"ءادىل ءسوز" حالىقارالىق ءسوز بوستاندىعىن قورعاۋ ۇيىمى مەن حالىقارالىق قازاق پەن-كلۋبى قازاقستان پرەزيدەنتى نۇرسۇلتان نازاربايەۆتان قازاقستان جۋرناليستەر وداعىنىڭ ءتوراعاسى، ۇلتتىق باسپا ءسوز كلۋبىنىڭ باسشىسى سەيىتقازى ماتايەۆتىڭ ىسىنە نازار اۋدارۋعا شاقىردى.
"ءادىل ءسوز" جەتەكشىسى تامارا كالەيەۆا مەن پەن-كلۋب جەتەكشىسى بيگەلدى عابدۋللين بىرلەسە جاساعان ۇندەۋدە ماتايەۆتىڭ پرەزيدەنتتىڭ بۇرىنعى باسپا ءسوز حاتشىسى ەكەنىن ەسكە سالىپ، ماتايەۆتىڭ ءوزىن "قۋدالاۋ سەبەپتەرى تۋرالى ايتقانىنا سەنبەۋگە نەگىز جوعىن" مالىمدەيدى
سەيىتقازى ماتايەۆتى كەشە الماتىدا ۇلتتىق كوررۋپسياعا قارسى ءىس-قيمىل بيۋروسىنىڭ الماتى قالاسى بويىنشا دەپارتامەنتى "بيۋدجەت قارجىسىن جىمقىردى" جانە "سالىق تولەۋدەن جالتاردى" دەگەن كۇدىكپەن ۇستاعان. ونىمەن بىرگە ۇستالعان ۇلى، قازتاگ اقپارات اگەنتتىگىنىڭ باسشىسى اسەت ماتايەۆ بىرەر ساعاتتان سوڭ بوساتىلعان. قازتاگ اگەنتتىگى كەشە تاراتقان سەيىتقازى ماتايەۆتىڭ مالىمدەمەسىندە قىلمىستىق قۋدالاۋعا الماتىداعى ۇلتتىق باسپا ءسوز كلۋبى مەن قازتاگ ورنالاسقان عيماراتتى الۋ ارەكەتى سەبەپ بولعانى ايتىلادى.
"بىزدە پرەزيدەنتتىڭ بۇرىنعى باسپا ءسوز حاتشىسىنىڭ سوزىنە سەنبەۋگە نەگىز جوق. وكىنىشكە وراي، قۇقىق قورعاۋ ورگاندارىنىڭ ىس-ارەكەتىنە سەنبەۋگە سالماقتى سەبەپتەر بار. سوڭعى جىلدارى ولار وسەك-اياڭدار پايدا بولۋىنا كوپتەگەن سەبەپتەر تۋدىرىپ، ازاماتتاردىڭ ادىلدىككە، زاڭ مەن مەملەكەتكە دەگەن سەنىمىن بۇزدى" دەيدى ۇندەۋ كالەيەۆا مەن عابدۋللين.
سەيىتقازى ماتايەۆ 1991-1993 جىلدارى قازاقستان پرەزيدەنتىنىڭ باسپا ءسوز حاتشىسى بولعان.
