ۋكراينانىڭ قازاقستانداعى بۇرىنعى ەلشىسى پەتر ۆرۋبليەۆسكييگە ماسكەۋدىڭ باسمان سوتى سىرتتاي ۇكىم شىعارىپ، ونى التى جىلعا باس بوستاندىعىنان ايىردى، دەپ حابارلايدى Dalanews.kz.
بۇل تۋرالى ادۆوكاتى دميتريي كيرسانوۆ ريا نوۆوستي اگەنتتىگىنە حابارلاعان.
رەسەي تارابى ۆرۋبليەۆسكييدى ۇلتى مەن تىلىنە بايلانىستى جەككورۋشىلىك پەن ارازدىق قوزدىرۋعا شاقىردى دەپ ايىپتادى. ايىپ ق ر قىلمىستىق كودەكسىنىڭ 282-بابى 2-بولىگى "ا" تارماعى بويىنشا (زورلىق قولدانۋ قاۋپىمەن كوپشىلىك الدىندا جاسالعان ارانداتۋشىلىق) تاعىلعان.
تەرگەۋ دەرەكتەرىنە سۇيەنسەك، 2022 جىلدىڭ تامىزىندا ول قازاقستانداعى ەلشى قىزمەتىن اتقارىپ جۇرگەن كەزىندە بەرگەن سۇحباتىندا رەسەي ازاماتتارىنا قارسى كۇش قولدانۋعا ۇندەيتىن مالىمدەمە جاساعان. بۇل سۇحبات ينتەرنەتتە اشىق تارالعان. كەيىن ۆرۋبليەۆسكيي تەرگەۋدەن جاسىرىنعان جانە حالىقارالىق ىزدەۋگە جاريالانعان. سوت وعان سىرتتاي قاماۋ تۇرىندەگى بۇلتارتپاۋ شاراسىن قولدانعان.
2022 جىلى الەۋمەتتىك جەلىلەردە ۆرۋبليەۆسكييدىڭ «ورىستاردى ءولتىرۋ كەرەك» دەگەن مازمۇنداعى ۆيدەوسى تاراپ، بۇل قوعامدا ۇلكەن رەزونانس تۋدىرعان. وسىدان كەيىن قازاقستان بيلىگى وعان "قاجەتسىز تۇلعا" دەگەن مارتەبە بەرگەن، ال ۋكراينا ونى ەلدەن كەرى شاقىرىپ العان. كەيىن ونىڭ ورنىنا جاڭا ەلشى تاعايىندالعان.
2024 جىلدىڭ اقپانىندا رەسەيدىڭ قارجىلىق مونيتورينگ اگەنتتىگى (روسفينمونيتورينگ) پەتر ۆرۋبليەۆسكييدى ەكسترەميستەر مەن تەرروريستەر تىزىمىنە قوسقان. ونىڭ ءاتى-جونى رەسەي ءىىم-نىڭ ىزدەۋ بازاسىنا دا ەنگىزىلدى.
بۇل ۆرۋبليەۆسكييگە شىعارىلعان العاشقى ۇكىم ەمەس. بۇعان دەيىن دە ول سىرتتاي التى جىلعا سوتتالعان ەدى. الايدا ماسكەۋ قالالىق سوتى ۇكىم شىعارۋدا پروسەسسۋالدىق زاڭبۇزۋشىلىقتار بولدى دەپ ەسەپتەپ، ءىستى قايتا قاراۋعا جىبەرگەن بولاتىن. ەندى جاڭا ۇكىم قايتادان سول مەرزىمدى – 6 جىل باس بوستاندىعىنان ايىرۋدى قاراستىرادى.
