مۇنى ولار 2025 جىلى ينفلياسيانى 10-12% ماقساتتى دياپازون شەگىندە ۇستاۋ، سونداي-اق ۇلتتىق ۆاليۋتا باعامىن ودان ءارى تۇراقتاندىرۋ تۇرعىسىندا اقشا-نەسيە ساياساتىن قاتاڭداتۋ تالابىنىڭ تۋىنداۋ ىقتيمالدىلىعىمەن تۇسىندىرەدى.
ينفلياسيا
ساۋالناما ناتيجەسى بويىنشا، مامىردا 12 ايعا ارنالعان ينفلياسيالىق كۇتۋلەر ءبىر اي بۇرىنعى بولجامدى 11،8%-دان 11،1% - عا دەيىن تومەندەدى.
"بۇل، كوبىنەسە بىرتىندەپ باياۋلاپ كەلە جاتقان ناقتى ينفلياسيا، ۆاليۋتا نارىعىنىڭ سالىستىرمالى تۇردە تۇراقتانۋى جانە ءبىرجولعى تاريفتىك شەشىمدەر تاراپىنان بولعان قىسىمنىڭ تومەندەۋىمەن بايلانىستىرىلادى"، - دەيدى قاۋىمداستىقتاعىلار.
بازالىق مولشەرلەمەگە بايلانىستى ينفلياسيالىق كۇتۋلەردى قايتا قاراستىرۋعا بايلانىستى ءبىر جىلدان كەيىنگى دەڭگەي بۇرىنعى 15،75% - دان 15،5% - عا دەيىن تومەندەتىلە وتىرىپ، تۇزەتىلدى. وسى جاعىنان العاندا، ەكونوميكاداعى ناقتى مولشەرلەمە 4،4% (بۇرىن - 3،95%) بولۋى مۇمكىن، بۇل تەڭگە تۇرىندەگى اكتيۆتەردىڭ تارتىمدىلىعىن ارتتىرا تۇسەرى ءسوزسىز.
ۆاليۋتا باعامى
"مامىر ايىندا ازداپ تومەندەۋدەن كەيىن (0،3% - عا) ماۋسىمدا تەڭگەگە شاققانداعى 1 اقش دوللارىنىڭ قۇنى 516،3 تەڭگەگە دەيىن ءوسۋى مۇمكىن. بۇل رەتتە ۇلتتىق قوردان الىنىپ، ساتىلاتىن شەتەل ۆاليۋتالارى كولەمىنىڭ تومەندەۋى، سالىق كەزەڭى تاراپىنان قولداۋدىڭ بولماۋى، جىل ورتاسىنداعى داستۇرگە ساي بەلسەندى دەمالىس ماۋسىمى جانە بيۋدجەت قاراجاتىن يگەرۋدى جەدەلدەتۋ شەتەل ۆاليۋتاسىنا دەگەن سۇرانىستى كۇشەيتەدى"، - دەيدى ساراپشىلار.
ال ءبىر جىلدان كەيىن 1 اقش دوللارى بويىنشا كۇتىلەتىن باعام 539،7 تەڭگە بولۋى مۇمكىن.
وعان،نەگىزىنەن، مۇناي باعاسىنىڭ جوعارىلاۋ ىقتيمالدىلىعى، ينفلياسيالىق كۇتۋلەر كورسەتكىشىنىڭ تومەندەۋى ىقپال ەتپەك.
مۇناي
ءبىر جىلدان كەيىن كۇتىلەتىن Brent مۇنايىنىڭ ءبىر باررەلىنىڭ ورتاشا باعاسى 65،4 دوللاردى (بۇرىنعى بولجام - 64،9) قۇرايدى. بۇعان اقش-تاعى بۇرعىلاۋ بەلسەندىلىگىنىڭ باياۋلاۋى، تاياۋ شىعىستاعى كۇردەلى گەوساياسي جاعداي، ۋكرايناداعى سوعىستى رەتتەۋدە وڭ ناتيجەنىڭ بولماۋى تۇرتكى ەكەنى ايتىلادى.
ەكونوميكالىق ءوسىم
ءبىر جىلدان كەيىن ەلىمىزدىڭ ءجىو ءوسىمى 4،1%-دى (3،9% - بۇرىنعى بولجام) قۇرايدى دەپ بولجانادى. بۇل رەتتە ەكونوميكانى جەڭىلدەتىلگەن قارجىلاندىرۋدى ۇلعايتۋ ارقىلى اۋقىمدى كولەمدە قولداۋ جوسپارى، ينفراقۇرىلىمدىق جوبالاردى ىسكە اسىرۋ جانە ەلىمىزدە شيكىزات ءوندىرىسى كولەمىن ۇلعايتۋ ماڭىزدى ءرول اتقارماق.
