قازاقستان جۋرناليستەر وداعىنىڭ ءتوراعاسى، "ۇلتتىق باسپا ءسوز كلۋبى" قوعامدىق قورىنىڭ پرەزيدەنتى سەيىتقازى ماتايەۆ پەن ونىڭ ۇلى قازتاگ اگەنتتىگىنىڭ باس ديرەكتورى اسەت ماتايەۆ ۇستالدى دەپ مالىمدەدى بۇگىن الماتىدا ۇلتتىق باسپا ءسوز كلۋبىندا ءوتىپ جاتقان جيىندا "ءادىل ءسوز" باسپا ءسوز قۇقىعىن قورعاۋ ۇيىمىنىڭ جەتەكشىسى تامارا كالەيەۆا.
كالەيەۆانىڭ سوزىنشە، سەيىتقازى ماتايەۆ پەن اسەت ماتايەۆ بۇگىن تاڭەرتەڭ "ۇلتتىق باسپا ءسوز كلۋبى مەن قازتاگ اگەنتتىگىنە قاتىستى جاعداي" تۋرالى باسپا ءسوز كونفەرەنسياسى باستالماي تۇرىپ ۇستالعان. ولار وسى جيىندا سويلەۋى ءتيىس بولعان.
جيىندا سويلەگەندەر سەيىتقازى ماتايەۆ پەن اسەت ماتايەۆ "كوپ مولشەدە مەملەكەت قارجىسىن جىمقىردى" دەگەن كۇدىككە ىلىنگەنىن ايتتى. سەيىتقازى ماتايەۆ بۇعان قوسا الماتىداعى "ۇلتتىق باسپا ءسوز كلۋبىن زاڭسىز رەكونسترۋكسيالادى" دەگەن دە كۇدىككە ىلىنگەن.
"ءىستىڭ ءمانى ولاردى قۋدالاۋدىڭ شىنايى ماقساتى اشىق ديالوگ الاڭى - ۇلتتىق باسپا ءسوز كلۋبىنىڭ قىزمەتىن شەكتەۋ، قازتاگ ماتەريالدارىنىڭ مازمۇنىنا جاسىرىن تۇردە مەملەكەتتىك باقىلاۋ جاساۋ جانە قازاقستان جۋرناليستەر وداعىنىڭ قوعامدىق بەلسەندىلىگىن تومەندەتۋ دەگەن ۇيعارىم جاساتىپ وتىر" دەلىنگەن جيىندا تاراتىلعان مالىمدەمەدە. وندا ماتايەۆتاردىڭ وزدەرىنە تاعىلعان ايىپتى مويىندامايتىنى جانە كىناسىز ەكەندەرىن دالەلدەۋگە دايىن ەكەندىگى ايتىلادى.
كەيىننەن اسەت ماتايەۆ بوساپ شىققانى بەلگىلى بولدى. ول "ازاتتىق" راديوسىنا بەرگەن سۇحباتىندا اكەلى-بالالى ماتايەۆترادىڭ ىسىنە "بيلىكتەگى ىقپالدى ادامداردىڭ" ارالاسىپ وتىرعانىن، "ۇلتتىق باسپا ءسوز كلۋبى" مەن كازتاگ-تى تارتىپ الۋ ويلارى بار ەكەنىن مالىمدەدى. ۇلكەن ماتايەۆ ءالى بوساعان جوق.
