Qamaýǵa alynǵan Qazaqstan jýrnalister Odaǵynyń basqarma tóraǵasy jáne Ulttyq baspasóz klýbynyń jetekshisi Seiitqazy Mataevty qoldaý úshin bas prokýratýraǵa joldanatyn úndeýge qol qoiý júrip jatyr.
QazTAG aqparat agenttiginiń habarlaýynsha, úndeýge 200-den astam adam qol qoiyp úlgergen. Qazaqstannyń tanymal jýrnalisteri áleýmettik jelilerde Seiitqazy Mataevvvqa qoldaý bildirip jatyr.
"Ádil sóz" sóz bostandyǵyn qorǵaý uiymy taratyp otyrǵan úndeýdiń avtorlary bas prokýratýradan bul is boiynsha tergeýdi erekshe baqylaýǵa alýdy jáne tergeýdiń meilinshe ashyq júrýin qamtamasyz etýdi suraidy. Jáne zańmen bekitilgen kinásizdik prezýmptsiiasynyń saqtalýyna nazar aýdarady.
Seiitqazy Mataev pen onyń uly, QazTAG aqparat agenttiginiń direktory Áset Mataev sybailas jemqorlyqqa qarsy kúres ulttyq biýrosynyń Almatydaǵy bólimine áketilgen. Biraz ýaqyttan soń Áset Mataev bosatylǵanymen, Seiitqazy Mataev áli de qamaýda.
Quzyrly organdar QazTAG pen Ulttyq baspasóz klýby 2011–2015 jyldary qoldy bolǵan 300 million teńge (qazirgi baǵammen 850 myń dollar) qazynanyń qarjysyna qatysty is boiynsha kúdikke ilingenin habarlaidy. Aiyptaýdy joqqa shyǵarǵan Mataevtar bolyp jatqan oqiǵany «úkimettik emes uiymdar men BAQ-qa qysym kórsetý» dep baǵalady.
