قاماۋعا الىنعان قازاقستان جۋرناليستەر وداعىنىڭ باسقارما ءتوراعاسى جانە ۇلتتىق باسپا ءسوز كلۋبىنىڭ جەتەكشىسى سەيىتقازى ماتايەۆتى قولداۋ ءۇشىن باس پروكۋراتۋراعا جولداناتىن ۇندەۋگە قول قويۋ ءجۇرىپ جاتىر.
قازتاگ اقپارات اگەنتتىگىنىڭ حابارلاۋىنشا، ۇندەۋگە 200-دەن استام ادام قول قويىپ ۇلگەرگەن. قازاقستاننىڭ تانىمال جۋرناليستەرى الەۋمەتتىك جەلىلەردە سەيىتقازى ماتايەۆۆۆقا قولداۋ ءبىلدىرىپ جاتىر.
"ءادىل ءسوز" ءسوز بوستاندىعىن قورعاۋ ۇيىمى تاراتىپ وتىرعان ۇندەۋدىڭ اۆتورلارى باس پروكۋراتۋرادان بۇل ءىس بويىنشا تەرگەۋدى ەرەكشە باقىلاۋعا الۋدى جانە تەرگەۋدىڭ مەيلىنشە اشىق ءجۇرۋىن قامتاماسىز ەتۋدى سۇرايدى. جانە زاڭمەن بەكىتىلگەن كىناسىزدىك پرەزۋمپسياسىنىڭ ساقتالۋىنا نازار اۋدارادى.
سەيىتقازى ماتايەۆ پەن ونىڭ ۇلى، قازتاگ اقپارات اگەنتتىگىنىڭ ديرەكتورى اسەت ماتايەۆ سىبايلاس جەمقورلىققا قارسى كۇرەس ۇلتتىق بيۋروسىنىڭ الماتىداعى بولىمىنە اكەتىلگەن. ءبىراز ۋاقىتتان سوڭ اسەت ماتايەۆ بوساتىلعانىمەن، سەيىتقازى ماتايەۆ ءالى دە قاماۋدا.
قۇزىرلى ورگاندار قازتاگ پەن ۇلتتىق باسپا ءسوز كلۋبى 2011–2015 جىلدارى قولدى بولعان 300 ميلليون تەڭگە (قازىرگى باعاممەن 850 مىڭ دوللار) قازىنانىڭ قارجىسىنا قاتىستى ءىس بويىنشا كۇدىككە ىلىنگەنىن حابارلايدى. ايىپتاۋدى جوققا شىعارعان ماتايەۆتار بولىپ جاتقان وقيعانى «ۇكىمەتتىك ەمەس ۇيىمدار مەن باق-قا قىسىم كورسەتۋ» دەپ باعالادى.
